新加坡榴槤菠蘿包 Baker Talent
新加坡嚟嘅麵包店，賣嘅麵包都幾有特色，望埋去櫥窗有幾款菠蘿包嘅，有原味有椰子之類，榴槤菠蘿包就係其中一款。望落幾款個樣都差唔多，咪又係菠蘿包咁樣樣，榴槤味嗰個就多咗粒瓜子嘅物體喺上面啦。
個包大約有一隻手掌咁大，面頭菠蘿包嘅脆皮精髓可能因為唔係新鮮出爐嘅關係，已經腍腍地唔多脆。食多幾啖就食到啲榴槤餡，份量正常啦，但就唔算話超濃烈，12蚊個略嫌貴咗少少。
馬來西亞榴槤烤包 Rotiboy Bakeshoppe
另一間過江龍就係嚟自馬來西亞嘅呢間麵包店，暫時淨係得旺角一間舖。基本上呢度得兩款包賣，一係咖啡烤包，一係榴槤烤包。兩款都係keep住喺個暖爐度，買嗰陣都仲感受到佢嘅微溫。
榴槤烤包睇落幾似鮮奶球，漲卜卜咁。唔好話我唔提醒你哋，輕力啲拎呀，因為大力少少撳落去個包就會即刻扁咗㗎喇。冇計，咬開佢接近係空心嘅，榴槤蓉係薄薄der一層喺底，香係幾香嘅，但榴槤控唔會食得過癮，真係太少喇。撇除榴槤唔計，其實個包係幾好食，面頭脆包身軟，仲甜甜地。而家做緊特價10蚊，抵唔抵就見仁見智喇。
厚墩墩榴槤果肉菠蘿包 La Boheme
呢間包舖係開喺Aeon裡面嘅，包嘅種類都幾多，而榴槤菠蘿包就得荃灣、屯門、荔枝角3間Aeon分舖先有。
正正常常一個菠蘿包咁大啦，不過個皮就唔多似菠蘿包喇，冇咁鬆脆，偏硬身少少，但如果計主角，即係榴槤嚟講，佢係幾rich嘅，咬開就見到好大層榴槤餡，唔似得其他包店嗰啲咁薄，而且仲食得到一粒粒果肉添。平時賣10蚊個，咁啱我去嗰日做特價，9蚊。
細細個足料榴槤菠蘿包 太興
呢間餐廳最近踩過界，連榴槤菠蘿包都出埋，喺餐廳出面個麵包櫃度賣，有暖爐烘住，但暫時只限荃灣荃新天地同油塘大本營兩間店。
9蚊個，16蚊兩個，不過個包真心細，大約得半隻手掌咁大嘅mini size，幾啖就食得晒。之但係，可能少食夕多滋味啦，包嘅外形同口感同同一般菠蘿包冇分別，香脆易碎。而個包雖然細，但中間嘅餡就一啲都唔少，有返啲厚度，細心啲都會略略食到絲絲榴槤絲，係幾重味嘅。
嗱，做埋個表拼晒啲包一齊，邊間抵食邊間好食，自己計數啦~
文/相：Kar
隨時接收最新資訊
讚好OpenRice專頁！