2019亞洲50最佳餐廳 香港上榜餐廳一覽
2019-03-27

2019年「亞洲50最佳餐廳」完整名單新鮮出爐!今年有9間香港餐廳上榜,數目同去年一樣,不過餐廳就有變動。當中有兩間係首次上榜,亦有最佳進步獎、同待客藝術獎得主!
 

 
第11位 大班樓(↑)


上年得到最佳進步獎嘅大班樓再耀升11個名次,成為香港地區當中名次最高,亦係亞洲榜單中排名最高嘅中菜館!特點係採用最優質新鮮嘅食材,甚至喺上水有自己嘅農場種有機瓜菜。加上自製醬汁同合宜嘅烹調手法,招牌菜雞油花雕蒸花蟹配陳村粉正是代表之一。
 

第12位 8½ Otto e Mezzo BOMBANA (↑)


無論係米芝蓮定係50最佳餐廳,意大利名廚Umberto Bombana嘅餐廳都幾乎榜上有名。餐廳已經連續七年躋身亞洲50最佳餐廳20強,主打現代意大利菜。Umberto Bombana既有白松露之王嘅美譽,餐廳嘅白松露菜式當然有水準保證。餐廳同時亦得到待客藝術獎,獲評審委員會大讚服務無微不至。
 

第15位 Belon (↑)


由去年新上榜嘅40位晉升至今年嘅15位,獲得最佳進步獎!行政總廚Daniel Calvert亦係香港當今最年輕嘅米芝蓮星級主廚。餐廳主打新派法國菜,招牌菜包括Daniel Calvert嘅代表作乳鴿酥皮,原隻烤走地雞配法式青豆,同法式千層酥。
 

第21位 Amber (↓)


雖然2017年佔據第3位兼成為當年中國最佳餐廳,但Amber嘅排名已經連續兩年下跌,今年更跌出20大。不過廚藝總監Richard Ekkebus大有來頭,師承米芝蓮星級大廚Hans Snijders及Robert Kranenborg,擅長以優質食材配合傳統法式烹調技術。餐廳現正裝修中,可以期待一下重開後能否重奪中國最佳之名!
 

第34位 VEA Restaurant and Lounge (新上榜)


2017年成為米芝蓮一星餐廳後,今年再次獲得亞洲50最佳餐廳評審認可,成為新上榜餐廳!一如其名糅合餐廳同酒廊概念,30樓嘅餐廳主打創意法國菜,唔少都加入亞洲元素,而且可以搭配雞尾酒或葡萄酒。而29樓嘅酒廊同樣將亞洲食材加喺雞尾酒當中,配以各款特色小食。
 

第37位 Neighborhood (↓)


主打法國同意大利菜,裝修簡約而舒適嘅小餐館Neighborhood,由曾任職米芝蓮二星法國餐廳Spoon by Alain Ducasse嘅香港主廚David Lai主理。因為採用時令食材,餐牌會每週甚至每日更換,菜式賣相及味道均有水準。
 

第38位 龍景軒(↓)


全球第一間米芝蓮三星粵菜餐廳,並連續10年獲得三星評級嘅龍景軒由經入廚超過四十年嘅香港行政總廚陳恩德主理,餐廳嘅海鮮菜式同精緻點心最受歡迎。好似名菜龍帶玉梨香就將蝦肉釀入帶子同啤梨嘅夾層中,配搭創新而層次豐富。
 

第44位 家全七福(新上榜)


呢間新上榜粵菜館由前福臨門主理人徐維均先生創辦,香港總店2017年入選米芝蓮,上海靜安店更連續三年獲得米芝蓮一星肯定。徐維均自細就跟爸爸,即係福臨門酒家始創人徐福全學藝,擅長各式高級功夫粵菜,推介菜式包括家傳秘方紅燒乳豬、七福脆皮雞、七福鮮蝦餃等。
 

第50位 Ta Vie(↓)

主打精緻法日菜,由天空龍吟日本料理創辦總廚山本征治先生徒弟佐藤秀明主理嘅呢間餐廳今年跌至50位。餐廳名法文意思為「您的人生」,日文則指「旅程」。想完整感受呢個美食之旅嘅話,建議點八道菜嘅Tasting Menu。
 


(左)Odette主廚Julien Royer,(右)Odette

比較返上年嘅名單,日式居酒屋Ronin同法國菜餐廳Caprice雙雙跌出榜單。亞洲最佳餐廳就由Julien Royer主理,新加坡嘅Odette成功擊敗之前連續四年奪冠嘅Gaggan得到。有消息指Julien Royer 6月將會喺PMQ元創方開設新餐廳Louise!
 


(左)MUME,(右)Den

台灣最佳餐廳亦由去年嘅Raw轉為今年晉升至第7位嘅MUME。東京嘅Den就「冧莊」榮獲日本最佳餐廳,曼谷嘅Gaa唔單止係最佳新餐廳,主廚Garima Arora亦成為本年度亞洲最佳女廚師獎得主。

 

按此瀏覽2019「亞洲50最佳餐廳」完整名單

 

延伸閱讀 

《2018亞洲50最佳餐廳 》香港上榜名單
《2018亞洲50最佳餐廳 》地區精選推介

《2017亞洲50最佳餐廳 》香港上榜名單
《2017亞洲50最佳餐廳 》地區精選推介
《2016亞洲50最佳餐廳 》香港上榜名單
《2015亞洲50最佳餐廳 》香港上榜名單



圖:Asia's 50 Best Restaurants
文:Cathy

關鍵字
香港
亞洲50最佳餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11