11月份好評餐廳十強
2022-12-09

11月嘅十強榜內,有8間餐廳都係第1次上榜呢。當中不乏各區Cafe小店,近半更係設有唔少打卡位,輕輕鬆鬆就可影到張靚相。

第10位  INN - I’m Not Nothing 

 圖:Angel PongFredHon8

上個月第3位,今個月繼續有得留低。呢間café有唔少分店,但觀塘呢間絕對裝修最靚嘅一間,11月開始仲已經有聖誕裝飾喇。煙三文魚龍蝦汁全蛋闊麵鮮香濃味但唔會好鹹,麵條又掛汁。不過最令人想二刷嘅一定係佢哋嘅班戟,有好多款口味,例如芒果熱情果、藍莓紅豆抹茶等。

第9位  龍鳳呈祥火鍋雞煲 (*新上榜) 

 圖:Samtong123lamlamfoodie

天氣開始轉涼,又係時候食雞煲。尖沙咀呢間港式雞煲店,以香港七、八十年代為設計主題,成個感覺都好懷舊,但食嘅嘢又幾新潮。雞煲嚟講,秘製榴槤雞煲都算特別,小辣都好夠辣,辣得嚟又滲有榴槤味,甜甜地咁。榴槤控可以一試呀,仲要有榴槤肉架。除咗平時必食嘅肥牛,呢度有酒香陳年花雕浸牛肉都值得試,花雕香味會食下食下散出嚟。

第8位 僕之拉麵

 圖:Miwocmei1002

隔咗幾個月又再度上榜嘅拉麵小店,碗碗拉麵都有啲料到。最勁嗰碗當然係街知巷聞嘅肉愛食者拉麵,成個碗邊圍住晒一塊塊薄叉燒,豬骨濃湯味道濃郁,麵條亦掛湯。另外特選拉麵都唔嘢少,塊叉燒仲長過個碗,仲要用火槍燒過,帶微微焦香同油脂。

第7位  髀魔-雞髀第一店(*新上榜) 

 圖:lanna tsangtlhkitty

由西貢做到出太子一樣咁受歡迎,佢哋嘅雞髀大大隻,分分鐘仲大過你塊面。3款口味包括經典蜜糖、黃金鹹蛋,同埋麻辣口味,各有捧場客。炸完嘅雞髀脆卜卜,肉質嫩滑,難得係仲保持到肉汁。除咗雞髀,炸魷魚鬚同炸豆腐等炸物都相當吸引。

第6位  蘇山雞飯(*新上榜)

 圖:eatwith4feiporChoiwai Leung

都係位於太子嘅平民星馬菜,新加坡白胡椒排骨茶胡椒味較重,藥材味相對較輕,椒椒地幾好送飯。星洲龍蝦叻沙摻掺絕對係打卡菜式,有半隻龍蝦平躺喺個碗度好吸睛,而且味道幾香,加上價格相宜,回頭率高。

第5位  Dozy(*新上榜) 

 圖:Shinchan1993識飲識食又一天

深水埗可以話係近年嘅café天堂,有好多特色嘅café輪流登場。好似今次上榜嘅呢間則係復古工業風路線,打卡一流。餐廳主力供應西式輕食同蛋糕,好多嚟到嘅客人都會order慢煮香草雞扒牛油果醬意粉,係睇得出嘅creamy,每條意粉都有滿滿嘅牛油果醬,香味十足。另外推介蟹籽蟹肉配檸檬刁草醬三文治,啖啖蟹籽好滿足,惟一係要食得小心啲,唔好跌到瀉晒。

第4位 麻辣香鍋(*新上榜) 

 圖:BBSANDYAIPacific

嗜辣嘅朋友仔要搵機會嚟拜訪一下,師傅有廿年炮製川菜經驗,所以菜式嘅調味料都係自家製嘅,麻、香、辣等平衡得剛好。單係麻辣海鮮鍋,就已經用咗24款香料去秘製個醬汁,而且有齊蟹、海蝦、鮑魚同沙白等海鮮,好惹味。另外呢度仲有得食酸菜魚,超大盤,選用加州鱸魚,好嫩滑。

第3位  Peko Peko Eatery(*新上榜)    

 圖:Nei bbcyrus1818

太古分店開咗唔係好耐,咁快就上到榜,當然要歸功於餐廳嘅裝修同menu。裝修以日式木系為主調,部分卡位更整到好似入咗個洞穴度食嘢咁,既有私隱又啱打卡。推介即叫即烤嘅烤乳豬捲 中間捲埋茴香等香草,皮脆肉嫩層次仲好豐富。另一主菜香煎鵝肝牛柳亦係油香滿滿,啱晒食肉獸。

預付訂座:86折 日西Fusion木系精緻下午茶

第2位  Home A Day(*新上榜)  

 圖:PinkyeeyeeSweetYoghurt

上環呢間Cafe交通非常方便,港鐵站一出行幾步就到。粉紅色嘅牆身增添咗幾分少女感。好多枱客都會點選荷香蒜茸大蝦球蒸珍珠米,用木盒裝住嘅荷葉飯,係幾有風味嘅。珍珠米粒粒分明,滲有蒜香,仲好有fusion嘅感覺。香橙罌粟籽蛋糕作為甜品都幾啱數,又靚仔,又有大家鍾愛嘅芝士奶蓋元素,蛋糕鬆軟。

第1位  Mr. K Pizza N Chicken(*新上榜)    

 圖:kkaedeyankeewong0831

銅鑼灣登龍街唔係淨得拉麵嘅,而家仲有間韓國菜餐廳,睇個名就知嚟到一定要食炸雞同pizza。兩樣都可以揀雙拼,炸雞即叫即炸仲要起埋骨,脆得嚟中間仲有肉汁。Pizza有蜜糖批底又有黑糖批底,都係坊間少見,芝士控無懸念,一定揀海鮮狂熱芝加哥薄餅,趁熱食拉絲超勁,拉極都仲有咁好夠氣勢,芝士味好香,難怪奪得榜首位置。


文:Kar

關鍵字
十強
十強名單
報榜
銅鑼灣
太子
上環
觀塘
深水埗
cafe
拉麵
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
6天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18