12月份好評餐廳十強
2022-01-05

如果2020年係飲食業嘅寒冬,咁2021都算係初春嘅,有好多好多嘅新餐廳開業,香港人普遍嘅消費意慾亦高咗,捨得食咗,但同時都多咗撐小店。睇返2021年最後一個月嘅十強榜,當中不乏西、日料理,亦有各式各樣嘅小店。

第10位  微醺(*新上榜)

 圖:sharonsharonnLoyanyee929

12月係一個適合微醺嘅月份,喺節日氣氛下,同朋友/另一半飲返幾杯係幾有feel嘅,呢間設有互外座位嘅中環酒吧既有特色菜式,連cocktails都有創意過人,樣樣嘢都啱數,打入十強唔意外呀。推介可試香煎雞皮餃子配日式月見汁,用雞皮代替餃子皮,脆卜卜,送酒一流; 而奶樽裝住嘅唔係奶,係焙茶cocktail啊~

第9位  哥哥添飯•妹妹泡茶(*新上榜)

 圖:PPPUPUbee bee lee lee

台式餐廳總係有種吸引力,特別喺冇得飛嘅時間。紅燒牛肉麵等傳統台菜當然唔少得,但養生花雕鮑魚醉盤絕對值得一試,擺盤精緻,上層有醉鮑、蝦、溏心蛋,下層則有醉雞,款款入味。另外亦有多款台式小食,例如起司肉鬆蛋餅、大腸包小腸等。

第8位  蘇山雞飯

 圖:yummy.life.katjcpigpigzhu

唯一繼續留榜內嘅餐廳,主打星馬菜,唔少得叻沙摻摻同肉骨茶啦,叻沙摻摻居然仲係豪華版,有大大隻啖啖肉嘅龍蝦,叻沙椰汁味香濃;肉骨茶則偏重胡椒味,夠晒香口,飲完暖笠笠,搭配嘅獅城芽菜走地雞飯,雞肉嫩滑冇骨,油飯亦好香。

第7位  The BASE nature(*新上榜)   

 圖:Ms.NgMosleyHui

位於商場內,清新簡約嘅西餐廳,人氣旺盛,主打多款慢煮菜式。推介黑安格斯牛横腹扒,肉質細嫩仲好多汁,肉味濃郁,點配煙燻岩鹽、芥末子忌廉燒汁肉味就更突出;肉食獸另外可以選擇澳洲M級牛肉肉醬芝士漢堡或美國草飼牛肉芝士漢堡,大大份,好足料,多料到唔知由邊度開始食好。

訂座優惠:指定時段全單8折
餐飲券:特色精緻下午茶二人餐

第6位  Honbo(*新上榜)

 圖:Foodie gram98faiton513

被譽為「全球最佳漢堡」嘅呢間漢堡店,新店喺尖沙咀開咗冇耐,就極速打入十大。舖頭座位唔多,部分卡座更可有海景。漢堡選擇唔算多,主要都係牛肉、雞肉或素菜,食肉獸必揀The Gold Standard,呢個雙層4安士漢堡扒厚墩墩,帶油香兼保留到肉汁,夾埋煙肉片、芝士、洋蔥等,絕對畀到滿足嘅感覺你。

第5位  南越南咖啡廳(*新上榜) 

 圖:iloveeating802iamNICO

香港都有唔少越式餐廳,但好似呢間咁供應炸米粉、越式蛋啤酒同南越蛋咖啡嘅就真係少之又少。餐廳由知名主廚主理,品質有保證。炸米粉炸得香脆,淋上混入香茅同青檸葉等嘅湯,味道有驚喜;南越蛋咖啡有少少似焦糖燉蛋嘅feel,面層有層焦糖脆面嘅蛋醬,既可飲到焦糖嘅甜香,後段會滲出蛋香同咖啡香,口感仲好滑𠻹。

第4位  Wagyu Ya(*新上榜)

 圖:urfoodbuddiesFeivouriteFood

好似每個月都會有唔同嘅燒肉店上榜,呢個月輪到尖沙咀呢間主打JA鹿兒島直送和牛嘅日式燒肉店,和牛肉濃郁,係唔少牛魔王嘅至愛。除咗有得燒多款唔同部位外,亦有和牛小食,好似吉列和牛三文治同和牛肉眼海膽串,前者肉嫩油香,加埋薄脆麵包,口感豐富;後者直情係奢華享受啦,啖啖鮮甜甘香。

第3位  Nunu燒(*新上榜)

 圖:hkgirl_hkfoodCAROLCHUNG430

細細間居酒屋,但菜式選擇就有好多,各種日式料理,如刺身、壽司、石鍋飯等都有,晚巿時段更有Omakase呢。推介特選串燒盛盒,塩燒厚牛の舌滿滿口感,塩燒安格斯夠juicy,荔枝豚肉卷juicy到爆汁𠻹啊。另外,牛肉壽喜燒配飯亦係一個好選擇,牛肉嫩滑,湯底甜香。

第2位  紅伶飯店(*新上榜) 

 圖:food_fatjailaalaafood

經典潮州打冷老字號,人氣一直高企,重開後終於首次打入十強。12月有幾日特別凍,去食羊腩煲嘅人都多咗,呢度嘅羊腩煲非常足料,而且風味十足,最緊要係有羊肉香而冇羶味,食完成晚暖笠笠。另外去到必食煎蠔餅,勁多蠔,仲要粒粒都大大粒好飽滿,點埋魚露就更惹味。

第1位  The Third Bakery(*新上榜) 

 圖:pigfoodiexhkyummy.life.kat

呢間café喺環境方面先贏一仗,餐廳充滿藝術氣息,並以傳統酒壺嚟裝水。食物方面則行fusion路線,中西合璧又啱打卡。香煎龍蝦蝦米油虎蝦扁意粉值得一試,龍蝦鮮甜彈牙;就連班戟都可以龍蝦入饌,香煎龍蝦•龍蝦沙律班戟鹹甜有致,pancake邊微微脆口,估唔到又幾夾。同埋記得留肚食甜品,即焗牛角包窩夫榛子醬雪糕同即焗法式蘋果批雲呢拿雪糕,都有濃濃牛油香呢。


文:Kar

關鍵字
十強
十強名單
報榜
cafe
小店
中環
油麻地
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2021-12-22
【2022生日優惠】持續更新!1月壽星自助晚餐半價 嘆免費蛋糕/清酒
7天前
食完暖笠笠!冬天必食八大羊腩煲
2021-12-24
香脆鬆軟!精選香港6大牛角包
2022-01-06
【2021回顧】咖啡地圖!新開Cafe一覽 精品咖啡/朝啡晚酒/打卡店
2021-12-30