抗疫期間，唔少餐廳都紛紛推出優惠救市。好似天后老字號中菜廳咁就新推出呢個「晚市三寶」優惠，$128就可以食到原隻片皮鴨，連清蒸沙巴龍躉同冬瓜盅都有優惠。另外最近仲新出咗幾款特色點心同小菜添！
原隻片皮鴨(優惠價$128)
片皮鴨一向都係港人心目中嘅人氣京川滬菜式，喺出面食都幾百蚊一隻，而呢度只係$128就食到全隻，兩個人可以叫半隻$78，真係抵到爛！片皮鴨皮脆肉香，包埋皮一啖食真係好滿足～
清蒸沙巴龍躉、冬瓜盅(優惠價$88)
清蒸沙巴龍躉同冬瓜盅都只係$88，沙巴龍躉蒸得啱啱好，魚肉嫩滑；而冬瓜盅入面都有好多料，夏天食就最消暑喇。
另外餐廳都推出咗幾款創意新點心，包括避風塘蝦餃，將蝦餃炸過後口感香脆，帶香濃避風塘辣味，好惹味。蝦芝戀加入芝士，熱辣辣最正！洛神花素餃都皮薄餡靚㗎。
仲有兩款新嘅小菜，分別係柚池魚林及瓜芝金球，即係柚子汁炸魚塊同南瓜芝士汁琵琶豆腐～咁多新選擇同優惠，帶埋屋企人去食就啱晒喇。
地址: 天后電氣道22-52號金殿大廈1樓
文: Yanica
相、片: Calvin Kwok