12月份好評餐廳十強
2019-01-14

都真係必須要講句Time flies,咁就2019年喇。上年你哋做過啲咩?食過啲咩?新年立新志嘅同時,都做返個年尾回顧,睇一睇啱啱12月有邊幾間餐廳最後衝刺,打入十強。有好多間日本嘢呀,睇嚟大家返唔到鄉下嘅都要食住家鄉菜先~


第10位 滿屋日本料理(*新上榜)

香港食放題選擇咁多,呢間就成為今個月唯一上榜嘅日式放題店。除咗一般放題提供嘅刺身、壽司同炸物,有埋少見啲嘅朱古力噴泉、爆谷機同棉花糖機。另外仲有清酒、梅酒同啤酒任飲,甜品就有埋雪花冰食。

圖:stephanie Lo山姆氏


第9位  咕咾(*新上榜)

尖沙咀新式小食店,主打酥炸咕咾肉,炸皮酥脆,食落Juicy軟腍。特別之處係佢有唔同口味,如傳統啲嘅菠蘿咕咾醬、仲有蕃茄牛油果、金莎蛋黃、皮蛋紅薑同他他醬,想中又得西又得。怕熱氣仲有夏枯草同竹蔗茅根飲。

圖:foodiemoreNW Food stories


第8位 阿久根和牛立燒店(*新上榜)

唔止立食壽司而家連立食燒肉都有。由鼎爺個仔藝人李泳豪開設嘅日式燒肉店,賣點係以親民價享用日式燒肉。燒肉逐片收費,約十幾蚊就食到日本和牛啦!另外有A4同A5級優質黑毛和牛,由日本九州農場直送再由師傅巧手即叫即切,保證新鮮。

圖:技巧樹熊FuiNg


第7位 % Arabica (*新上榜)

咖啡係唔少上班族嘅必須品,呢間曾經佔據首位嘅京都咖啡過江龍又重回榜上。咖啡店主要供應濃縮咖啡,有Espresso、Macchiato、Latte同Americano四款,咖啡豆同全球其他分店一樣,帶果仁同可可味,而且有悠長嘅aftertaste。

圖:Monkey Hinalbeeyeung_


第6位  雲石小姐(*新上榜)

可以話係一間外表與味道並存嘅甜品店。招牌雲石蛋糕可以揀唔同味道,流心金沙黑朱古力味由純朱古力製成,金沙朱古力味道濃郁,流心效果澎湃。另外伯爵茶口味都係另一長期人氣之選。店內仲有好多花花比大家影相打卡。

圖:chriswongxxlHelenbobo39


第5位 菓甜品

呢間甜品店已經係第二個月上榜,仲一下躍升五位!招牌甜品芝士粟一燒像真度極高,淡淡粟米香配埋內層芝士蛋糕,好食之餘又啱哂打卡。

圖:BoBo_Chow926周圍食食食既為食妹


第4位  鮨廷(*新上榜)

立食壽司香港就比較少有,尖沙咀呢間立食壽司就夠哂日本風味。所有壽司師傅都會企喺食客面前即叫即整,價錢同區嚟講都唔算貴,難怪成日都大排長龍。

圖:silverthoughtscloudyblue


第3位  南瀛水產(*新上榜)

日本野一向都係港人至愛,而尖沙咀呢間日本野賣點就係多元化同新鮮,所以一上榜就登上三甲位置!餐廳有齊壽司、刺身、磯燒、鍋物同天婦羅,大部份食材都係日本直送,仲有創意卷物雲丹蟹肉卷同南瀛卷等。

圖:90後小胖妹nee.eat.play


第2位  金鶴拉麵

呢間拉麵店已經連續幾個月都人氣高企,今個月仲攀升到第二位。餐廳主打雞白湯拉麵,湯底以全雞熬足6個鐘,上枱前打入泡沫,幼滑鮮甜。另外唔少食客話活鰻蒲燒飯都值得一試。

圖:車媽媽


第1位  鼎·會館(*新上榜)

最近大家晚晚睇電視都見到鼎爺,可能唔少人都想試下鼎爺發辦嘅菜式,難怪一嚟就坐穩榜首!招牌菜式如阿爺巧手桑拿雞、阿爺蒸肉餅、秘製火焰叉燒、葱燒汁脆皮婆參、葱香梅菜皇燜和牛肋骨等都食得出好花心機,但記得要早啲訂位呀。

圖:heisfoodiarysohappy_hkg


文: Kar、Yanica



關鍵字
十強
排行榜
甜品
日式
拉麵
放題
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
楊明夥拍朋友開燉湯店 為都市人原盅燉無味精靚湯(有片)
2019-01-28
銅鑼灣燒肉店2、3月限定 任食日本A4黑毛和牛及燒蠔
2019-02-04
1月份好評餐廳十強
2019-02-11
20CM長MEGA版玉子燒!深水埗家庭式經營日式小食店
2019-01-23
快速慢食!Outback姊妹品牌登陸葵芳 和牛西冷、煙肉大爆炸芝牛肉漢堡
2019-02-01