100%純素、素食自助餐、新派中式素菜通通有 五大跑素餐廳好推介
2020-01-30

冬季流感特別嚴重,加上武漢肺炎襲港,除咗戴口罩外,食得健康都係強身健體同增強免疫力嘅好方法。今次等開飯仔介紹六間素食餐廳畀大家,無論係純素餐廳、素食自助餐、私房菜、打卡咖啡店定新派中式素菜都有,健康之餘又唔怕食到悶,齊齊做Go Green大軍!


100%純素fusion菜 Pop Vegan   

位於中環蘇豪區嘅樓上素食fusion西餐,老闆創造出多款能夠打破大家對素食沉悶印象嘅創意素食。海膽天婦羅以Super food牛油果取替海膽口感,用海苔包裹後炸至酥脆,配合純素芥末蛋黃沙律醬或檸檬汁就更清爽。而Four Season Pizza以蕃茄、茄子、南瓜及朝鮮薊製成四色pizza,啱晒貪心嘅朋友食。


日式主打新派自助餐 素一

圖: Kylife與二寶之日常cojicoji8898

素食buffet當道,呢間餐廳除咗中式傳統素食,仲有日式區域供應各款素食壽司,有駐場壽司師傅即場製作,務求將壽司嘅味道做到最象真。三文魚壽司以蒟蒻代替魚生,味道同三文魚有八成似。親子花之戀就用海藻珠代替魚子,口感爽口,散發淡淡鮮味。繼銅鑼灣本店後餐廳開埋去深水埗,九龍區嘅開飯仔囡們唔使過海都有得食啦!


高質私房菜 素之樂創意蔬食料理

圖: mcwings411fififish

新年流流當然要圍埋一枱食飯先夠熱鬧!呢間私房菜供應素食套餐,如燉湯、三文魚壽司、沙嗲素肉串燒、白靈菇扒拌燒汁、鮮淮山少萵荀、泰色青咖喱及甜品蘋果批等,一班人去食就最合適啦!


自家製蛋糕CAFÉ  JOMO

呢間靚CAFÉ喺西環同將軍澳都有分店,主打幾款Vegan茶點同咖啡。招牌全素蘋果批有濃郁肉桂香,加上麥片增加香脆口感。連同自家製香濃椰子忌廉同焦糖醬一齊食層次更豐富。戚風蛋糕又係另一主打,味道有伯爵茶、黑芝麻及將軍澳店獨有嘅柚子味。想平衡口味食吓鹹點,可以考慮呢個自家製素食漢堡,漢堡肉用麵包糠、紅腰豆及雞心豆打成,像真度極高。


新派中式素菜 李好純   

「李氏餐廳」家族推出新概念素食餐廳「李好純」,餐單食物同時滿足到素食者、全素食者同彈性素食者。串串燻香以蘋果木煙燻杏鮑菇、冬菇和蘆筍串,煙燻味香濃;至於全素食者可以試試呢味滄海一粟,以芝麻汁拌新鮮萵筍絲、甘荀絲、黑木耳同藜麥配燒粟米,口感爽脆富層次。


文: Yanica

關鍵字
素食
健康
自助餐
中菜
咖啡店
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
6天前
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22