2020亞洲50最佳餐廳 香港上榜餐廳一覽
2020-03-24

2020年「亞洲50最佳餐廳」完整名單揭盅!呢屆頒獎典禮因為新型肺炎疫情持續蔓延,因而取消原定喺日本佐賀舉辦嘅實體頒獎典禮,改為以現場「虛擬」形式進行。今年香港共有八間餐廳上榜,唔少餐廳名次躍進,甚至奪得中國最佳餐廳!
 

第2位 大班樓(↑)


上年得到最佳進步獎嘅大班樓再耀升9個名次,兼再下一城奪得「中國最佳餐廳」殊榮!依然係亞洲榜單中排名最高嘅中菜館,縱然近年都未有米芝蓮星級肯定,但佢哋兼具傳統同創新嘅工夫粵菜係唔少老饕嘅最愛。
 

第4位 Belon (↑)


去年最佳進步獎得主,今年嘅名次亦繼續飆升,首次進入10強。呢間新派法式餐館嘅行政總廚Daniel Calvert係香港現今最年輕嘅米芝蓮星級主廚,佢同團隊一直致力把食材、服務同技巧達至高水平,並不斷追求改進嘅精神相信亦係成功因素之一。
 

第12位 VEA Restaurant and Lounge (↑)


19年上榜後今年名次上次至12位,主打獨特嘅中法菜系,由行政總廚及合夥人之一 Vicky Cheng 掌舵,以現代法國菜烹調演繹中式食材,菜式令人驚豔。同時亦係一間結合美食同飲品嘅餐廳及酒廊概念店,酒廊供應16款分為甜、鹹、酸及烈四種味道嘅雞尾酒。
 

第19位 Neighborhood (↑)


位於中環Soho巷仔裡面嘅法式小餐館Neighborhood作風低調,由店主兼主廚David Lai主理,以當季食材,供應多元化嘅法國料理同各種歐洲傳統料理,海鮮菜式尤其出色。環境舒適氣氛熱鬧。
 

第25位 家全七福(↑)


由舊年初上榜嘅第44位大福耀升至25位!由擁有超過50年經營經驗嘅前福臨門主理人徐維均先生創辦,主打傳統正宗嘅高級粵菜。當年福臨門係城中名門舉辦豪華宴會嘅首選酒家,徐維均自行創辦嘅家全七福自然亦有水準。
 

第31位 Amber (↓)


中環Amber舊年翻新重開,環境煥然一新之餘,廚藝總監Richard Ekkebus亦致力研發新菜式,專注於帶出時令食材嘅純粹滋味。餐廳同時獲頒發「亞洲可持續性餐廳獎」,表揚Richard Ekkebus嚴格控制餐廳營運碳足跡嘅用心。
 

第32位 8½ Otto e Mezzo BOMBANA (↓)


意大利名廚Umberto Bombana嘅餐廳係亞洲50最佳餐廳嘅常客,但今年就跌出20強。餐廳以意大利著名導演費里尼嘅作品《八部半》為名,主打現代意大利菜,當然亦唔少得Umberto Bombana最為擅長嘅白松露菜式。
 

第33位 龍景軒(↑)


由舊年38位晉升至33位,係全球首間獲得米芝蓮三星榮譽嘅粵菜餐廳,由入廚超過四十年嘅香港行政總廚陳恩德主理。餐廳嘅海鮮菜式同精緻點心最受歡迎,保留傳統特色同時加以改良,水準穩定。
 


(左)Odette,(右)川江月

比較返上年嘅名單,Ta Vie跌出榜單。「亞洲最佳餐廳」連續兩年由位於新加坡,Julien Royer主理嘅Odette奪得,MUME亦連續兩年蟬聯「台灣最佳餐廳」。「最佳新上榜餐廳」就係由台灣名廚江振誠掌舵,澳門米芝蓮新二星餐廳嘅川江月奪得。
 


(左)主廚之選獎得主高田裕介,(右)La Cime

本屆「主廚之選獎」由位於大阪,主打日式現代法國料理La Cime嘅主廚高田裕介奪得,餐廳18年初次上榜就佔據第17位,成績亮眼,成功糅合時令日本食材同經典法式烹飪手法嘅主廚當然功不可沒。
 


(左)亞洲最佳糕點師奬得主庄司夏子,(右)Été


(左)亞洲最佳女廚師獎得主趙希淑,(右)Hansikgonggan

「亞洲最佳糕點師奬」就屬於東京廚師發辦法國菜餐廳Été嘅日籍糕點師庄司夏子,佢經常以經典時裝同手袋為蛋糕設計靈感,放入黑盒裡面就好似一件精緻嘅藝術品!而首爾餐廳韓食空間Hansikgonggan嘅主廚兼創立人趙希淑就獲頒發「亞洲最佳女廚師獎」,以表揚佢一直通過培訓、教育同指導以推動韓國料理發展嘅努力。
 

 

按此瀏覽2020「亞洲50最佳餐廳」完整名單

 

延伸閱讀 

《2019亞洲50最佳餐廳 》香港上榜名單
《2018亞洲50最佳餐廳 》香港上榜名單

《2018亞洲50最佳餐廳 》地區精選推介

《2017亞洲50最佳餐廳 》香港上榜名單
《2017亞洲50最佳餐廳 》地區精選推介
《2016亞洲50最佳餐廳 》香港上榜名單
《2015亞洲50最佳餐廳 》香港上榜名單



圖:Asia's 50 Best Restaurantsbageladdiction
文:Cathy

關鍵字
香港
亞洲50最佳餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】最後倒數!即將結業的老字號及人氣小店
2天前
【隨時更新】零食速報 每周新款零食、酒品點評
2天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
2天前
全城抗炎!喺屋企做大廚 懶人煮食包/套餐集合文
2020-04-02