12月份好評餐廳十強
2023-01-10

嚟到2022年最後一個月,大家似乎都傾向要食好啲,燒肉、居酒屋、靚裝法國菜等統統上榜,有別於過往幾個月由地方小店佔多數嘅局面。

第10位  牛站(駅)麻辣火鍋放題(*新上榜) 

 圖:piggyfoodieinhklanna tsang

觀塘新開冇耐嘅麻辣火鍋放題,選擇多多價錢又抵,200零蚊已經可任食120分鐘,仲有美國SRF牛肩胛肉眼同埋澳洲M5和牛,迅速吸引咗唔少火鍋控去朝聖。自助區嘅小食同甜品都好有誠意,連羽衣甘藍、麻辣小龍蝦、醉豬手,甚至三色芋圓同軟雪糕等都有。鍋底梗係要揀麻辣,香料味重,想要多個清清地平衡下嘅,推介滋潤雪梨蘋果豬骨鍋。

第9位  上村牧場(*新上榜)    

 圖:搵食L*Foodopiahk

呢間日本品牌燒肉店,係日本嘅人氣店,開到過嚟香港當然繼續保持強勁氣勢,由特急列車運送嘢食到枱。主打鹿兒島自家牧場嘅薩摩牛,和牛五花嘅油脂最勁最香,和牛里肌則較有口感,特別少少嘅仲有棉花糖壽喜燒,食落甜甜地。除咗燒肉外,同時亦有壽司同拉麵等供應。

第8位 和藏(*新上榜)

 圖:imcindyhoMiss.Food

位於上環嘅日式居酒屋,走高貴型格路線,餐單設計亦見心思,除咗有龍蝦兩食、和牛三食外,就連卡邦尼都落重本,係五卵卡邦尼!集齊海膽、明太子、烏魚子、三文魚子同雞蛋於一身,吸睛得嚟味道又豐富。另外,酒鬼們唔好錯過呢度嘅清酒SET,一次過可以試到4款唔同果香同濃烈度嘅清酒,做埋food pairing都仲得。

第7位  本場     

 圖:foodiecouple_msLoree

上月第9位嘅日式燒肉放題能夠繼續守住10強,其中主要原因之一係放題最關鍵嘅上菜速度同埋準繩度,呢度都係廣得好評。4款燒肉放題套餐包括厚切豚肉、牛肩胛、極上牛小排海鮮同埋頂級澳洲和牛海鮮,有過百款食物選擇,牛小排油香十足,封門柳juicy多汁,牛舌配埋岩鹽就更加香口。最尾仲要有movenpick雪糕,絕對係滿足感MAX!

第6位 啖啖燕窩 

 圖:p_q2魚堅日記

冬天要滋潤啲,觀塘主打燕窩同其他養生甜品嘅燉品店,坐享天時之利,再度打入十強。招牌椰汁燉桃膠、蜂蜜3.6牛奶木瓜燉雪燕等都係滋潤之選。另外可以試下燉花膠奶凍呢個配搭,都幾夾架,陣陣奶香,口感爽滑。除咗滋潤養生嘅甜品,同時又有刺激嘅麻辣魷魚等小食,滿足埋間中想放肆一下嘅心。

第5位  新沙洞大排檔(*新上榜)

 圖:Voracious小女孩_

大角咀呢間韓國菜餐廳,係長沙灣新沙洞澡堂嘅姐妹店,同樣都花咗唔少心思喺裝修度。大角咀呢邊直情係神還原咗韓國巴士同地鐵站,打卡係必須的。食物方面,除咗招牌韓式炸雞外,記得要試埋醬油拼盤,有齊醬油蟹同醬油蝦,蟹膏鮮甜、蝦肉爽口,精髓係醬汁要嚟撈飯食,好入味架。

第4位  臺北棧(*新上榜)

 圖:langlang0404Agnestsm

去到呢間新派台菜,招牌牛肉麵就當然要試啦,但建議可以多試一兩款小食,因為款款都充滿心思同設計。例如以蛋餅為例,居然有款皮蛋肉鬆蛋餅,蛋皮煙靭,食落啖啖都有皮蛋,好鬼足料。仲有幾乎枱枱都會點嘅手工鳳梨酥麻糬蛋撻,三層分別係又滑又甜嘅蛋撻、煙煙韌韌嘅麻糬同香甜嘅鳳梨酥,層次極之豐富,不過都幾飽,最好share食。

第3位  Owens 

 圖:Eliza Yeung H.W.啊蛋

超近港鐵站嘅地理優勢,加上純白簡約木系裝修,令呢間Café小店長期保持人氣。炭燒美國安格斯肉眼牛扒煎到啱啱好5成熟,控制得幾好。牛味濃郁,又保存到肉汁。甜品係成餐嘅重點,伯爵麻糬蛋卷再搭多塊lotus焦糖餅真係冇得輸,蛋糕鬆軟,麻糬Q彈,食完好滿足。

第2位  川滿居(*新上榜)   

 圖:charlottelammyola_wong

冬天特別想食辣嘢,銅鑼灣呢間主打四川同京川菜嘅餐廳就啱晒咁多位辣椒仔女。金湯酸菜魚選用桂花魚製作,啖啖滑捋捋,但講到驚喜,鮮椒魚可能更勝一籌。鮮椒魚湯底用咗兩種辣椒煮成,香辣濃味過足癮。特別推介香辣魚皮,重點喺啲汁度,麻辣感重,入味到要啜埋啲汁。

第1位  Royal INN (*新上榜) 

 圖:wlskfoodieAMJL

12月係聖誕月,慶祝、聚餐當然就會揀間靚靚仔仔嘅餐廳。呢間走宮廷風,仲有(偽)法國凱旋門加水晶燈,自然成為約會首選。鮮波士頓龍蝦意大利飯夠晒吸睛,龍蝦肉彈牙鮮甜,粒粒意大利飯仲吸盡龍蝦湯嘅精華,味道濃郁。最特別嘅係有威靈頓羊架,酥皮鬆脆,中間仲夾住層薄薄地嘅巴拿馬火腿,羊肉肉汁留得住之餘,仲多重鹹香。

訂座優惠:每人消費滿$250即送白松露薯條或法式班戟一客 (即日起至3月3日) (按此)


文:Kar

關鍵字
十強
十強名單
報榜
尖沙咀
上環
銅鑼灣
太子
觀塘
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2023生日優惠】持續更新!2月壽星嘆免費薄餅/自助餐
1天前
【專訪】均香日賣300磅角仔 兩代老闆上陣 陪深水埗街坊走過40年
2023-01-11
【隨時更新】零食速報 每周新款零食、酒品點評
5天前
【兔年開飯】新春自助餐指南 早鳥優惠低至75折
2023-01-09
4大創意煲仔飯!日式鰻魚煲仔飯、火焰玫瑰肥牛煲仔飯
2023-01-05