11月份好評餐廳十強
2019-12-06

今年有好多外國嘅人氣餐廳登陸,以香港人又鍾意旅行又鍾意試新嘢嘅性格,呢啲過江龍餐廳十居其九都相當受歡迎,難怪11月份嘅十強榜內,佔咗4成都係嚟自日、韓、台嘅人氣店啊。

第10位  Dreamer Café(*新上榜)

 圖:pepesyllankiman6330

西環呢間追夢café,主力提供all day breakfast同埋蛋糕。All day breakfast不外乎都係炒蛋呀多士呀煙肉腸仔呀咁,呢度特別在於仲有款自家製嘅Earl Grey蘋果醬配多士,茶香突出,果味清甜。蛋糕款式則每日唔同。

第9位  豬手工房  

 圖:leetszhin小鞋子

想食豬手就要搵機會入嚟大圍呢間工廈食店試試啦,招牌脆爆鹹豬手,堅係脆爆,仲好大件下。而肉質仍然保持到鮮嫩,鹹鹹香香食到停唔到口。另外有多款香口小食,紫薯控就揀個燕麥紫薯餅啦,外脆內軟。

第8位  Top Blade Steak Lab

 圖:sataysauceDollyLing

薯條控嚟呢間就啱晒,薯條任食呀呢度,食完又可以再添,添完又可以再食……鋸扒方面,一係牛扒一係豬扒,黑桃black jack或者香草平鐵牛扒都各有風味,前者醬汁甜香,後者肉汁香濃,而豬鞍架亦相當嫩口。

第7位  牛大人台灣火鍋吃到飽(*新上榜)

 圖:Dee Shumburntpotato

能夠喺開業咁短時間內就打入十強,實力不容小覷。台式120分鐘任食火鍋,有9種湯底揀,全部都可以當湯咁飲!必試台灣經典鳳梨雞鍋,酸酸甜甜,特別適合女生呢。牛肉亦有多款選擇,安格斯、和牛等都可以任食!

第6位  Tardemah(*新上榜)

 圖:Soyi_lammmfoodiesspig

嚟自韓國嘅人氣烘焙麵包店,今年第4季度先至進駐香港,迅速上榜可見佢嘅受歡迎程度。佢哋嘅麵包鬆軟又足料,款式特別,坊間少見。推介黑麻麻嘅椰絲蕃薯方包,以墨汁製成,椰絲酥皮中夾住韓國蕃薯同忌廉芝士,甜中帶微鹹。

第5位  多賀野(*新上榜)

 圖:YanWingYanNgyumsik

來頭唔細嘅東京拉麵店,連續4年獲得東京米芝蓮推介㗎,登陸香港自然吸引到唔少拉麵控要朝聖拜訪,咁快就打入十強一啲都唔出奇。拉麵每日喺店內新鮮製作,煮法由日本老闆親自傳授,麵質煙韌,掛湯力強,仲有淡淡麥香。豚鴨沾麵亦值得一試。

第4位 Outdark(*新上榜) 

 圖:肥kafoodiecouple_ms

繼續都係過江龍上榜,第4位呢間係嚟自韓國濟州島嘅炸雞店,不過芝士肋骨鍋仲受歡迎過啲炸雞!睇住店員將啲芝士捲住豬肋骨,下下都拉到絲,芝士控流晒口水啦。炸雞都算多款,甜辣炸雞、香蒜蜜糖炸雞等等,脆卜卜,咬落仲有雞汁添。

第3位  麵麵

 圖:Happybbalan_lawkh

上個月第1位嘅麵麵,今個月微微回落,但依然守住三甲位置。主打雪白魚麵同手工魚麵,兩款都係每日製做。另外,小食都加入魚嘅元素,好似Nachos咁,粟米片就改咗做炸魚皮,照樣dip啲芝士醬牛油果醬咁,一樣香口。

第2位  磊犇  

 圖:phonebusmandychoi23

石燒牛嘅吸引力不減,大大件牛,自己鍾意點燒都得,生熟度同醬料濃度全部都可以自己控制,係自由嘅。三款選擇中最推介西冷,牛味最濃。白飯、麵豉湯、沙律,連飲品都係任食任飲,抵到一個點。

第1位  Mamaday(*新上榜)

 圖:judithkfollowmyfoodstep_

第一次上榜就拎第一,當然要歸功銅鑼灣本店做落嘅口碑。但新店自家嘅限定菜式亦都給咗唔少力。鹹蛋牛油果蟹肉pizza用料特別,鹹鹹香香仲有啲起沙;玉子豆腐豆漿蟹肉燉飯驚唔驚則以豆漿代替牛奶做燉飯,creamy得嚟又唔使怕好heavy。


文:Kar


關鍵字
十強
報榜
十強名單
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12