食足一日!澳門5大小食推介 首選阿華田脆脆芝士西多(有片)
2018-03-26

有時想離開下香港,出去玩下hea下,但又唔係成日都有咁多假,去唔得遠。就咁搵個weekend過一過大海,嚟個短短地嘅全日美食團都唔錯。之但係,唔通次次過到去都係食葡撻同豬扒包咩?介紹多幾間特色餐廳過你哋啦。

限定士多啤梨卷蛋  尚堂

新開咗個零月嘅甜品店,有幾款新店限定嘅果昔系列同福岡甜王草莓卷蛋,係水坑尾嗰間冇㗎!士多啤梨卷蛋個樣好靚,仲有半粒士多啤梨喺中間,佢心心樣時女生亦心心眼。甜甜地,多少少cream都唔緊要啦,過得嚟澳門都係預咗食食食㗎啦~ 至於果昔,呢杯花花世界無論賣相定味道都好吸引,係藍莓草莓蔓越莓明治鮮奶嚟,咁多種莓,飲落藍莓味最重,同埋有沙冰粒粒感覺,唔錯。

阿華田脆脆芝士西多   馬慶康南天咖啡室

嚟呢間食嘅話,唔使諗,一份阿華田脆脆芝士西多,加多支樽仔奶茶。西多本身已經夠devil,呢個華田西多,就簡直係devil之中嘅devil!啲華田脆脆粒舖滿成個兩層厚嘅西多面,有大嚿牛油慢慢溶緊,切開中間,Oh no,仲要有啲半溶芝士唧緊出嚟,芝士嘅鹹香正好中和返華田嘅甜,仲有微微花生醬嘅味道。樽仔奶茶就茶味比奶味重啦,唔會話太甜。

葱花雞蛋腸    倫記軟滑腸粉

倫記個老闆,以前做中菜出身嘅,5年前自己研發咗呢種加蛋製作滑腸粉嘅秘方,就一直做到今日。佢啲腸粉,真心滑,而且個樣仲好靚。即叫即拉嘅蔥花雞蛋腸粉,用咗兩隻雞蛋去整,最後再撒啲蔥花上去,就算咩醬都唔加,就咁食都好香口。但當然,甜醬麻醬辣醬都加晒就更加開心啦。

宇治抹茶麻糬雞蛋仔    鐵餅號

去到澳門都要食雞蛋仔?係呀,呢間出名呀,出名在佢啲雞蛋仔可以加麻糬粒粒、oreo或者朱古力粒,另有13種口味任揀配搭。睇住佢整宇治抹茶麻糬粒粒雞蛋仔,淋完抹茶漿之後,就逐粒逐粒麻糬加喺面,都分佈得幾平均。食嗰陣,仲可以拉到絲,係幾治癒,雖然唔算話好煙韌,但都有啲咬口嘅,抹茶味淡淡地,但有啲美中不足係底雞蛋仔略嫌腍身咗少少,影一兩張相好快啲食。

黃金蝦餅吐司  Foodie

呢間舖喺IG都吸引咗唔少foodie去打卡,舖頭主要做各式嘅厚多士嘅。望勻啲餐牌,最吸引似乎係黃金蝦餅吐司,係呀黃金呀,鹹蛋呀,2018年年度最佳百搭食材呀。齋睇個賣相係幾呃like嘅,一粒粒橙黃色嘅鹹蛋黃,好似隨時準備跌嘅樣,仲有煎蝦餅同沙律菜,好豐富。不過食落就同期望有啲落差,烘過嘅麵包都唔算太脆,蝦餅亦較乾身,但無可否認,鹹蛋係發揮到佢嘅本分嘅,救返唔少分。


文:Kar
相、片:Kar、Cathy

關鍵字
澳門
小食
芝士
抹茶
甜品
澳門味道
由澳門小編提供各種飲食情報,從遊客推介到在地美味都一網打盡。
餐廳資料
更多
收起
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
迎接全新2020 1-2月下午茶推介
2020-01-06
【特約分享】新年去始創 食盡中、日、國際賀年佳餚
2020-01-13