2019年版!葵廣7間掃街推介
2019-10-16

掃街係唔少香港人都好喜愛嘅動作。未夠鐘食飯又掃一掃,食飽飽又要掃一掃,總之,行喺條街度見到一間間嘅小食店就會忍唔住,乜都想食!講到經典掃街地點,點可以冇葵廣?由底層行到上頂層,層層都有唔同嘢食,仲周不時低調地加入唔少新血,今次就整合返個2019年版畀大家啦!

火麻人

 圖﹕火麻人FB專頁

呢間舖頭主打嘅冰粉,有啲似涼粉,係重慶四川嘅小食,食落超透心涼。最創新嘅係佢哋加入唔同口味,有阿華田、水蜜桃等十幾隻味,夠晒破格!舖頭兼賣其他麻辣嘢,食完食返碗冰粉可以解辣。

閃電雞撈

 圖﹕閃電雞撈FB專頁

掃街都有雞煲食!?冇錯!呢間舖就可以滿足到你任性嘅要求啦!佢哋嘅雞煲醬撈麵,配埋雞髀肉、大量芫荽同蒜,味道香濃,爭啲以為自己食緊真·雞煲呀~ 想豐富啲嘅仲可以叫返個四寶撈,花膠、雲耳、芋絲、雞脾肉通通有齊。每日限量發售50碗咋。

刈Bao台式創意小食

 圖:kayleypokimafanyau_hk

食得多鹽酥雞、台灣香腸,有時都想試下其他台灣小食?刈包啱唔啱?呢間舖頭嘅刈包夾住厚厚嘅豬腩肉,配上菜脯、酸蘿蔔等,食落唔會覺太膩~仲有白飯魚、杏鮑菇等唔同嘅口味揀呀!

墨西哥卷專門店

圖﹕kookikiCASERYUS

唔好以為葵廣港味濃,就只有港式小食食呀,其實都好international啦。呢間都開咗一段時間嘅墨西哥卷舖頭,可以自選配料同汁醬,想食得邪惡可以揀牛肉、煙肉片,想食得健康啲,就可以試下牛油果沙律素食卷~

民族風味

圖﹕christinayupuiyingKikivicki

想Keep住異國風情嘅,仲有呢間土耳其外賣店~大大份嘅「轉轉燒雞肉卷」,即叫即切,裡面包滿雞肉、蕃茄、生菜等,加埋甜甜地嘅沙律醬,咬落去嗰下真係要小心啲,一個唔小心好易會跌晒啲料出嚟啊!

泰讚了

圖﹕fafakakawhsmith

呢間舖頭主打泰式飲品,當中最受歡迎嘅泰式奶茶,使用泰國茶葉,加入泰國嘅香料,飲落特別甜。佢哋仲提供沙冰、椰奶等,仲有泰劇中常見嘅粉紅凍奶,回頭率極高~

我是珍奶狗

圖﹕foodiettfat pooh

各位珍奶狗要注意啦,想試下唔同口味嘅珍奶,不妨嚟呢間舖頭睇下有冇心水啦!呢間飲品舖選擇多元化,無論係酸奶、珍珠、芋圓、芝士奶蓋定係鮮果茶都有,口味仲要包羅萬有,牛油果配波霸又得,榴槤配酸奶又得,好多新奇配搭啊。

文﹕Kiko


關鍵字
葵芳
葵廣
掃街
四川菜
雞煲
墨西哥卷
土耳其
泰式奶茶
珍珠奶茶
掃街熱點
香港各區都暗藏不少掃街熱點,開飯仔就為大家逐區發掘,分享掃街文化。
餐廳資料
更多
收起
本月熱門
【隨時更新】零食速報 每周新款零食、酒品點評
5天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【隨時更新】最後倒數!即將結業的老字號及人氣小店
1天前
2月份好評餐廳十強
2020-03-05