燒肉控，是時候出動啦！銅鑼灣新開一間燒肉放題店，除咗有幾十款豬牛雞蔬菜可以燒，每枱客人仲跟送海鮮拼盤，可以燒近排好hit嘅甲羅燒，計埋加一，三百蚊有找！質素係點先？即刻睇相！

燒肉放題除咗有豬牛雞、海鮮、蔬菜，仲有即點即食嘅日本刺身、小食。另外仲有啲限定供應嘅食物。

有乜必食推介？介紹番最受歡迎嘅牛肉先，有醬燒牛排骨、安格斯牛肉眼、薄切牛小排、燒牛柳粒、鹽燒厚切牛舌，牛肉多為來自美加。至於雞豬就有串燒雞軟骨、串燒雞皮、岩鹽雞翼、地獄豚頸肉及厚切鹽燒五花肉。

鮮紅色嘅牛肉油花分佈平均，燒烤完口感充滿脂香之餘，又有微韌感，可以encore再encore！本身無乜味道嘅雞皮、雞軟骨灑上五味粉後，味道更香，雞軟骨仲幾有咬口添！

點先可掌握好燒烤時間？雞翼、牛柳粒呢類厚身少少嘅食物可以燒約3-4分鐘先轉另一邊再燒，如果好似牛肉、豬肉呢啲薄切嘅肉，燒2-3分鐘左右就可以翻轉，燒得太耐會變「柴皮」架！

來自芬蘭嘅雞翼都幾大件。一翻轉，金黃色嘅雞翼皮，加埋閃令令嘅油光，好靚。惟未醃過嘅雞翼齋食有點單調，建議燒好後可點少許醬油一齊食，更覺滋味。

比較驚喜嘅係，內臟部位都可以喺燒肉放題中食到，好少見，有（左起）牛肚、牛腸、牛孖筋、牛柏葉及雞腎。

不過要留意燒內臟嘅時間，好易燒燶。同埋燒之前，最好用油搽一搽個網先，唔係好易痴底！

每枱都會跟送一盤海鮮拼盤，有放題少見嘅甲羅燒、鮑魚、蒜蓉生蠔、虎蝦及貴妃蚌。嚟緊12月，海鮮拼盤更會加入美國波士頓龍蝦添，龍蝦嘅彈牙「肉」感，正呀！

蟹殼入面有綠色蟹膏、蟹籽、香蔥及鵪鶉蛋，將蟹殼放喺燒烤爐上，然後邊燒邊攪勻蟹殼中嘅配料，鵪鶉蛋嘅蛋汁令蟹膏更香更滑。

蔬菜拼盤有日本甜薯、南瓜、日式雜菇、露荀、洋蔥、粟米、茄子、雞脾菇、三色椒、菠蘿及冬菇，可多燒露荀，好juicy。

大部分食物都未經醃製，所以如果你係重口味嘅人，你可以用擺放喺枱面上嘅幾樽調味料，有（左起）醬油、鹽、黑胡椒、用嚟燒烤嘅油以及五味粉。

仲有燒烤專用嘅3款醬汁，分別係（左起）豉油、芝麻醬及芝麻醋添！

等緊燒肉嘅時候，就可以豪擦刺身先，三文魚、吞拿魚、帶子、北寄貝、馬刀貝、八爪魚片、甜蝦、左口魚、油甘魚及希靈魚，刺身好新鮮。

開飯仔就最鍾意三文魚、吞拿魚，油脂味重又鮮甜。

熱食方面有玉子燒、餃子、南瓜餅、炸年糕等，另有稻庭烏冬、海膽炒飯、炸雞芝士石鍋飯等飽肚選擇。

放題包十幾款飲品，除咗可樂、七喜呢類汽水，仲有道地烏龍茶、檸檬紅茶、蘋果紅茶、黑糖薑茶、菊花綠茶、冬瓜茶、蜜桃烏龍茶等。另加$60更可任飲Hoegaarden、Stella Artois啤酒添！最後，每位客人再嚟番杯Häagen-Dazs雪糕，有朱古力、曲奇香奶、草莓及香草4種口味。

比起其他燒肉放題，地方好寬敞闊落，坐得舒服，而且枱面夠大，可慢慢燒、慢慢歎。

開飯仔燒後感：
燒烤爐長方形，位置都算多，燒一轉應該都至少食到4-5塊牛肉。燒烤爐有3條發熱線，所以個個位都燒得猛火。反而要留意嘅係，每次燒烤前都最好搽一層油喺網中，咁就無咁易痴底。燒咗一兩轉之後最好就換一換燒烤網，唔係嘅話食物好易變黑晒架！

120分鐘燒肉放題
供應時間：星期一至四 6pm-12mn；星期五至日、公眾假期及前夕 6pm-1am
價錢：星期一至四 成人$268/位、小童$128/位；星期五至日、公眾假期及前夕 成人$298/位、小童$148/位，另設加一

熊本燒肉
地址：銅鑼灣謝斐道477-481號3樓

文：Joy