1月份好評餐廳十強
2019-02-11

話咁快,2019年就已經過咗成個月有多,你哋做過啲乜?食過啲乜?即刻報個榜,同大家睇下2019年嘅最新飲食趨勢先~ 望一望,打入十強嘅餐廳有超過一半都係第一次上榜,除咗兩間係人氣過江龍餐廳之外,有唔少都係特色小店嚟。

第10位   半糖主義 (*新上榜)

 圖:Ppchu360karitang

要喺堅尼地城搵甜品食,識搵一定搵呢間,店如其名,所有甜品都係用60-70%比例嘅糖去製作,冇咁甜就唔使怕肥啦。而且唔少都係坊間比較少有嘅甜品,例如伯爵茶燉蛋、桃膠蓮子燉奶、紫薯心太軟等。紫薯窩夫打卡亦一流,中間都有夾住紫薯㗎,紫薯控,go!

第9位   慢理牆城

 圖:snowbluehungCeeCJasmine

油麻地呢間森林系café,繼上年9月上榜後終於再次打入十強。無他嘅,成間餐廳都係打卡位,已經率先贏得一眾少女歡心。加上甜品啲名又鬼死咁浪漫,「陪您去看流星雨」呀、「櫻花樹下的忽發奇想」呀咁,雖然唔知係咩嚟,但見住正餐嘅牛油果忌廉蟹肉意大利飯咁鬼足料同鮮甜,擺碟又靚,就知道質素都會有保證。

第8位    團日式拉麵

 圖:nee.eat.playtiksan0610014

荃灣呢間拉麵店,隔咗兩個月又再度上榜。今次已經係佢哋第3次入圍十強喇!受歡迎係有佢嘅理由嘅,限量供應嘅松葉蟹味噌拉麵,幾乎枱枱都會嗌返碗,呃到like之餘最重要係有實際,原隻蟹蓋炙燒過,蟹膏同蟹肉都好香口。另外推介魚介拉麵,味道較濃厚。

第7位    滿屋日本料理

 圖:AntoniaWong7050

上個月第10位嘅日式放題,今個月躍升咗幾位。作為放題餐廳,佢又真係做得幾稱職,刺身壽司燒物小食應有盡有,甜品有蘆薈木瓜凍,沙律吧度就連蟹籽都有得任嗶!有雪糕機都算,仲要有埋爆谷機,同埋冷熱嘅清酒、梅酒都係任飲唔嬲,CP值咁高係抵佢繼續有得留低嘅。

第6位  麥金.麥金馬拉特式茶啡室 (*新上榜)

 圖:pung.mobile2012karen_c1234

大角咀啲橫街有唔少小店,呢間主打馬來西亞特色菜嘅咖啡茶室就係其中一間,椰漿飯、喇沙、肉骨茶全部都喺度食到。呢度嘅喇沙都有好多款,娘惹喇沙就富椰奶香同海鮮甜,啱啱好嘅辣度令人欲罷不能。拉茶亦相當正宗,茶香中帶甜,原來係因為落咗少少肉桂粉去沖調。

第5位   一起食堂 (*新上榜)

 圖:Sa820foodetective852

喺中環區搵間平價飯堂一啲都唔容易啊,難怪呢間主打台日便當嘅餐廳,新開咗幾個月就迅速成為該區打工仔嘅新寵兒。要飽肚當然係食原條蒲燒鰻魚飯或者紅燒牛肉麵,另外仲有鹵蛋、溫泉蛋、炸花枝丸等台式小食,埋尾可以嚟多碗芋圓燒仙草,一站式由主菜到甜品都食得晒。

第4位   釜之魂釜飯專門店 (*新上榜)

 圖:mjqueen7esune619

九龍灣呢間日式釜飯餐廳,有幾款釜飯選擇,好似汁燒牛肉釜、五花豚肉釜呀咁,但最推介嘅當然係招牌鰻魚飯!餐廳使用自家養殖場供應近兩斤重厚肉嘅鰻魚,加上用特製蒸鍋煮日本越光米,令到呢道菜既鮮甜又香口。

第3位  微酵烘焙 (*新上榜)

 圖:KathyPuneat4forever

成日去台灣嘅朋友,對於呢間手工烘焙歐式軟包店應該好熟悉,難怪佢哋嚟咗香港開分店後,就可以迅速打入十強仲要進佔三甲嘅位置啦。必試爆漿珍奶軟歐、三款分別係茶、士多啤梨同朱古力味嘅髒髒包,全部麵包都係選用自家培植嘅貴腐酵母,兼用高甜度日曬有機白葡萄乾製作,所以啲麵包食得出有份香甜味㗎。

第2位 J.S. FOODIES (*新上榜)

 圖:kennistpmytelleng

第二位都係過江龍,不過係日本過江龍。估唔到上年嘅pancake熱潮繼續延續到依家。呢間pancake店同Flipper’s係同一個集團,有pancake食之餘仲有漢堡同意粉。但要數比較特別嘅,就係期間限定嘅原隻龍蝦班戟喇,薄pancake加啖啖爽彈嫩滑嘅龍蝦肉同自家製龍蝦汁,係幾有新鮮感,同埋係夾㗎喎。

第1位    阿里山台式美人鍋 (*新上榜)

 圖:phonebusYuenChihin

1 月都係打邊爐嘅季節,所以呢間提供滋潤湯底嘅火鍋店新上榜就做到no.1都唔會令人太意外。餐廳主要有5款湯底,除咗一般嘅台式麻辣鍋、酸菜白肉鍋、胡椒豬肚雞鍋等,最特別最啱女生嗰款叫「桃膠美人鍋」,美人或想變美人記得嗌,以原隻烏雞、桃膠、杞子等熬製,養顏啊。餐廳嘅配料食材亦充滿特色,好似有櫻桃滑鴨片、鹹蛋黃蝦丸同鵝肝墨魚丸咁,是咪想試先?


文:Kar


關鍵字
十強
排行榜
甜品
日式
放題
火鍋
拉麵
過江龍
pancake
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
尖沙咀新商場開幕 過江龍餐廳一覽
5天前
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19
幾時都要打邊爐!火鍋控必試特色店!
2019-09-24
觀塘新開6000呎西餐廳 $480食八道菜西式omakase
2019-09-25