今年開咗唔少飲品店，不過都係以台式飲品為主。最近喺九龍城就終於有間係主打港式飲品！糅合懷舊同創新元素，調配出大家細細個都會試過嘅味道：格仔餅、鳳仙、唂咕、凍OT等等。亦有甜品供應，自家製布甸同軟雪糕都有驚喜。
 

玖捌由一班鐘情香港味道嘅朋友一齊開設，用咗九個月時間構思同準備，主打港式Mocktail同特調飲品，用摩登手法帶出懷舊味道。
 

格仔餅（$52）

呢杯格仔餅就係摩登演繹懷舊味道嘅好例子，飲得嘅格仔餅其實係由牛奶、朱古力、椰子、花生醬等調配而成。特點係杯邊掛上花生醬製作花紋，飲品上面亦加上糖蔥餅碎模仿格仔餅餡嘅香脆口感！飲落以花生醬香甜味道為主，而且仲咬到一粒粒花生碎。
 

（右）鳳仙（$52）

鳳仙雪條又係香港人集體回憶之一，香蕉味脆皮包住雲呢拿雪糕筒芒果醬夾心。呢度就變為香蕉芒果味嘅冰沙，配搭黑糖珍珠，忌廉同芒果乾碎。呢杯飲得嘅鳳仙還原咗鳳仙酸酸甜甜嘅味道，同時增加珍珠煙韌嘅口感，懷舊得嚟又有新鮮感。
 

（右）玖捌98（$52）

其實即係芝麻糊版嘅奶茶！紅茶底用萃茶機即叫即萃取，確保每杯茶飲都係最新鮮。奶茶加入黑芝麻粉Shake勻之後再加上黑芝麻忌廉，黑芝麻香味十足，但又唔會完全蓋過紅茶香，甜度適中。
 

新奇事唂咕（凍$44，熱$40）

以前茶餐廳會用比較平嘅唂咕粉（Cocoa）取代朱古力（Chocolate）粉嚟沖飲品，到而家當然就唔使啦。呢度嘅新奇事唂咕即係橙味朱古力，朱古力味香濃，重點係個橙味好似細個食嘅橙味朱古力！一飲回憶真係返晒嚟。
 

 

威士忌朱古力布甸（$38）

呢度亦有供應甜品，部分係自家製作，包括呢杯威士忌朱古力布甸，選用比利時朱古力，入口先食到朱古力嘅甜香，之後就有威士忌個酒味，越食酒味越突出！口感非常Creamy幼滑，似慕斯多過布甸。
 

風乾菠蘿軟雪糕（$30）

牛奶軟雪糕配搭風乾菠蘿碎，牛奶雪糕比較實身，口感綿密而且唔會太甜膩，原來秘訣係用豆奶取代一半牛奶，而且選用高質軟雪糕機，壓出唔易融又柔滑嘅軟雪糕。菠蘿乾味道香甜，而且煙煙韌韌增加口感。連裝飾嘅朱古力都係70%黑朱古力嚟，細節位真係落足心思。
 

玖捌
地址：九龍城太子道西368-374號龍珠樓地下19號舖

文、相、片：Cathy