呢間主打正宗娘惹菜嘅小店本身位於西環，上年結業時好多熟客都覺得好可惜。最近佢地就選址荃灣重開啦，地方仲大咗好多添！店舖由來自檳城嘅老闆兼大廚Derek同佢太太經營，新店除咗保留一系列經典娘惹菜外，仲有唔少新嘢試～

鮮鮑魚珍寶喇沙($138)

叻沙沿用正宗娘惹做法，Derek會先每日煮好一個湯膽，湯膽用牛骨、蝦米、香茅、洋蔥同喇沙葉等熬足四小時，到有客人叫時先會加入其他材料再烹調，每碗都係即叫即煮。然後將海鮮如鮑魚、墨魚同大蝦加入湯到一齊煮，咁樣湯先會有鮮味，味道會更加有層次。叻沙湯夠杰身，每一啖摻摻都掛滿湯，湯底香之餘唔太辣，有椰香味。海鮮都係老闆自己每日去街市買，保證新鮮。

鮮班蘭咖央多士($30)、原味鴨蛋咖央多士($30)

咖央可以話係星馬菜傳統名物，呢度嘅咖央全部都係手工製，Derek每日都要親手打兩小時，真係少啲心力都唔得！傳統口味班蘭咖央椰香味重，唔會過甜，而鴨蛋咖央多士就滑身啲。

黑果椰糖咖央多士($40)、藍花鵝蛋咖央多士($40)

仲有Derek自創嘅黑果咖央多士。黑果係馬來西亞人常用食材之一，但佢嘅味道就各有解讀，有人話佢似果仁、朱古力，又有人話佢有啲似豆豉，想知咩味？真係要試過先知。另外藍花鵝蛋咖央多士比起鴨蛋更滑，蛋味重，而且佢嘅藍色取自藍花，完全無任何人工色素架～

亞參蝦($138)

亞參蝦係傳統娘惹菜式，有分乾同汁煮。而呢度就係汁煮嘅，因為加咗豬油所以味道特別香。呢味餸可謂酸中帶鮮，鮮中帶甜，甜中帶辣，仲有少少鹹香，送飯之選啊！

娘惹天然四色檽米糕($88)、娘惹黑果榴槤奶飲($48)

四色檽米糕上加咗咖央醬，檽米香味重，配埋食一樣咁夾。黑果榴槤奶飲榴槤味都重，帶有淡淡奶香～

娘惹嫁到

地址: 荃灣怡樂街1-5號海濱花園第22座海裕閣地下108號舖

文、相、片: Yanica