1月份好評餐廳十強
2021-02-09

成個1月都冇晚巿堂食,變相令到大家嘅lunch食得豐富咗,捨得食咗。十強嘅餐廳入面,不乏omakase同燒肉店一啲本嚟多數晚巿先去食嘅餐廳,不過依然都係以親民價嘅小店佔多數。

第10位  台北巷弄(*新上榜) 

 圖:AHM0021yoyo454

係台灣嘅味道啊!呢間餐廳有幾款台式便當選擇,即使而家冇得晚巿堂食,外賣都好方便,加上價錢貼地,難怪深受街坊歡迎。特別推介鹽酥雞扒便當,酥脆香口,配多半份醬油雞翼仲開心。唔夠嘅可以叫埋仙草凍芋圓做飯後甜品。

第9位  峇里堂(*新上榜) 

 圖:pigfoodiexhkAgnesYeung1683

呢間印尼菜餐廳有40幾年歷史喇,上年喺佐敦山林道重開,裝修走文青風,仲有幾款創新嘅fusion菜,成功吸引新客源。食印尼嘢梗係要有串燒同巴東牛肉飯,呢度就創作埋巴東牛肉牛角包,加咗青瓜嘅關係,椰味香濃得嚟帶清新。珍多冰沿用印尼傳統,一碗碗咁上,反而對香港人嚟講係種新意。

第8位  椰粉湯紅   

 圖:yuehw_fishstarfish38

主打燉湯嘅小店,喺需要滋潤嘅冬天零舍吃香。不過佢哋除咗多款湯品外,亦有飯食。竹絲海南雞椰香飯係佢哋首創嘅,啖啖椰香,雞肉口感較為實淨。另外有椰香蛋包飯亦值得一試,蛋好滑,倒埋椰汁上面,估唔到又幾夾,鹹甜中有致。

第7位  曼谷水門海南雞飯(*新上榜)

 圖:BB芝心批tasteology.hk

講真,呢間餐廳餐廳選擇好少,就得泰式海南雞飯、泰式豬手飯、青木瓜沙律同芒果糯米飯4樣嘢,不過勝在夠平,30蚊就食到碟有水準嘅飯,打入十強一啲都唔意外。海南雞以三黃雞製作,入口滑嫩兼索晒香茅同斑蘭葉香。

第6位 NUTTEA(*新上榜)

 圖:mylittlegourmand852eater

個個都話要健康,但又鍾意飲奶蓋,點搞?所以呢間主打堅果奶蓋嘅飲品店就可以跑出啦~堅果奶用咗5種堅果製作,冇奶都冇奶精,素食朋友都飲得。佢哋有多款堅果奶配搭唔同茶底同生果供應,如果夠早去,記得試每日限定100杯嘅伯爵朱古力堅果奶蓋茶,清幽嘅茶香可以中和朱古力嘅甜香。遲咗都唔緊要,火龍果堅果奶蓋茶都係推介,仲有果肉食到添。

第5位 閨•家 (*新上榜)

 圖:wingshuen1123kristinn

雖然話香煎蓮藕餅豬扒飯係呢度嘅招牌,豬扒仲用咗鮮榨果汁去醃製,撈埋醬油好惹味。不過更多人去到都會想試下佢哋嘅「三色麵」,即係紫薯麵、菠菜麵同甘筍麵,幾靚幾有特色,不過其實唔太食到紫薯味。

第4位  雲壽司  

 圖:dr.foodfoodstalkers_hk

冇咗晚巿,大家都好似願意畀多啲錢食個勁lunch,呢間Omakase隔咗一個月又再度上榜。無論刺身定壽司都相當新鮮,拖羅入口慢慢溶化,鮟鱇魚肝嘅魚油香味非常濃郁,加埋辣辣地嘅明太子醬令佢嘅層次更為豐富。

第3位  Lucky Smash (*新上榜)

 圖:elliewongyeat.play

荃灣人最近好有口福啊,三甲有兩個位置都係荃灣新開冇耐嘅餐廳。呢間burger舖係Burger Joys嘅副線,全部漢堡即叫即製,menu簡而精,就3款:安格斯手打牛肉漢堡、芝士牛肉漢堡、雙層芝士牛肉漢堡。安格斯嗰款肉汁滿滿,一定打動到牛魔王呢。

第2位  段純貞 (*新上榜)

 圖:天天食好野heimen

嚟自台灣新竹巿嘅牛肉麵專門店,一直堅持使用新鮮肥牛提煉嘅天然牛油脂,香港店食到嘅牛骨湯底咁濃郁,亦係沿用返台灣嗰邊嘅秘方,即使未飛到都可以食到當地風味!必食三寶麵啦,牛腱心牛肚牛筋都有齊,食得辣嘅就揀麻辣蒜味腱心半筋半肉麵,湯底加入咗花椒辣椒胡椒仲有八角同老薑等,夠晒刺激呢。

第1位  YAKINIKU KAKURA (*新上榜)

 圖:starrychowwaiyeegrace

嚟自日本九州嘅人氣燒肉店,所有食材都係由日本直送,主力供應A5級別嘅黑毛和牛,成功吸引一班燒肉控同肉食獸。黑毛和牛大判燒盛盒包括有鹿兒島A4和牛西冷、和牛裏腹小排、同埋和牛背脊肉,各有唔同口感,西冷油脂最重,裏腹小排肉味就最濃郁。



文:Kar

關鍵字
十強
報榜
十強名單
荃灣
紅磡
日本菜
台灣菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節愛意滿瀉 甜蜜蜜堂食/外賣下午茶推介
2021-02-01
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09
食肉獸必收藏!牛年到 五間品牛餐廳介紹返
2021-02-11