驚喜Fusion菜!中環新開半露天Cafe&Bar 推介創意公仔麵Pizza+鮮甜蕃茄濃湯海鮮盛
2020-12-16

喺中環想飲兩杯,搵個地方嚟個Coffee Break,又或者同朋友食餐飯,呢間新開嘅酒吧餐廳都滿足到你!天台位感覺夠Chill,室內裝修就走簡約風格,同樣舒適。Menu選擇多元化之餘仲加入唔少創意元素,例如有迷你漢堡嘅全日早餐、糅合熱茶嘅Cocktail,仲有用出前一丁整嘅Pizza!
 


Say Hi Bar & Dining位於中環士丹利街,係觀塘HOW Food Factory嘅姐妹店。新店走多國菜風格,由小食到主菜均不拘一格,唔少仲係坊間少見嘅配搭𠻹。露天酒吧唔單止可以畀大家呼吸新鮮空氣,一角仲係餐廳自己種嘅香草,即用即摘自給自足!
 


香煎帶子·紅燒肉($88)

雖然個名叫紅燒肉,但其實係用偏西式方法,用自己種嘅香草等將五花肉燴至鬆化入味,然後再先焗後煎,皮脆肉嫩而且脂香突出。而帶子就煎至半熟,令肉質保持嫩滑彈牙。最後加上秘製蕃茄莎莎醬,令呢個Fusion小食更有層次感。
 


蕃茄濃湯海鮮盛($328)

分量十足嘅海鮮盛,以酸味自然醒胃、帶香草香嘅蕃茄濃湯為基底,加入大隻嘅阿根廷紅蝦、智利藍青口、廣島蠔、越南蜆,同盲鰽魚肉。紅蝦經過半煎炸,蝦肉彈牙同時特別香口。廣島蠔同盲鰽魚亦有先煎香,前者蠔肉飽滿肥美,後者皮脆肉嫩。
 


全日早餐($148)

一份有齊迷你和牛芝士漢堡、糖心蛋、炸薯角、巴馬火腿、沙律。將觀塘HOW受歡迎嘅和牛芝士漢堡變成迷你版,漢堡扒選用牛肩肉,肉質較實所以食落唔會散開晒咁,肉香加埋芝士真係無得輸。半熟糖心蛋亦係亮點,蛋黃呈膏狀而且蛋香濃郁。
 


慢煮厚切日本四元豚肉·薯蓉·肉桂蘋果($188)

選用肉香濃郁嘅日本四元豚,慢煮至半熟再煎香,熟得啱啱好!肉質鮮嫩有咬口,而且連邊位帶肥肉嘅部分都好爽口。配以酸中帶甜,仲有少少肉桂辛香嘅玉桂蘋果醬解膩。薯蓉口感軟綿幼滑,加埋蔬菜夠滿足。
 


一丁Pizza($88)

餐廳特別設計咗一系列適合配酒嘅重口味小食,必點呢個賣相超搶鏡嘅Pizza。批底其實係大家食開嘅出前一丁,上面再舖帶子、煙肉、洋蔥、粟米、蕃茄等材料,再加大量芝士焗成,麻油香同芝士香估唔到係咁夾!批底有加到雞蛋,拎上手都唔會好易散,一手酒一手Pizza無問題吖。
 


孜然毛豆粒($88)

坊間酒吧或者居酒屋都會有用鹽水毛豆,餐廳就搞搞新意思,用香氣獨特嘅孜然調味。一上枱就聞到濃烈孜然香,而毛豆口感粉糯,以炸過嘅春卷皮奉上,又係一款送酒一流嘅小食。
 


水晶爽耳凍($88)

水晶豬耳凍口感爽脆彈牙,淋上酸而唔嗆嘅意大利黑醋醬汁,作為開胃前菜或者送酒小食都好啱。亮點在於上面晶瑩剔透一粒粒嘅,其實係滷豬耳時煮咗出嚟嘅膠質,將佢雪凍再切粒,入口即溶增加鹹香,好食!
 

更多【新店直擊】:
1. 旺角發現激抵$30泰式海南雞飯!同場仲有$30泰式豬手飯、$18芒果糯米飯
2. 尖沙咀「食街」新開小食店 酥脆牛角包+即叫即炸雞髀
3. 黃埔新開誠意點心燉湯蒸飯專門店 $128籠仔荷葉蒸龍蝦飯+抹茶流汁叉燒包

 

Irishman($78)

傳統Irishman嘅變奏版,用日本威士忌同Coffee Liqueur配搭餐廳嘅House Blend Espresso,特別在會加入粟子蓉調配,因為要夾返House Blend咖啡豆偏Nutty嘅風味。味道以咖啡為主,帶少少酒香同甜味。
 


Woody($108)

嚟到秋冬,不如嚟杯暖笠笠嘅Cocktail?呢杯Woody以Tia Maria為基底,加入即泡嘅迷迭香茉莉綠茶,最後加入檜木Bitter。檜木可以幫助提神暖身。杯裡面亦會加入Bitter,所以飲呢壺Woody一開始會較重木香,中段滲出Tia Maria嘅咖啡香,去到後段就會係茶味為主,味道變化豐富。
 


SayHi Spritz(價錢待定)

粉紅色嘅SayHi Spritz簡單啲嚟講即係西柚版嘅Gin Tonic,酒精濃度唔會太高,反而以西柚果味為主,加上Tonic Water嘅氣泡,味道好易入口,平時比較少飲酒嘅朋友可以試下呢款呀。
 


Honey Ginger Latte($56,季節限定)

無酒精飲品都落足心機,有四款飲品會係季節限定,冬天特別推介呢杯Honey Ginger Latte畀大家,以帶朱古力同堅果香嘅House Blend Espresso,加上新鮮薑汁同燕麥奶沖調而成。飲落先有薑汁嘅辛辣香,然後係咖啡嘅Nutty香,後韻甜感突出,感覺溫暖。
 


Daily Fruit Tea($44)

水果茶亦同坊間唔同,以新鮮水果加上茶底,即點即打!水果約2-3日更換時令品種。茶底亦會喺烏龍、四季春、茉莉綠茶同紅茶呢四款中挑選一款配搭而成。飲落自然更新鮮、更健康。
 





Say Hi Bar & Dining 
地址:中環士丹利街11號3樓




文:Cathy
相、片:Tom Li

關鍵字
中環
咖啡
Cocktail
一丁Pizza
Say Hi Bar & Dining
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2天前
【2021生日優惠】超爽著數!免費任飲任食日式燒肉/火鍋(持續更新)
2021-04-12
悠長假期 復活節下午茶推介
2021-03-26
【最平$298最貴$938】佐敦新開日式和牛燒肉放題 獨家引入鹿兒島小田和牛
2021-04-09
【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河
2021-04-01