12月份好評餐廳十強

相關餐廳:好燒式串燒專門店 ( 港式 ) 及其他9間餐廳
9
JAN 17
34632 0

12月聖誕佳節剛過,大家去咗邊度搵「好西」?開飯仔唔直接答你,開飯仔用12月嘅10強榜答你。10強入面有7間新上榜,當中最啱Gathering嘅西餐同香港人幾時都咁鐘意嘅日本菜平分秋色。不過得到2016年最後一個冠軍寶座嘅,唔係抹茶亦唔係紫薯,而係新晉嘅龍蝦包!
 

第10位 好燒式串燒專門店(*新上榜)

旺角呢間串燒店厲害之處有二:一,串燒選擇多元化,由肉類、海鮮、蔬菜等食材,到原味、蜜糖、孜然粉、辣粉等調味,辣味甚至仲有得揀小辣到大辣,最啱鐘意「有得揀你至係老闆」嘅香港人。二,除咗串燒出色,餐廳嘅意粉同小食都相當有板有眼,皆因廚師係酒店出身,一間舖頭可以滿足幾個願望,CP值甚高。


圖:相機食先
 

第9位 Starry Night(*新上榜)

聽到個名咁浪漫,相信你都估到大角咀呢間餐廳係食好西...餐嘅。食肉獸必試重量級1公斤美國牛肋眼扒,唔單止分量夠大咁簡單,而且食落特別Juicy,肉味濃郁。怕食唔哂嘅話,澳洲5星鮮嫩羊架同9安士美國西冷扒都係推介。另外呢度仲有手工啤酒供應,嗌返碟香腸拼盤或者滋味水牛香辣雞翼送啤酒,爽歪歪。


圖:Bob Tsang
 

第8位 The BASE

呢間觀塘工廈西餐廳繼9月之後再次登上10強榜,相信應該係同唔少人同朋友一齊嚟食聖誕大餐有關喇。因為佢地嘅菜式非常用心又有新意,例如小食炸蝦肉釀雞翼珍寶珠就係將雞翼先去一條骨,釀入蝦肉再炸至金黃香脆,方便食之餘又過癮。三層芝士大啡菇堡貨真價實有三隻Juicy大啡菇,中間仲有半融芝士同太陽蛋,邪惡惹味。


圖:<IVY>小詩...
 

第7位 味道樂居酒屋

長沙灣呢間日式居酒屋亦係再次上榜,最出名而且賣相最呃Like嘅原條成田醬炭火燒鰻魚飯同味道樂特選九品料理當然繼續受到唔少食客追捧,前者鰻魚外焦香內軟綿,炭燒風味配埋鰻魚汁就最啱送飯;後者用木架奉上二人份各式小食同迷你丼飯,精緻得嚟又滿足到試多幾樣嘅心態。佢地嘅燒物亦相當好味。


圖:MelodyWong5016mjqueen7e
 

第6位 琥酌

能夠成為11月榜上唯一留低嘅餐廳,太子呢間日本餐廳靠嘅當然係人氣吉列牛啦!無論你揀高級嘅日本A5和牛,又或者價錢比較相宜嘅美國安格斯牛肉,套餐裡面都包哂漬物、溫泉玉子、赤味噌湯、珍珠米飯、椰菜絲、特選調料等,當然仲有主角吉列牛同燒爐,三成熟嘅吉列牛自己再燒到理想嘅熟度,無論唔點任何醬料,定加溫泉玉子配飯食都一樣咁夾。


圖:sukichoy0921
 

 第5位  宮葉 パフェ(*新上榜)

早排大受歡迎嘅太子抹茶芭菲店終於上榜,個個去到最關注嘅當然就係佢嘅日式精選乳酪芭菲,一杯有齊晒抹茶乳酪雪糕、厥餠、桃肉同火龍果等等,係吸引嘅。但佢嘅正餐都唔弱呀,照燒鰻魚炸蝦丼同日式豬扒拉麵之類都叫得過呀。


圖:Sumfoodsilverthoughts

第4位  K2 Kitchen(*新上榜)

觀塘嘅工廈餐廳輪流上榜,今次輪到呢間食西餐同慢煮食物嘅餐廳。必須要介紹下佢嘅香芒鮮果蝦沙律配青檸泡沫,作為前菜相當稱職,由哈蜜瓜、菠蘿、火龍果等等酸酸甜甜嘅生果合製好開胃,仲有面頭堆到高一高嘅青檸泡沫,睇得又食得。另外慢煮牛肋骨腍得嚟都好有牛味,畫碟仲好鬼靚!


圖:JoannaxdFoodcaptain.hk

第3位  浜滝(*新上榜)

去九龍城唔食泰菜可以食呢間新上榜嘅日本菜呀,主打拉麵同小食,其中熱石拉麵都幾值得一試。每碗都有塊黑色嘅熱石,用嚟保溫㗎,令到每碗麵一路食都一路可以保持熱度,特別天口凍嗰陣食真係幾正。喜歡重口少少嘅朋友可以試黑蒜湯底呀,自家製㗎,味道幾濃下,拉麵索咗啲湯之後仲更加香口彈牙!


圖:uniEATsity

第2位 三多炸肶(*新上榜)

呢間小食店嘅分店愈開愈多,今次入圍嘅就係旺角分店。炸雞脾做到外皮脆卜卜而內裡雞肉依然保留到嫩滑嘅口感,仲有夠juicy嘅雞汁,係抵佢上榜嘅。舖頭仲有魚蛋燒賣、薯條、腸粉,沙嗲豬頸肉撈公仔麵等等嘅小食,唔係淨係一味食雞㗎!


圖:chongjacky阿啦

第1位  Hungry Lobster(*新上榜)

12月嘅榜首位置係屬於大熱嘅龍蝦包餐廳,麵包軟熟而龍蝦肉鮮甜,仲有特濃龍蝦汁點添,冇得輸。全舖仲有好多龍蝦嘢食,包括龍蝦意粉、炸龍蝦餅、法式龍蝦湯等等,完全可以豪食一餐龍蝦宴呀!


圖:Beanie Foodie細 i




文:Kar、Cathy


隨時接收最新資訊
讚好OpenRice專頁!

相片
上年大熱嘅芝士撻,最近好似沉寂咗,不過,嚟緊可能又會再次掀起一輪排隊潮!事關有人氣芝士撻專門店會喺觀塘開分店,...
相片
要推薦一間中式素食店,六和必定名列前茅。去傳統齋舖吃飯,通常是想尋回一些經典味道,不過有時菜式過於油膩,又或者...
unknown
文章搜尋
更多
年份
推介文章
說起吃漢堡,小時候的記憶就是麥當當的漢堡,再長大一點就是摩斯跟漢堡王了,到了今天,漢堡包的款式愈來愈多,這就是我們愛去吃不同漢堡的原因,因為每一家漢堡都有它們家獨特之處咧! 更多
過去熱門文章
在青衣小島一個屋苑的平台內,開設的全是平價茶餐廳或小餐店,唯獨有一間以藍白為主調,裝修感覺高尚的餐廳。這使它雖然位於角落,卻仍然很突出,就好似漆黑中的螢火蟲一樣,咁鮮明,咁出眾。 更多
Top