10月份好評餐廳十強
2017-11-06

飲食潮流好容易喺各大社交媒體反映出嚟,最近有唔少網上大熱嘅餐廳,唔知大家去咗未呢?今個月嘅十強,都好睇得出facebook、IG對餐廳嘅影響力,有好幾間都係喺網上好hit嘅當紅餐廳,大家都要留意吓OpenRice嘅facebook,有唔少新資訊同餐廳介紹架。賣完廣告,立即睇睇今個月十強先:


第10位 八天堂 (*新上榜)

來自日本廣島嘅八天堂,有超過80年歷史,日本有20幾間分店,亦喺台灣、新加坡同韓國有海外分店。主打忌廉爆滿嘅忌廉包,自設工場每日新鮮製作,有紅豆、抹茶、吉士同朱古力等口味,不時會推出新味添。麵包鬆軟,忌廉餡有成50克,一咬爆餡,質感仲好幼滑。

圖:SuyiChan2035pancyy


第9位 花說 (*新上榜)

呢間café幾乎係為打卡而設,一室粉紅色再加埋霓虹燈、靚靚道具影相位,食物及飲品賣相都有心思,燈泡玻璃杯、富士山特飲,點都要餵飽相機先啦!食物質素都唔錯,份量十足,招牌菜有黑松露帶子意粉、柚子雞翼及全日早餐。溫馨提示餐廳相當爆滿,一定要打電話訂位先呀。

圖:852hkfoodSnappyinHK


第8位 湘蜀人家 (*新上榜)

川菜喺香港又有再hit返嘅趨勢,呢排都有好多四川菜館、麻辣火鍋、麵食店等出現,啱晒一眾嗜辣人士!呢間餐廳由四川師傅主理,堅持唔會遷就客人而減辣,辣子、水煮系列都係招牌菜。自製四川涼粉亦好受歡迎,加上蒜頭辣汁同吃,充滿地道風味。格局價錢中等,勝在食得舒服。

圖:Yan~*kawail_107


第7位 永年士多

令人又愛又恨嘅車仔麵名店,恨嘅係覺得以前好味啲嘅街坊,同埋永遠出現嘅長人龍;愛嘅唔使入元朗嘅朋友,而且辣汁真係好食嘅!蘿蔔清甜冇渣,豬紅滑溜唔會一夾就散,豬腸入味夠腍,加埋濃郁辣汁配油麵,直情係最佳comfort food。仲食得落的話,斑蘭咖央多士都可以一試。

圖:Lucas1212jenjenloveeating


第6位 撈喜 (*新上榜)

秋冬咁乾燥,最緊要補補,不如食花膠吸收吓骨膠原啦。筲箕灣東大街呢間小店,老闆係海味批發,可以用街坊價食到花膠,花膠較薄但都夠大隻,花膠撈麵可以揀唔同麵底同汁,新派啲可以揀黑松露,傳統就配上鮑汁。另仲有花膠燉湯、凍鮑魚等食物,係咪街坊都可以去試試。

圖:noodlesx3kawawong1026


第5位 2DP (*新上榜)

最近茶店好似搶咗咖啡店風頭,無論係台式茶、水果茶都好吃香,呢一間茶店仲兼賣素食,一室文青簡約裝潢,好吸引!西式素食有漢堡、素菜意粉同沙律等,係由營養師合作設計,有益兼且賣相靚,味道亦唔錯。甜品仲有茶壺型嘅鐵觀音青蘋果蛋糕同普洱榛子朱古力蛋糕添。

圖:foodiettWildchildcarol


第4位 鮨一日本料理

今個月連續上榜嘅餐廳唔多,佢係其中之一。日本菜始終都係長青,尤其是招牌千層海膽飯,140克海膽堆到成座山咁,睇到都滿足!餐廳仲有好多時令刺身好似秋刀魚、活北寄貝等,款式相當多,甚至係沖繩海葡萄、宮崎白粟米都有。缺點係座位唔多,亦有人投訴服務一般。

圖:hkfoodiebobo小新888


第3位 翟道翟棉棉冰 (*新上榜)

去泰國旅行,實要拜訪甜品名店After You,刨冰同甜品真係食極都唔厭架。呢一間旺中「致敬版」,質素都唔差,老闆曾經喺泰國生活兼打工,芒果糯米飯刨冰做法好相似,有刨得細滑碎冰、糯米飯同埋椰漿,甜味較淡但都唔錯。泰式奶茶、冬蔭功梳打都好有驚喜!

圖:imeatstockiameatproduct


第2位 火鍋英雄 (*新上榜)

好多麻辣火鍋不約而同喺銅鑼灣開業,呢一間新開冇耐就打入第二位!大廚曾喺跑馬地駿景軒做,憑麻辣川菜打響名堂,仲為餐廳奪得米芝蓮一星。麻辣湯底辣得細緻,用上多種辣椒香料製作,有清油同牛油兩種口味,亦可以試坊間少有嘅川菜冷鍋魚、 跳水田雞鍋, 南山泉水雞鍋同青椒魚頭鍋。

圖:Love_kiki_1985MS_JOVI


第1位 潮丸 (*新上榜)

以牛丸做主打嘅麵店真係好少見,呢一間食店裝修好似café咁年輕,企理乾淨,其實主打一系列潮汕牛肉麵食!牛丸於大陸工場棍打而成,多汁彈牙而且牛肉味濃,牛三鮮包括牛爽腩、牛筋同牛肚,炆得入味。唔食牛嘅朋友可以揀豬或者魚,自家製紅燈籠椒及黃燈籠椒辣醬都好有誠意,食碗粉都唔會好麻甩。

圖:Ca Laitht_dawn



文:Perrins


關鍵字
十強
排行榜
甜品
車仔麵
花膠
素菜
壽司
海膽
麻辣
火鍋
牛丸
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
4天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
2019-09-09
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03