3月份好評餐廳十強
2019-04-09

嚟到三月份嘅報榜,可以話係日本嘢嘅天下,十間入面有一半都係日式美食,包括浜燒、拉麵、pancake等等,氣勢好強!

第10位  緣屋 札幌元袓蝦湯拉麵(*新上榜)

 圖:koralaKikivicki

拉麵幾時都係香港人嘅飛佛。呢間嚟自北海道札幌嘅拉麵店,主打香濃蝦湯底。使用嘅蝦頭同蝦湯都係日本直送過嚟,甜蝦頭就會再喺店內烤焗,所以更覺鮮香。香港其他拉麵店多數都係豬骨湯底為主,咁有風味嘅蝦湯拉麵自然容易上位啦。

第9位  釜之魂釜飯專門店

 圖:SAlytskyred0414

九龍灣呢間釜飯店再度上榜,招牌鰻魚飯幾時都係佢哋嘅招徠,又大份又香口嘛。煮飯嘅高湯用上北海道羅臼昆布、鹿兒島鰹節等熬成,有鮮味。餐廳設有半開放式廚房,客人可以睇到特製蒸鍋煮飯嘅過程,吸引度係又再高咗嘅。

第8位  漁獲浜燒(*新上榜)

 圖:mint_smoii相機食先

銅鑼灣間人氣浜燒店,去到尖咀開分店之人氣依然旺盛,仲馬上就打入十強榜。餐廳繼續提供由日本新鮮運到嘅海鮮畀客人可以慢慢燒嚟食,好似活帆立貝、鮑魚、生蠔、松葉蟹腳等。生蠔飽滿多肉,鮮甜,帆立貝同鮑魚入口彈牙鮮爽,海鮮控大愛。

第7位 刕舙馫麵館(*新上榜)

 圖:WongDaniel1471chebiko

位於紅磡嘅麵館小店,主力提供刀削麵同麻辣小菜。推介麻辣牛筋腩刀削麵,自家製麻辣醬香口惹味,麵條有咬口,而牛筋腩就整得好腍好入味。btw,想個舖名點讀可以查下字典啊。

第6位 浜燒太郎(*新上榜)

 圖:carykoflamyeeeee

第6位都係浜燒餐廳,呢間係喺將軍澳嘅,除咗燒海鮮之外,另外仲有多款刺身、壽司、串燒等,餐牌種類豐富。不過講到最吸引,應該點都係甲羅燒。蟹膏蟹肉再加鵪鶉蛋,一路燒一路已經聞到啲香味,食落就更加濃香。

第5位  冬蔭NOODLE(*新上榜)

 圖:Food Adventurerzackhung

香港有唔少泰國菜餐廳,但呢間特別在於以泰北農村口味做主打,佢哋都有傳統泰國菜食嘅,不過都係用咗新潮手法去處理啦。好似泰北牛船河咁,就以泰國新鮮香草加大量牛骨熬製而成,湯底濃郁鮮甜,鮮牛肉生熟度剛好,口感軟滑。

第4位  小黑糖(*新上榜)

 圖:eunice2046Wincyholic

估你唔到原來開到成行成巿嘅珍珠奶茶,依然繼續有大批擁躉。嚟自台灣嘅小黑糖,當然係主打黑糖珍珠,佢哋嘅珍珠口感煙韌,黑糖味香濃,兼且係每日手炒黑糖磚嘅添。配搭選擇多元化,珍珠唔一定要配奶茶嘅,配泰式奶茶、紫薯牛奶都一樣咁夾呀。

第3位  雞翼山

 圖:mandylau55ShanLi5129

人氣雞翼專門店今個月微微下跌2位,但仍然保持到三甲位置。佢哋幾款招牌雞翼,玫瑰味、鹹檸七、濃味三重芝士等你哋試過晒未先?嚟緊聽講會喺銅鑼灣開分店,港島嘅朋友以後想食就方便好多啦。

第2位  沐白小農(*新上榜)

 圖:emmimisswinzie

同樣係台灣過江龍嘅茶飲店,不過呢間嘅招牌就係SELL珍珠,而係大甲芋頭鮮奶,芋頭綿密香甜,好受芋控歡迎。而舖頭本身亦主打百分百純天然無添加嘅飲品,就算用糖,都係用全天然蔗糖或者黑糖,甜度唔會太高。

第1位  J.S. FOODIES

 圖:hkfoodeliciousPOTATO_C

今個月重新上榜嘅日式班戟店,仲要進佔榜首,狀態大勇。粉絲有跟開嘅應該都知佢同Flipper’s同屬一個集團,有傳統班戟亦有疏乎厘班戟食,仲好多款味道例如印度烤雞、原隻龍蝦等都係坊間少見,可以一試。班戟以外,餐廳亦有麵食等供應,咁多花款,唔怪得門口成日都要排長龍啦。


文:Kar

關鍵字
十強
排行榜
九龍塘
班戟
拉麵
珍珠奶茶
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24
10月份好評餐廳十強
2019-11-05