黃大仙竹園夜市新開張 一站式掃皺皮腸粉+船麵+花膠翅(有片)
2018-12-05


黃大仙嘅街坊有口福啦!竹園市場日前全新開幕,裡面嘅小食街唔單止有齊各國特色小食,而且大部分都營業至凌晨一點,夜晚突然肚餓都可以掃街食宵夜。
 

晶品美食 石磨皺皮腸粉



秘製麻辣雞腸($24)

主打即場石磨腸粉,石磨唔單止可以令米漿更柔滑,亦可以帶出米香。而且用櫃桶即叫即蒸,熱辣辣香噴噴。有牛肉、叉燒等唔同配料任揀,開飯仔就揀咗秘製麻辣雞絲,少少麻痺感加上辣味夠哂醒神,怕辣可以飲椰青($8/罐)解辣。不過留意返呢檔開到夜晚8點咋,想食記得早少少嚟買。
 

凱泰船屋 地道泰式船麵+串燒


(左)船麵($28起)(冬蔭功湯底+$7),(右)船麵(船麵湯底)($28起)

呢間泰式小食店由鍾意食泰國菜嘅80後店主開設,唔少材料都係自家製作夠用心。好似主打嘅船麵湯底就用20斤豬骨同20斤雞骨加上泰式香料,每日熬足12個鐘!另一亮點係正宗炸豬皮,口感香脆。亦有冬蔭功湯底同豬骨湯底,加上一系列配料可以隨意搭配。
 


串燒(雞肉$16/串、豬肉$16/串、牛肉$16/串,18:00前 $12/串、$23/2串、$33/3串、$55/6串)

串燒同樣落足心機,雞、豬同牛串都係泰國貨,而且都係即叫即燒,配上自家製燒粉同沙爹醬相當惹味。特別係豬同牛串,香口之餘仲保持到肉汁。
 


泰式拼盤($48/每款2件,$95/每款4件)

泰式拼盤有齊蝦餅、魚餅、素春卷,同香茅雞翼四款小食,同樣非常香口。
 


泰式奶茶(套餐+$2)

大大杯泰式奶茶畀大家一解奶茶癮!最值得一讃嘅係老闆有就返香港人口味,將本身偏甜嘅泰式口味調整至而家啱啱好,飲完成杯都唔口渴。
 

食住上 日、越、港式小食


花膠雞絲翅湯(素翅)($35)

一間店可以食勻三地美食?皆因老闆係日本人,老闆娘喺越南開過餐廳,所以就有齊日式、越式同港式小食。呢碗花膠雞絲湯翅嘅食譜嚟自一位老師傅,每日新鮮熬製6至8小時,當中有素翅、花膠、雞絲、金華火腿、香菇等等,味道香濃而且一睇就知落足料!
 


日式咖喱豬扒(配飯或薄餅 $35)


日式炸芝麻雞翼($28/5隻)

日式咖喱同小食係老闆同仔仔嘅拿手菜,日式咖喱用五種唔同咖喱加上蜜糖調配,唔會太辣帶少少甜味。而且小店所有食品都唔添加味精,小朋友都可以試。而炸芝麻雞翼就係用日本當地嘅食譜,有和風感。
 


越式咖喱牛肋條(配飯或薄餅 $38)


越式滴漏咖啡($25/杯)

越南咖喱由老闆娘主理,混合三種咖喱同椰漿,比日式咖喱更香辣,帶椰子香。值得一讃嘅係薄餅薄身得嚟無油膩感。咖啡就係用越南地道滴漏方法沖調,啡香醇厚。
 

潮煲飯 暖笠笠鰻魚飯+健康海帶麵


鰻魚肉餅煲仔飯(開業優惠價 $40)

天氣轉涼當然要食煲仔飯。正所謂工欲善其事,必先利其器,呢度嘅爐同煲都係特別設計,可以快速傳熱,令飯粒唔會黐底,但同時又有脆口飯焦!食材配搭亦比較新潮,好似最近主打嘅呢煲就係臘味飯底,加上肉餅同鰻魚。
 


精選早餐($24起)

早餐唔想食得太飽?呢度仲有麵同刈包。特別推介呢款海帶麵,100%海帶,高纖、低卡、零脂肪,配燉湯底夠哂味又健康啲。而且好似車仔麵咁可以任揀唔同配料。
 

更多【新店直擊】:
1. 又一重慶麻辣火鍋過江龍 一牛十吃 牛魔王大愛
2. 茶迷必試靚茶+茶製小點 茶葉品牌BASAO旗艦店登陸灣仔
3. 西營盤新開素食Cafe 嘆低糖蛋糕、無花果多士

 
燒賣王子 自家製黑白燒賣



黑白燒賣($20/8粒)

呢間燒賣店最近新推墨魚汁燒賣,同原味燒賣一樣係每日新鮮現包,分別係落咗黑色嘅墨魚汁同一粒粒彈牙墨魚肉!識得食記得落埋佢地嘅咖喱汁,細心地分為大辣、小辣同小小辣,係用咗紅椒、丁香、甘草等多款香料調製,味道豐富開胃。
 

嚟喇喂 惹味錫紙海鮮鍋


錫紙蜆肉粉絲鍋($35/份,雙拼$40/份)


錫紙鮮蝦粉絲鍋($35/份,雙拼$40/份)

呢度嘅錫紙鍋啱哂冬天一個人開飯,有牛肉、蜆同蝦任揀,一打開隨住蒸氣聞到好香蒜蓉味,重點當然係吸收哂鮮味嘅粉絲啦!
 


涼拌撈麵($18起)

呢度嘅涼拌撈麵都好受歡迎,辣醬可以揀微辣、小辣、中辣或者大辣,配芫荽、蔥同花生,夠哂香辣。唔夠喉嘅話亦可以加雞絲、雲耳、蓮藕等配料。
 

悅東小食 香口Shake Shake薯條



炸薯條(可加Shake Shake粉)($15/份)

港式小食當然就唔少得雞蛋仔同炸物啦,呢度嘅雞蛋仔同格仔餅(各$20/底)都好受歡迎。而最特別嘅係佢地嘅炸薯條、薯格、蝦片可以配三款Shake Shake粉:燒烤、香辣、芝士。開飯仔就試咗呢度嘅即炸波浪紋薯條,外脆內軟同芝士粉好夾!
 

豆腐時代 拉絲芝士琵琶豆腐


芝士琵琶豆腐($20/4件)

琵琶豆腐即係加咗魚肉,呢間專賣豆腐嘅小食店最近仲新推有芝士餡嘅版本,炸至金黃色後外脆內軟,趁熱食仲有拉絲效果啊!
 

京川 暖胃胡椒豬肚湯


胡椒豬肚湯($24)


口水雞飯($33)

想飽肚啲嘅話,呢間店嘅飯麵就啱哂喇。招牌係胡椒豬肚湯,胡椒香濃郁有暖胃效果。而口水雞飯就係配黃薑飯,雞肉嫩滑,怕辣嘅話可以加$3配杯豆漿。
 




竹園小食街
地址:黃大仙竹園道15號竹園廣場地下竹園街市內




文、相、片:Cathy

關鍵字
黃大仙
竹園市場
小食街
宵夜
腸粉
船麵
花膠雞絲翅
黑白燒賣
新店直擊
走在最前線,為大家搜羅及報道有關新開餐廳的資訊。
餐廳資料
更多
收起
本月熱門
$68鰻魚飯 日本人氣連鎖鰻魚專門店登陸尖沙咀 香港Menu率先試
2018-12-10
【又到聖誕】任食各款海鮮、環球美食!聖誕自助晚餐精選
2018-11-26
【特約分享】尖咀商場搵食地圖 多國美食任你揀
2018-11-30
2019及歷屆米芝蓮香港澳門指南完全版
2018-12-11
佔地三層!九龍城新開日式料理 一次食勻壽司+鐵板燒+ 爐端燒(有片)
2018-11-19