想搵個地方同朋友邊食邊傾，感受下韓劇入面熱鬧嘅氛圍？韓式居酒屋就啱晒你！今次精選咗幾間2025必去嘅韓式居酒屋，無論你想嘆正宗韓國味抑或打卡影靚相，都一定有啱你心水嘅選擇～
親切韓式小酒館 HANU 
餐廳走韓國傳統밥집(飯屋)路線，氛圍親切又溫馨，好有去咗韓國街角餐館嘅感覺。推介必試韓式生牛肉，牛肉切成幼條，拌埋麻油、醬油、辣椒醬同梨絲，肉質嫩滑又帶絲絲甜味，好清爽開胃；牛舌沙律經炭火烤香，配上帶微辣嘅韓式沙律汁，口感彈牙又惹味。韓式醬油蝦鹹香鮮味，係經典菜式之一。主菜就推薦韓式燉豬蹄菜包肉，啖啖肉好滿足，用生菜包住一齊食清爽解膩；釜山豬什豬骨湯平時好少見到，濃郁湯底加埋滿滿豬腸豬耳，夠晒滋補！
半開放式新派韓菜 DANJI
圖：高貴典雅嘅韓國fusion小店，木系餐桌配上華麗燈飾同精緻擺設，環境舒適又有氣氛，啱晒同朋友傾偈小聚。釜山炒年糕集合咗魚糕、紫菜粉絲卷同多款年糕，煙韌口感配上酸甜帶辣嘅秘製醬汁好開胃；蟹肉豆腐湯以鮮甜蟹肉配嫩滑豆腐同蔬菜，飲完暖笠笠～炸雞外皮脆到似薯片，內裡多汁嫩滑，微甜微辣嘅自家醬汁令人停唔到口；松露明太子卷蛋層次豐富，蛋香配鹹香魚子同松露好惹味。想輕鬆飲返杯，可以試荔枝味馬格利酒，香甜易入口，酒精濃度較低，慢慢嘆特別chill。
高級韓式居酒屋 Surasang 수라상 
圖: 高質韓式居酒屋，環境時尚有氣氛，坐低即送六款韓式小菜，而且真係任添唔嬲，當中辣醬生醃魷魚鹹鮮惹味，薯仔沙律加咗柚子更加清新。主食推介海膽紫菜包飯，用鮮甜海膽配三文魚籽鋪滿紫菜包飯，奢華又有層次；韓式辣泡菜牛肋骨上枱好有氣勢，濃香牛肋骨配酸辣泡菜平衡油膩；辣拌綜合魚生冷麵用六款高質魚生加冰凍微辣冷麵汁，夠晒清爽。小食方面，炸泡菜海鮮卷炸得酥香，柚子沙律醬中和咗炸物厚重感；海鮮煎餅好外脆而且蔥香突出，蜆肉、蠔、魷魚加埋小銀魚令海鮮味更濃～飲品可以試Real Fresh Lemon或Lime Slice Highball，酸甜清爽，配韓食好啱呀！
諾士佛臺氣氛之選 狎鷗亭居酒屋
圖：由韓國人主理，一入去就見到韓式壁畫，加埋暖黃燈光，氛圍真係好似置身首爾小館咁，座位寬敞，好適合一大班朋友開party。招牌推介涼拌豬仔腳，大大碟擺得整齊，皮爽肉嫩，配檸檬芥末醬酸香微辣又解膩；韓式八爪魚雞係一份有齊原隻炸八爪魚同蜜糖牛油炸雞，八爪魚彈牙香口，炸雞香脆多汁；烤花肉厚切多汁，牛味濃郁，配生菜、蒜片同麵豉醬包住食好正。最後可以嚟個湯，魚餅湯上枱係開住爐煮滾，魚餅、竹輪、金菇、蘿蔔等足料味鮮，暖胃又飽肚～飲品推介柚子檸檬麗塔，香甜帶酸仲有沙冰口感，清爽又解渴；韓國米酒就有細膩米香，清甜自然。
更多OpenRice詳細推介：
► 持續更新！ 2025生日優惠餐飲精選 送多款免費餐點 (按此)
► 2025最新糖水/甜品小店合集 首間日式芭菲專門店/手工芋泥杯/法式精緻甜品 (按此)
► 香港4大親民Fine Dining推介 必食紅蝦意粉/自家熟成牛扒/無敵海景 (按此)
文：Yanica
編：Cathy
