10月份好評餐廳十強
2022-11-04

嚟到10月嘅十強榜,繼續有好多新餐廳上榜,證明大家都係鍾意周圍發掘好西食。呢啲餐廳大部分都有個共通點,就係靚景或靚裝修,食物亦有新意。

第10位  Sour Dough

 圖:ueto_270joannecwtse

灣仔呢間主力共應烘焙包點嘅餐廳,繼續留守十強位置。湖水綠嘅門口好sharp醒,去到必試鮮果千層撻,有士多啤梨、藍莓、芒果等選擇,酥脆可口。周圍搵開心果產品嘅朋友仔則可試開心果吉士軟包,啖啖開心果醬仲有開心果碎,麵包口感軟綿,夠晒開心。

第9位  本場(*新上榜)   

 圖:餐廳提供

放題餐廳總唔少得,旺角呢間有幾款燒肉放題套餐,另可追加小食、甜品等,當中最多人揀嘅係極上牛小排海鮮放題,一個set就包咗成139樣嘢任食任飲,絕對係大滿足。牛頸脊油花香、肉味重;封門柳肉質柔軟又多肉汁,係牛魔王至愛。最驚喜係最尾仲有Movenpick雪糕呢~

第8位  十侍 - 棉花糖A5和牛壽喜燒專門店(*新上榜) 

 圖:eatisloveCAROLCHUNG430

呢度有燒物有串燒,不過嚟親最主要都係想試佢哋嘅棉花糖A5和牛壽喜燒。先放棉花糖落鍋,淋上醬汁後令到成個汁底變得甜甜地,再煮牛肉自然就沾上甜味。和牛薄切,口感柔軟,油花平均,點埋日本蘭王蛋漿,慢慢感受佢溶化同散發出嚟嘅牛香,層次豐富。

第7位  云手工火鍋店(*新上榜)     

 圖:Cherryan25gdpoint

位於酒店內嘅火鍋店,有多款手工湯底選擇包括松茸雞翅冬瓜魚鍋、火焰三椰雞鍋同花膠雞煲翅鍋等,全部都好足料,記得一煲滾就飲咗啲湯先淥嘢。肥牛海鮮嗰啲梗係唔少得啦,但想特別介紹下啲手打丸,坊間少見嘅配搭嚟,手打鹹蛋黃蝦丸,有鹹蛋釀咗喺中間架,另外仲有手打芝心牛丸,比起平時食開嘅芝士丸更惹味!

第6位  野川拉麵の深燒食堂(*新上榜) 

 圖:mochi_hkfood

元朗呢間日本菜餐廳,唔淨止拉麵嘅,仲有串燒、刺身同燒物等,非常多元化。有款「椰汁流心球」幾得意,即叫即炸出嚟,咬開係流心嘅,椰香十足。濃芝士焗大頭蝦都係推介,大蝦開邊後再鋪滿芝士喺上去拎去燒,好香口。至於拉麵,初次朝聖嘅可以試下自家製叉燒拉麵,塊叉燒肉香味濃。

第5位  一喜燒(*新上榜)    

 圖:嚐嚐 wiliamwildchildsjj

深水埗唔止有文青café,就連串燒店都係文青style 。四川風味嘅串燒,微辣香口,力推世一燒雞髀,叫得世一當然唔會令你失望。大大隻,雞皮又脆,仲好有肉汁。串燒以外,仲有啲啱麻辣仔嘅,例如錫紙麻辣大白蜆同麻辣牛丸等,前者蜆肉鮮甜,後者爽口濃味,最緊要係夠麻夠刺激!

第4位  吃扒

 圖:leetszhinmochi_hkfood

由第9位升上第4位嘅復古主題餐廳,由紫色嘅門口外牆到舖內嘅裝飾,每個角落都係打卡位。呢度主打鐵板扒餐,而幾乎每枱都會嗌熱熔芝士紐西蘭牛柳,或者加錢都要加個熱熔芝士,因為太有儀式感喇,喺你面前拎住個pan將芝士倒落啲牛扒度喎,又好睇又好食。另外,吃扒什扒都多人揀,因為咩豬雞牛扒咩都有嘛,加埋都係2嚿水左右,抵食。

第3位  INN - I’m Not Nothing(*新上榜) 

 圖:FredHon8Foodie Twin Stars

呢間café有唔少分店,其中觀塘呢間以宮廷為主題,有好多花花草草裝飾,又有室內同室外座位,係打卡勝地嚟。食物質素亦有水準,烤焗德國鹹豬手配燒菠蘿,豬手皮香脆,菠蘿又可中和膩感。記得留肚食班戟,士多啤梨紫薯爆谷班戟幾靚仔,仲有好多紫薯餡,甜甜地,連埋爆谷一齊食口感又豐富,值得一試。

第2位  Flames(*新上榜)   

 圖:melmelmikelvin21li

第2位都係觀塘嘅餐廳,呢間個景幾靚,望出去係海濱長廊同遊輪碼頭。香辣葡式燒春雞賣相吸引,雞肉入味有肉汁,重點係雞皮燒得夠脆。芝士控必點蟹肉巴馬臣芝士脆脆蕃茄忌廉汁通粉,望住勁creamy嘅長通粉係會有少少罪惡感,但啖啖芝士香味仲要有啲脆脆,都係食咗先算。

第1位  SOLO UDON ソロうどん(*新上榜)

 圖:nee.eat.playaa100027

榜首呢間烏冬店好啱自己一個去食都唔怕老尷,啲位全部一格格間晒板,完全係一人前料理格局。推介明太子溫泉蛋冷烏龍麵,麵質彈牙清爽,仲有好rich嘅明太子粒粒。另外要打卡又要餵個甜品胃嘅,草莓罐裝牛乳蛋糕唔錯,個樣幾靚,食落陣陣奶香。

文:Kar


關鍵字
十強
十強名單
報榜
旺角
觀塘
灣仔
銅鑼灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!5月壽星「天際」慶生+驚喜杯壽司
2024-05-04
【隨時更新】最後倒數!2024即將結業人氣/老字號餐廳
6天前
東京炭火現烤手工漢堡扒 100%日本牛肉製作 7/5登陸中環
2024-05-02
【2024新店精選】5月更新! 娛樂體驗主題酒吧、古蹟化身意大利餐廳
4天前
【隨時更新】零食速報 每周新款零食、酒品點評
2024-05-17