2021最新版!葵廣掃街攻略
2021-07-16

葵廣貴為掃街天堂,新店進駐嘅速度簡直有如火箭,追都追唔切。食到悶悶地想試下新意思,不如睇下今次開飯仔為大家搜羅2021至hit嘅小店畀大家,有大熱嘅牛角包窩夫、蜆肉粉絲專門店、足料漢堡及韓式飯卷等,快啲mark低咁就唔會走寶喇!


韓國大熱Croffle 酥酥

Croffle最近喺香港愈來愈流行,唔少咖啡店同甜品店都見到佢蹤影~Croffle即係用牛角包嘅材料製成窩夫,外層香脆、牛油味香濃。葵廣呢間專門店就主打唔同創意口味,必食有招牌焦糖燉蛋口味,窩夫放上一層焦糖燉蛋,多咗份蛋香,唔會太甜太膩。肉桂蘋果口味嘅肉桂味好香濃,加埋酸酸甜甜嘅蘋果更開胃,另外仲有忌廉曲奇、宇治金時同朱古力等十幾款口味,鍾意食甜品要試下 ~

圖: hkersfoodieUren


蜆肉粉絲專門店 煮你隻蜆

呢間店就獨沽一味只賣蜆,最正係可以追加配料,例如粉絲、金菇等同蜆一齊煮,咁樣蜆嘅鮮味就會滲晒入去粉絲,啖啖都係蜆味!而且粒粒蜆肉都好新鮮唔會有沙,味道方面惹味嘅清淡嘅都有,招牌原味爆蒜蒜味好突出,重口味之選。白酒牛油係另一人氣口味,有啲似日式清酒煮蜆咁,牛油味勁香,同蜆肉好夾!仲有愛辣人士必食嘅花椒麻辣、清淡番茄同近年爆HIT嘅芫荽口味。

香濃芫荽蜆肉(左為基本版,右為勁荽版)

花椒麻辣蜆肉配粉絲


超足料紫菜包飯 UNNIS韓國小食

喺葵廣韓國嘢選擇唔多,不過原來喺地下唔起眼位置有一間新開嘅韓國菜,餐廳由韓國人主理,食物選擇貴精不貴多,但款款都好有韓式家庭風味。最推係紫菜包飯,有四個口味,分別係原味、豬肉、牛肉同芝士,每份有大約10件,飯嘅軟硬度啱啱好,一入口就感受到麻油香,餡料有醃蘿蔔、紅蘿蔔絲、雞蛋絲、冬菇絲同青瓜,飯只有薄薄一層,超足料!炒年糕同韓式炒粉絲味道都好正宗,門口仲放咗一盒盒嘅手工泡菜畀大家買走,絕對可以安慰去唔到韓國旅行嘅大家!

圖: candylin0617甜妹頭


中西合璧甜品店 Chill Sweet

喺青衣開到嚟葵廣嘅超多元化甜品店,西式甜品同中式甜品都應有盡有,每一款都係招牌!首先係至啱打卡嘅爆漿蛋糕,有伯爵茶、泰式奶蓋、芝士奶蓋同阿華田脆脆口味,蛋糕鬆軟又唔會太甜,而且約$50就買到一個蛋糕,勁抵食!朱古力麻糬布朗尼內藏粒粒煙韌麻糬,又幾有咬口。不得不提係仲有一系列養顏甜品,如雪燕桃膠鮮奶同椰皇雪燕桃膠鮮奶,前者奶味香濃,後者多咗份椰皇香,加埋雪燕同桃膠口感更豐富,女士們啱晒!

伯爵茶爆醬蛋糕

椰皇雪燕桃膠鮮奶


熊本A5黑毛和牛漢堡 邦爺漢堡

標榜選用澳洲安格斯和牛同西班牙黑毛豬嘅高質漢堡店!不過最吸睛一定係Menu第一行嘅熊本A5黑毛和牛漢堡,麵包鬆軟,A5黑毛和牛煎得勁香,一入口就感受到牛嘅油花同香氣。另一人氣之選魚子醬鵝肝芝士安格斯漢堡,鹹香嘅日本魚子醬配上入口即溶嘅鵝肝同牛味濃郁嘅澳洲安格斯漢堡扒,成個burger好rich,每一啖都係享受。唔食牛嘅朋友都有好多選擇,好似黑松露軟殼蟹同芝士菠蘿黑毛豬等,連台式刈包都有得食添!

芝士黑毛豬拼煙肉菠蘿漢堡

韓式泡菜雞UFO




文:Yanica



關鍵字
葵涌廣場
葵廣
葵芳
韓國菜
漢堡
甜品
蛋糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06