1月份好評餐廳十強
2024-02-28

新一年第一個,梗係食好啲同自己打打氣,1月嘅十強餐廳由串燒、德國菜、火鍋到放題等都有,而且有唔少係新上榜㗎~


第10位 陀地燒(*新上榜)

圖:chan yan wingfrancisg712345

喺中環要揾抵食嘅串燒店,呢間係其中一間,雖然每款2至4串起,但好似雞皮咁$8/串,香辣惹味嘅燒生蠔都係$12/隻,性價比高。另外牛油蜜糖烤麻糬、番薯手抓餅、豬大豬都值得一試。


第9位 陳儀興飯店  

圖:Susan SusanVictoria Y

可能近新年,大家想食中菜多啲,令呢間潮州打冷店再度上榜。其實大大份嘅滷水拼盤、炸蠔餅真係好啱一大班人開心share,而且滷得入味嘅滷水鵝,或者外脆內嫩嘅蠔肉都係絕佳嘅佐酒菜𠻹。


第8位 海陸空 (*新上榜) 

圖:hkfoodcaptain

由食品公司韓印紅開試嘅韓式餐廳,轉咗裝修又轉咗餐牌,但不變嘅依然係食物分量十足。餐廳每晚有唔同嘅任食前菜,主食想特別啲可以試石板韓式海鮮炸醬麵,喺熱辣辣嘅石板上拌炒炸醬麵更加入味;另外醬油蟹內藏三文魚粒,鮮上加鮮呀~


第7位 SuperNormal  

圖:puishan__

第3次上榜喇~呢間德國菜酒吧餐廳,喺區內頗受歡迎,皆因足料又價錢合理。招牌柚子脆皮德國豬手幾乎每檯都會試,豬手用柚子麥啤浸泡,入口皮脆肉嫩,配埋蜜糖芥末醬,啖啖肉又夠晒惹味。另外雙色魚籽煙三文魚忌廉天使麵、三重芝士安格斯牛肉漢堡都係誠意之作。


第6位 龍亭   

圖:Vivian._.肥dodo

要食好啲又點少得日本菜呢!喺你面前即席製作嘅鐵板燒廚師發辦,有齊視覺、嗅覺、味覺三重享受。餐廳主要以南非孔雀鮑魚、廣島蠔等海鮮入饌,擺盤重好似西餐咁,好啱打卡。而白酒、清酒都有多款選擇,總有一款啱你口味。


第5位 爆爆鍋(*新上榜) 

圖:aa100027wnganc

以爆炒鍋作招徠嘅台式火鍋店,推介大家試爆炒燒酒烏雞鍋,同埋爆炒櫻花蝦鮮鍋,店員會即席用砂鍋炒香鍋底材料再加湯,滾起後先飲湯,再打邊爐,好啱重係涼涼地嘅天氣食,暖身之餘又可以打卡。自選主菜以肉類為主,包括安格斯牛肉、澳洲M5和牛等。


第4位 臺北棧 (*新上榜)

圖:Agnestsm

創意菜式會令人充滿期待,好似呢間人氣新派台灣菜餐廳,必食招牌菜就有奶奶麻糬;麻糬提供OREO、花生、黑芝麻等口味,由食客自己拌勻,有得食兼有得玩,而手作芋泥甜品重有坊間少見嘅拿破崙款式。當然傳統嘅牛肉麵、魯肉飯等都有供應。


第3位 Eiffel Bistro (*新上榜) 

圖:wlskfoodieracheltungtung0409

裝修別緻又向內街嘅法國菜餐廳,環境比較清靜,氣氛幾chill,好啱想放鬆心情時嚟用餐。呢度兩道菜set lunch百幾蚊起,包括鹹味La Complête、美國頂級牛腹扒等輕食同肉類料理;而單點則有油封鴨髀、生牛肉他他等人氣菜式。


第2位 殿·大喜屋(*新上榜)

圖:memoching

呢間日式放題上年一度成為熱話,皆因一間酒店取消人氣自助餐,改由呢個品牌進場,而供應嘅食物亦比其他分店多。刺身必食松葉蟹腳、金槍魚腩、鱆紅魚薄切,另外北海道海膽軍艦、芝士焗龍蝦、花雕醉鮑魚等款式,讓大家輕鬆回本,難怪打入十強啦。


第1位 Classy Le Carré (*新上榜)

圖:Early_birdy._.diarys

歐洲當地小舖都畀人一種好chill嘅感覺,而呢間白色小屋正正營造到呢種氛圍。有情調得嚟帶少少warm嘅感覺。餐點以精緻西餐同輕食為主,其中法式鄉村鐵鑊早餐有yogurt、烤大啡菇、窩夫、連枝車厘茄等,賣相出色又足料,週末嘆返份,即刻有種慵懶感呀。


文:Cathy



關鍵字
十強名單
十強
日本菜
德國菜
火鍋
串燒
韓國菜
打冷
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2024生日優惠 食盡歐亞各式料理
2024-07-02
【2024新店精選】7月更新! 嘆印度土邦宮廷菜、典雅江南菜
6天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
【隨時更新】零食速報 每周新款零食、酒品點評
2024-07-09
點心放題2024!經典香港懷舊點心主題、送極品花膠灌湯餃及鮑魚燒賣
2024-06-27