10月份好評餐廳十強
2019-11-05

最近有報道指10月份飲食業嘅整體生意額跌咗近5成,甚至有超過200間餐廳結業,可以話係飲食業嘅低潮。不過,同一時間,亦有唔少餐廳努力喺逆境中求存,並做出唔錯嘅成績,10月份嘅十強榜內,仲有唔少都係新開冇耐嘅餐廳,迅速獲得大眾支持啦。

第10位  Check-In Taipei   

 圖:emmieunice2046

8月上過榜嘅呢間台式餐廳出名多花臣,蛋餅餡料有新意,例如有冬蔭功龍蝦牛油果蛋餅、芋泥鹹蛋黃蛋餅同埋髒髒紫薯麻糬蛋餅等等,款款都好吸引。但最吸引嘅應該係參考台灣淡水鮮奶麻糬做法嘅奶奶麻糬,再自創多款口味,麻糬又滑又有奶香。

第9位  Top Blade Steak Lab(*新上榜)

 圖:vicki422933kicheuk

Menu上選擇唔多,就係勝在夠專,主打平鐵牛扒。美國390日穀飼牛,medium rare啱啱好,啲肉仲係粉紅色㗎,肉味香濃又有肉汁,仲好嫩滑;至於黑桃black jack嘅肉味相對較淡,但配埋以黑啡同焦香蜜桃製嘅醬汁,甜甜地又幾夾。重點係,薯條無限量添加任食呀!

第8位  鰻工房(*新上榜)

 圖:muisasaTM128

好多香港人都鍾意食鰻魚飯,難怪呢間鰻魚專門店一開,就迅速打入十強榜內。餐廳提供幾款鰻魚丼,全部即叫即燒,有原條上嘅,都有三重丼——一次過可以食晒穴子、白燒生鰻魚同蒲燒鰻魚三款,香口惹味。

第7位  壽司郎(*新上榜)

 圖:moritatintinmandyywong

呢間嚟自日本嘅迴轉壽司店,出晒名CP值高,開張以嚟幾乎日日都見人龍。除咗有傳統同創作壽司外,仲有啲係香港限定嘅壽司,選擇困難症朋友今次就頭痕喇。鍾意試新嘢嘅可以考慮麻辣赤蝦壽司,同埋芝士三文魚壽司,前者微辣,後者帶奶香,都幾過癮。

第6位 漫花燈火(*新上榜)  

 圖:IE食神俠侶Miss K.fly

嚟呢間餐廳打卡當然係重點,一入去已經好似穿過個萬花筒隧道咁,好鬼靚,相信淨係裝修同食物賣相都已經吸引咗唔少女生嚟影IG呃like相。而食物亦都好有心思,好似羽衣甘藍焦糖果仁話梅西瓜沙律咁,就將各種材料分別放喺個玻璃塔內,等客人自己撈,酸酸甜甜好開胃。

第5位  博多拉麵別天神(*新上榜)

 圖:b612andreaaafoodcritic65

呢間拉麵店喺香港都開咗一段時間,每日限量供應嘅蝦味噌豬骨湯麵好受食客歡迎,湯底加入蝦味噌,味道鮮香,仲有唔少櫻花蝦吊味。呢排幫襯,仲送RFID卡套,同埋可以拎張繪馬貼紙寫低心願貼上願望牆,好似日本神社外嘅祈願所咁。

第4位  龍門冰室(*新上榜)

 圖:tht_dawnDidtal 1992

講到呢期最紅嘅餐廳,一定有呢間份,幾區嘅分店日日夜夜都有條人龍喺門口。呢間充滿港式情懷嘅冰室,選擇比一般冰室多,仲有鐵板扒同海鮮食添。菜式傳統中帶創新思維,例如撈丁有各款好似奄列咁嘅玉子燒配搭,鹹牛肉芝士、黑松露芝士等味都相當受歡迎。

第3位  椰子日記

 圖:Monkey Sumfcbrosa

上個月榜首嘅椰子小店,今個月微微下跌兩位,依然保持三甲位置。打卡要靚靚嘅就梗係椰奶藍水晶,下層藍水晶係加入蝶豆花嘅啫喱,整體帶有椰香。另一碗大眾飛佛嘅係雜果芋圓椰凍,成個椰子面都係芒果、菠蘿同芋圓,要酸有酸要甜有甜,口感豐富。

第2位  鬼金棒(*新上榜)

 圖:soya1314Handsome XO

香港應該有好多辣椒仔女,個個聽到呢間嚟自東京嘅過江龍辣麻拉麵店開業都爭住要過嚟挑戰,神速登上第2位一啲都唔出奇。店內有25種配搭嘅麻辣拉麵選擇,當中有款仲用咗全世界最辣嘅卡羅萊納死神辣椒去製作添!順帶一提,芫荽怪記住點芫荽辣麻味噌拉麵,可以增量到成座山咁高㗎。

第1位 麵麵(*新上榜)

 圖:KwunLingfood_enthusiasthk

旺角呢間上樓小店,以魚麵做主打,雪白魚麵幼身啲,含魚肉多啲,食落脆口啲;手工魚麵就煙韌啲,兩款魚麵都每日製造,魚味突出。揀拌麵食又得,湯麵食又得,鍾意食魚嘅朋友仔記住bookmark低啦。

文:Kar

關鍵字
十強報榜
十強
旺角
銅鑼灣
紅磡
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01