首間日式豚肉串燒專門店 必試豬內臟+白金豚(有片)
2018-07-27

香噴噴嘅串燒係唔少人嘅宵夜首選,如果你鍾意食豬肉同豬內臟嘅話,咁銅鑼灣呢間新開嘅日式串燒店更加係必試!唔單止引入日本岩手縣嘅白金豚,仲有本地新鮮豬內臟,由比較常見嘅豬肝、豬大腸,到少見嘅豬心,甚至豬腦都有!
 

Moku Moku Yakiton呢間居酒屋座落銅鑼灣,主打日式豚肉串燒,單係串燒選擇就多達55款!餐廳背後有日籍料理達人Kei San監修,加上入行超過20年經驗豐富嘅串燒大廚朱少豐坐陣,出品質素自然有保證啦。
 


豬肝慕斯($68)

小酌前先嚟碟小食,豬肝慕斯顧名思義先洗乾淨新鮮生豬肝,焗熟後加入忌廉等材料搞勻,放涼切粒成Creamy香口嘅慕斯。配埋Cream Cheese、蕃茄同梳打餅一齊食,鹹香有致最啱送酒。
 


(左至右)豬皮串($28)、豬頭肉串($28)、豬喉軟骨串($34)、豬耳芝士串($32)、豬腩脂串 ($28)、上等豬脷串($38)

叫得豚肉串燒專門店,自然有唔同部位畀大家揀啦。呢六款係大廚推介,豬皮串先滷後燒,食之前再點少少黃豆粉食最香口。豬頭肉即係臉頰肉,口感柔嫩有啲似牛肉。豬喉軟骨串平時好少見,皆因一隻豬只夠整兩串!上等豬脷亦爽口多汁。
 


(左至右)豬腰子($28)、豬生腸串($34)、豬心串($28)、豬小腸串($34)、豬肝串($28)、豬大腸串($34)

想食得再刁鑽啲,必試豬內臟!餐廳選用本地新鮮即日貨,唔會留過夜,唔需要醃漂處理都唔會有臊味,自然啖啖原汁原味啦。豬腰子即係豬腎,滑中帶爽。豬肝口感粉嫩,調味亦啱啱好,食得出師傅功架。
 


(左至右)白金豚肉林檎紅薑卷($34)、白金豚肉韭菜泡菜卷($34)、白金豚肉茗荷卷($34)、白金豚肉蒜芯卷($32)

餐廳亦特別引入嚟自日本岩手縣嘅白金豚,特色係豬隻飲用山上嘅湧泉水,豚肉肉質鮮嫩,選用五花腩部位做卷燒,更突顯甘香。最推薦白金豚肉林檎紅薑卷,以白金豚肉包住蘋果肉,燒好後再加紅薑汁同蛋黃醬,食落富紅薑香,而有少少脆邊嘅豚肉同香甜多汁嘅蘋果一齊食,香口得嚟感覺清爽唔油膩。
 


網油豬腦卷($38)

重口味之選!處理豬腦步驟相當複雜,呢度嘅師傅就先用清酒煮熟豬腦,之後再以豬網油包嚟燒,口感軟嫩似豆腐。配以燒汁醬、炸蒜片、櫻花蝦等,相當惹味。
 

更多【新店直擊】:
1. 北角新海景酒店自助餐 波士頓龍蝦即劏吞拿魚
2. 九龍城新開蝦麵店 8斤鮮蝦熬湯加波士頓龍蝦
3. 東京牛肉油拌麵專門店 10cm高重量級牛肉丼

 

(左至右)魚餅($28)、沖繩豬手($38)、蘿蔔($18)

串燒以外亦有唔少選擇,好似味噌煮沖繩名物豬手,食落非常軟腍入味。魚餅亦富味噌香,同時無蓋過魚味。皆因師傅特別先用日式高湯將食材煮至八九成熟,再加入兩款唔同味噌調味,香濃而唔死鹹。
 


一藏豚骨湯拉麵($68)

喺居酒屋最後想食返碗飽肚嘅飯麵?呢度有豚骨湯拉麵同沾麵選擇,前者湯底用新鮮豬骨等材料熬足12個鐘,特別香濃。後者係魚介豚骨沾汁,再加入鮮蝦同櫻花蝦粉,充滿蝦香。
 


(左至右)咖啡燒酎、自家製梅酒、荔枝酒、菠蘿檸檬酒(各$68)、八千代伝梅酒(二年釀)($298)(限量供應)

食串燒當然要配返杯酒啦,呢度就有供應Kei San監製嘅自家釀燒酎。梅酒、菠蘿檸檬酒等水果酒相對會比較易入口,而咖啡燒酎就係將咖啡豆深層烘培後再以燒酎浸泡,同時富咖啡香同酒香。八千代伝梅酒更以鹿兒島得獎八千代伝燒酎,加全熟嘅日本紀州南高梅釀製兩年,醇厚甘甜。
 





Moku Moku Yakiton
銅鑼灣軒尼詩道499號永光商業大廈7樓




文、相、片:Cathy

關鍵字
銅鑼灣
串燒
白金豚
居酒屋
燒酎
Moku Moku Yakiton
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
4天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30