2月份好評餐廳十強
2018-03-09

2月份又農曆新年又情人節,有冇影響到今個月嘅好評十強呢?今個月的確係多咗甜品店同火鍋上榜,講個小秘密俾大家知,情人節前後火鍋店係特別多人幫襯架,貼地都可以好浪漫!即刻同大家睇睇2月又有咩餐廳打入十大先!


第10位 宇治園 (*新上榜)

抹茶不死似乎係不爭嘅事實,雖然專門店越開越多,但仍然無損港人對抹茶嘅熱愛!呢間同樣來自京都宇治,而且都係百年老店,主打深蒸煎茶同淺火焙茶。必吃香港分店限定嘅抹茶及焙茶芭菲,亦有啫喱、Tiramisu、甜湯、生茶麵食等,飲品亦有多款選擇。

圖:YanSimineddie_ilovefood777


第9位 桃園眷村

上月嘅第1位跌到第9,不過仍然不乏捧場客。今次介紹吓其他特色食品,好似用糙米同花生煮成嘅米漿,杰身如花生糊,味道帶果仁香。鹹豆花有菜甫、蝦米、脆油條等配料,加埋嫩滑豆腐一齊食,微微辣都幾鹹香。舖頭小小但有唔少選擇,食多幾次都唔厭呀。

圖:hihi1234567890霖迪


第8位 炊豕店

豬扒小店繼續留守十強,期間限定嘅避風塘豬扒果然好受歡迎,不過賣到10/3咋!俾少少貼士大家,最好加隻煎蛋,蛋漿撈埋豬扒更加香滑,冇得輸,想有唔同食法,加多幾蚊可以配咖喱汁或者肉燥汁,用嚟撈飯係一絕嘅。

圖:VoraciousHappy_meal123


第7位 餃子縣餃子專門店 (*新上榜)

其實呢間餃子專門店並非首次入榜,今次係新開嘅西灣河分店。餃子款式多而且難得地每一款味道都唔錯,芝士餃系列有番茄、黑松露、辛辣同三重芝士,而且仲可以每款一隻試唔同味。食得辣嘅記得要落麻辣菜甫或者配酸辣湯底,更加惹味!

圖:3狗窩阿包keithkkku


第6位 愛甜心甜品 (*新上榜)

新開甜品唔係西式就係抹茶,終於都有港式甜品入圍喇!呢間小店憑住一道自家製西米圓打響名堂,以西米皮包住綠豆蓉或芋頭蓉,凍食包住麥提莎朱古力,好有創意!西米皮煙韌軟糯,加埋椰汁好香甜。芒果甜品、布甸類及中式糖水都有質素,值得支持呀。

圖:Princess637Yourlike


第5位 駿景軒

連續3年奪米芝蓮嘅川粵菜館,今年第二次入榜微跌兩級,果然有實力!每枱必點杏汁燉白肺湯,奶白色嘅湯杏仁香氣突出,但唔過搶,豬肺腍滑。川菜以外,小菜如照燒黑松露野菌安格斯牛柳粒、菠蘿咕嚕肉及黑醋珠蟹肉帶子炒鮮奶等都係招牌作。

圖:keithkkkufood.ooh.yeah


第4位 同仁四季音樂主題餐廳 (*新上榜)

上個月天氣飄忽,凍起上嚟最好就係打邊爐!呢間火鍋店主打椰子雞煲,用上4個椰青同1個椰皇做湯底,完全無添加,淥完雞件好清甜,雞肉亦嫩滑。海鮮夠新鮮、自家製配料足料,必吃蟹黃甘香嘅生拆蟹皇丸,每日都有獨立音樂人現場獻唱,都幾有feel。

圖:CHI CHI YANSweetdiegrandpa


第3位 重慶劉一手火鍋店 (*新上榜)

早排好多麻辣火鍋開業,呢一間有蔡瀾加持,更係重慶火鍋十大品牌,全球有過千間分店,非常架勢!九宮格湯底濃郁夠麻香,一層鮮紅色滾油浮面,辣度十足。唔食辣仲有香港獨有嘅龍蝦湯底、番茄湯底等,內臟如鵝腸、毛肚、鴨血都係必吃,少見嘅腸灌豬紅係個人推介。

圖:mj712orangetang813


第2位 i CREMERiA Café (*新上榜)

第2位又係甜品店!今次輪到以軟雪糕起家嘅i CREMERiA,雖然開業咗一段時間,不過不時推出新出品,賣相搶眼又呃like!旺角分店餐牌選擇更加豐富,tea set有六款甜品,有招牌雪糕、白玉、三文治、蛋糕及生果,味道剛好唔過甜。

圖:ma garconewmy


第1位 日悅極尚日式放題 (*新上榜)

放題一向都好受歡迎,不過質素參差,難得呢間新開嘅放題,食物款式多,自助區似足buffet咁大堆頭,有原隻乳豬、海鮮、沙律等任拎。魚生新鮮、燒物及炸物都出色,仲有Movenpick雪糕任食清酒任飲,價錢由$258起食足兩個半鐘,都算抵食!

圖:iameatproduct小東



文:Perrins

關鍵字
十強
排行榜
放題
火鍋
麻辣
川菜
甜品
餃子
抹茶
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
7天前
有平有貴 情人節餐各級價格攻略
2020-02-04