鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01

千呼萬喚來自台灣嘅鼎王麻辣鍋終於喺尖沙咀開業啦!好多時喺香港食過江龍餐廳,最怕嘅就係味道會同原店差咁一截。不過香港鼎王就無呢個煩惱,負責人話無論味道、裝修以至服務都跟足台灣,所有管理層都曾經到台中總店實習兩星期添!


食材選擇方面與台灣都九成相似,因為知道香港人鍾意食肉,加多咗兩三款香港店先有嘅肉類。而大部份食材都係由台灣供應商直送,保證同台灣店一模一樣。


鴛鴦鍋($68/位)


湯底選擇其實就得麻辣鴨血鍋同酸菜白肉鍋兩個選擇,難得嚟到當然要揀個鴛鴦鍋試晒兩款啦!麻辣鴨血鍋加入豬骨、蔬果、大豆芽、香料及藥材熬製,味道溫和,唔會太辣,建議就咁飲都得!而且鴨血同豆腐都入晒味,無限refill㗎!


而酸菜白肉鍋就選用天然發酵醃製嘅酸菜,酸味啱啱好,鍋內仲藏有粉條添。


日本A4和牛($388)

呢款日本A4和牛就係香港店先有嘅菜單,負責人特意從鹿兒島南部農場拎貨,和牛紋理超靚,而且牛味濃郁。


日本黑豚肉($108)

同樣係香港店先有嘅配料,豬肉軟腍,有微微入口即溶嘅感覺,放入酸菜鍋到食特別夾!


日本黑豚手打丸($88)、干貝滑($118)

黑豚手打丸口感相對坊間丸類就特別啲,口感較扎實,有種肉餅嘅口感,而且肉味都好濃厚。干貝滑係開飯仔私心推薦之選,真係食到一絲絲干貝,干貝鮮味都好突出!


更多【新店直擊】:
1. 銅鑼灣$298磯燒海鮮及串燒放題!任食鮑魚/元貝/蟶子皇共七款海鮮
2. 新鮮靚生果!葵廣新開鮮果茶飲店 必試靜岡蜜瓜奶、香印青提茶、大糖領桃茶
3.  北海道人氣湯咖哩進駐尖沙咀 必試香港限定特製芝士豚肉口味


老油條($48),豆皮($48)

老油條同豆皮都係必食之選啊!兩者都係放入湯輕輕碌1-2兩秒就食得,吸收晒湯底麻辣香,雖然邪惡但好滿足。


滷大腸頭($88)

滷大腸亦係推介之一,滷水帶少許甜味,大腸軟腍,入口即溶啊。


蛋餃($68)

想食台灣味,呢款蛋餃就夠晒正宗啦。蛋餃由台灣店直送,味道同嗰邊真係一樣㗎!


枸杞菊花露($98)

加入枸杞及菊花等材料煲成,味道清新香甜,飲完即刻無咁熱氣。


彩蛋當然喺最後!店內免費供應台灣白飯,員工仲教咗一個秘製飯嘅做法畀開飯仔,先盛一碗飯,再加入麻辣湯底及酸菜,最後加上醋及少許蔥花,又真係幾好味喎。溫馨一提,想去記得訂位先啊~


鼎王麻辣鍋

地址: 尖沙咀金巴利道26號地下5號舖






文: Yanica

相、片: Tom Li


關鍵字
台灣
過江龍
火鍋
麻辣鍋
鴨血
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
1天前
【2019聖誕】早鳥優惠! 聖誕自助餐推介
4天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
6天前