1月份好評餐廳十強
2018-02-07

嚟到2018年,今年嘅飲食潮流係點玩法呢?早前做過一個簡單預測(詳文:2018十大飲食潮流預測),即管睇睇第一個月有冇呢個走勢先!2018年1月嘅十強,都有唔少新面孔,亦有舊店回勇重新上榜,唔講咁多,立即睇睇今年第一次好評餐廳十強!


第10位 和氣食堂

上個月獲第7位嘅日式居酒屋,今個月回落至第10位。日本菜始終深得香港人歡心,而且難得食物質素唔錯、選擇多又抵食,牛油果芒果三文魚班戟、櫻花蝦調魚湯泡飯、脆脆燒三文魚皮都係其他餐廳少見嘅創意菜式,連續兩星期上榜都係合理嘅。

圖:廣亮先生playviolin


第9位 古早牛肉麵 (*新上榜)

之前預告過台式牛肉麵會繼續走紅,呢間只係開咗幾個月嘅深水埗小店,環境好有台灣街頭feel,有唔少懷舊擺設裝飾。招牌紅燒牛肉麵用80斤牛骨及蔬菜熬成,味道香濃,亦有肉燥便當及乾拌麵,手抓捲餅、麵線及鹽酥雞等夜市小吃。

圖:花太郎yankeyau


第8位 亞蘇爾 (*新上榜)

香港葡國菜或澳門菜唔算好多,所以呢間餐廳一開都有唔少人去試!有地道香茜檸檬牛油煮蜆、非洲雞、脆豬扒包、緬甸雞湯米、烤乳豬,亦有自家創作嘅十月初五蝦籽松露意大利粉,用當地老店出品嘅蝦籽,亦有加入海膽嘅水蟹粥、加入芝士馬介休球等。

圖:alice''Nikita_cheung


第7位 炊豕店

呢間豬扒小店人氣持續高企,最近因為新推避風塘豬扒,再次引起唔少foodie們注意。炸豬扒舖滿炸蒜及辣椒,食落非常之惹味香口,唔會炸到乾爭爭,保持肉汁同質感鬆化,可以配飯或者撈麵。而且銅鑼灣區嚟講又唔算好貴,唔怪得咁多人排隊食嘅。

圖:yantung117抽油煙機


第6位 串燒食堂

串燒店雖然冇以前咁hit,不過都有一定捧場客。呢間北角小店主打港式串燒,細細間都幾深夜食堂feel,款式就唔算好特別,但勝在有成四五十款選擇,火候掌握得均勻,必吃明太子釀雞翼、厚切牛舌心、蒜蓉燒生蠔等,仲有較少見嘅燒雞子!十幾蚊串都好抵食吓。

圖:Yandaylohastar


第5位 忠記咖啡屋‧私房菜 (*新上榜)

銅鑼灣呢間老店由以前茶餐廳變成上樓私房菜,因為食物平靚正,有唔少熟客去幫襯。供應住家菜式,小菜好似咕嚕肉、小炒皇都係招牌,亦不時有特色宴席,好似鮑魚虎蝦宴、佛跳牆宴、盆菜宴等,菜式更加精緻,6位起就食得,價錢都幾抵食添。

圖:Sweetdiegrandpachunkychopsticks


第4位 豚道樂 (*新上榜)

總店位於荃灣,雖然唔少日本過江龍,但拉麵款式都幾特別,好似用信州山葵製成嘅wasabi拉麵,又可以自選九州直麵或札幌曲麵。黃埔新店推出松葉蟹海老蕃茄湯拉麵,湯底濃郁有蟹香,最新更推出黑松露醬油豚骨湯拉麵。拉麵都咁有新意,所以吸引唔少拉麵迷去試架。

圖:letsgocrazyjanetG4gourmand


第3位 駿景軒 (*新上榜)

原本位於跑馬地酒店內嘅駿景軒,以粵菜川菜馳名,曾連續六年獲米芝蓮一星榮譽,早前結業令到唔少食客失望。今次喺灣仔再開,一重開即刻登上三甲位置!仍然保留瓦罉焗胡椒蝦、酸菜桂魚、杏汁白肺湯等招牌菜及麻辣火鍋,食評暫時都係正面嘅。

圖:Scorpion Jhkfoodiebobo


第2位 越滿

平民麵食繼續受歡迎,旺角呢間越南菜,微升一級上到亞軍。食物簡樸但質素唔錯,款式包羅萬有,好似軟殼蟹米紙卷脆身足料,春卷即叫即炸,用上和牛炮製嘅河湯底清甜,牛味突出。環境都算幾舒服,價錢ok而且份量足,唔少食評都話抵食有回頭呀。

圖:sonson723minieater


第1位 桃園眷村 (*新上榜)

2018嘅冠軍寶座係屬於來自國內嘅台式早餐店!香港台菜餐廳有唔少,但主打早餐又真係好似第一次見。四大招牌食物係豆漿、油條、燒餅、飯糰,用加拿大非基因黃豆,浸洗磨豆隔渣都喺舖頭製作。食物唔花巧但做得出色,燒餅鬆化、飯糰足料、油條唔油膩,有時簡單但窩心嘅食物,仲好過食咩山珍海味啦。

圖:jenjenloveeatingmandymanlovefoodie



文:Perrins

關鍵字
十強
排行榜
越南菜
日本菜
牛肉麵
葡國菜
銅鑼灣
串燒
私房菜
拉麵
台灣菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
7天前
有平有貴 情人節餐各級價格攻略
2020-02-04