12月份好評餐廳十強
2021-01-05

晚巿堂食由12月10號起就開始被禁,一直禁到而家都未開得返,餐廳除咗開早啲,同轉型做外賣之外,都別無他法啊。喺艱難中,真係要靠質素先至可以留得住客啊。呢十間上榜餐廳都各有殺手鐧呢。

第10位  燒肉臻(*新上榜)   

 圖:Jennie.wstarrychow

日式燒肉店一向深受港人歡迎,今個月十強入面就佔咗兩個席位。呢間位於尖沙咀,有專人協助燒肉,店舖內亦設有自家熟成櫃,供應低溫熟成牛肉。識揀一定揀牛三角,油花平均,油香重仲帶甘甜。食得燒肉梗係想搵啲酒送送佢,呢度有自助清酒售賣機,有成18款清酒選擇,絕對係推送佢哋入十強嘅原因之一呀。

第9位  蜀客(*新上榜)  

 圖:車媽媽焦啤梨

冬天總係會想食下辣嘢,呢間主打正宗川菜嘅餐廳,碟碟都又麻又辣,但辣得有層次。好似鮮椒海鮮匯咁,有帶子有蝦有八爪魚等等,醬汁麻辣得嚟又帶酸,將海鮮嘅鮮味吊晒出嚟。酸菜桂魚亦唔可以睇少,魚肉鮮甜,但辣勁十足,辣椒仔女就最開心。

餐飲券:5折 正宗川菜套餐 (兩位用) (只限堂食)

第8位  Fifth Element Shokudo(*新上榜)    

 圖:Helenbobo39JasonMichelin

裝修簡約,水泥牆工業風嘅日式西餐廳,有多款丼飯供應,例如黑毛和牛牛扒丼,薄切粉嫩嘅和牛就鋪滿晒成個飯面,加多隻彈下彈下嘅青森溫泉玉子,當然吸引。牛肉半熟,肉汁juicy。呢度嘅pizza亦相當有特色,加入味噌製作,味道香濃,芝士控就要試五芝士要素味噌薄餅喇,鹹香突出。

第7位  WM Café & Bar(*新上榜)     

 圖:慕容有兒cyrus1818

有冇人同開飯仔一樣好鍾意坐露天座?除咗唞啖氣都爽啲之外,重點係有靚景呀。望住藍天同海景,再加埋青馬大橋又真係心情都舒暢啲。農夫包而家唔多地方搵到喇,嚟到可以試下,即叫即做,外層脆卜卜,入面熱辣辣,配咩餡都有風味。

第6位  My Ahjussi  

 圖:leetszhinxmelissalamx

上個月榜首嘅大角咀韓系咖啡店,今個月稍稍回落。炸雞夠脆口,係好多人嘅飛佛,呢度選用歐洲原隻燒春雞連骨炸,滑得嚟仲會留返多啲肉汁,港式鹹蛋黃味就最香口,想要新鮮感可以試下卡邦尼炸雞。

第5位  阿木台灣麵 (*新上榜)   

 圖:小李16求求其其食一餐

呢間主打台灣牛肉麵嘅小店,長期人氣高企,過往曾多次入圍十強榜,今次上榜嘅則係喺同區開設嘅新分店。不過並冇分薄到人流,依然要排隊等食。紅燒牛肉牛筋麵係必食嘅,湯底濃厚,牛肉份量十足,仲要勁厚身,厚得嚟又腍喎但係,肉味又香,推介。

第4位  KOKO Coffee Roaster

 圖:Cykmanhianna_banana

再度上榜嘅自家烘焙咖啡店,啡迷去到當然要慢慢嘆咖啡。嚟自Ethiopia嘅咖啡豆帶有酸酸der果香,餘韻強烈。另外推介牛油果大啡菇菠菜漢堡,幾款睇落冇乜關係嘅素菜放埋一齊又幾有化學作用,散發出各自嘅香甜,口感豐富。

第3位  享慢煮泰(*新上榜) 

 圖:littlefoodie00Chumug16

主打泰式fusion菜嘅餐廳,最出名都係佢哋嘅牛角包,尤其係將熱湯注入去嘅牛角包,好似冬蔭功龍蝦湯牛角包咁,一切開啲湯汁就流晒出嚟,視覺效果一流,酸辣香甜嘅味道都有啲,夠晒香口。另外推介真空慢煮法式焦糖燉蛋,口感creamy,食食下仲有啲甜甜嘅菠蘿蓉添。

第2位 燒鬼(*新上榜)    

 圖:sleepbeautyfoodiecouple_ms

呢間以日本鬼怪為主題日式燒肉店,成功以高質和牛燒肉放題吸引到大家嘅歡心。除咗多款牛、豬、雞肉同海鮮等可以任食外,仲會附送嚟自鹿兒島同宮崎嘅A4和牛拼盤,連罕見嘅牛腹脅肉都有得食呢,牛魔王有口福。自家製醬汁亦有特色,包括蘋果柚子紅酒燒汁、辣味噌醬同蔥油醬。

訂座優惠:指定時段,第二位可享有原價6折優惠

第1位  Mamaday Studio(*新上榜)    

 圖:yuehw_fishfoodxgoodwest_hk

大家對呢間餐廳一定唔會陌生,佢哋嘅尖沙咀店同銅鑼灣店亦曾多次上榜,今次終於輪到佐敦呢間啦。兩層樓高,室內室外都可以坐,打卡位多,仲有貓店長添。全部都係最受港人歡迎嘅café元素,難怪登到首位啦。留意返呢間café只係提供咖啡、餐飲同輕食,推介佢哋嘅bagel,外層酥脆,內裡煙韌,洋蔥藍莓嘅配搭亦夠特別。73.5%朱古力亦值得一試,口感超厚啊。

文:Kar

關鍵字
十強
報榜
十強名單
佐敦
銅鑼灣
西環
燒肉
cafe
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【牛年新春】盆滿砵滿 早鳥優惠盆菜推介
7天前
12月份好評餐廳十強
2021-01-05
觀塘海濱旁新開Cafe 必試「2019」咖啡+Tiramisu窩夫
2021-01-19
打卡必去!曼谷超人氣粉紅餐廳Lady Nara登陸尖沙咀 香港店限定龍蝦冬蔭意粉
2021-01-05
情人節愛意滿瀉 甜蜜蜜堂食/外賣下午茶推介
2021-01-11