食完暖笠笠!冬天必食八大羊腩煲
2021-12-24

冬天終於正式開始,望住不停翻滾及冒煙嘅羊腩煲、加埋索晒汁嘅腐竹同生菜真係流晒口水,同朋友或家人圍住張枱食就最溫暖喇!今次開飯仔介紹八間羊腩煲餐廳畀大家,睇吓邊一間啱你心水就bookmark喇~

皮爽肉腍羊腩 聚味軒

 圖: 大頭ANote7Fung

主打粵式小菜及火鍋嘅餐廳,當然唔少得人氣羊腩煲~呢度嘅羊腩大大件,皮爽肉腍,最重要係個湯底濃郁得嚟唔會太鹹,最後仲要加埋薯粉索汁,係全個羊腩煲嘅精華呀!

性價比超高 強記小廚

 圖: chloehahahaha

港式大排檔,呢間羊腩煲無論羊肉定支竹嘅份量都好多,價錢又公道,配料包括馬蹄、枝竹及生菜等,不過呢間啲羊肉炆得入味又無咩羊騷味,可能會比較適合食羊初階者。

奶白色湯底 鋒記小炒王

 圖: AshleyCheung105

唔少人都專誠揸車去食嘅羊腩煲!鋒記嘅羊腩煲特別之處湯底呈奶白色,帶有陣陣魚肉鮮味,味道更有層次,盡顯誠意。 配料包括枝竹、冬菇及筍,冬菇入晒味令人驚喜。

50年老店 珠江酒家

 圖: kent1012

主打港式小炒嘅街坊老店,已經有50年歷史招牌古法羊腩煲係人人必試嘅菜式。羊腩軟腍入味,帶有濃濃嘅羶香,鍾意食羊嘅朋友不可錯過。想再邪惡啲,最後記得加個公仔麵落去一齊食呀。

濃郁羊腩煲+自家製炸魚皮 標記樂園潮州粉麵菜館

 圖: 餐廳Facebook

一間主打潮州菜嘅餐廳,今個冬天都有羊腩煲食!羊腩煲連皮帶骨,肉質都軟腍,羊羶味適中。另外記得叫埋自家製鮮炸魚皮,口感鬆脆,將香脆嘅魚皮浸落羊腩煲個汁食真係無得輸呀。

自家製醬汁 基隆茶餐廳

 圖:  alva cheng

可以外賣或堂食嘅羊腩煲,仲會送一份生菜。呢間特別在於會於羊腩煲內加入青蔥、馬蹄及自家製醬汁,惹味得嚟又可以減低羊羶味,同樣啱平時怕太羶味嘅朋友。

米芝蓮推介 增煇大排檔 & 增煇藝廚

 圖: cfwong0309Barryba

米芝蓮推介嘅馳名小炒店,同樣唔少人都會慕名去試佢哋嘅羊腩煲。羊腩啖啖肉同好嫩滑,湯底濃稠適中,帶有酒香及甜味,配料有齊枝竹、冬菇及馬蹄,一煲夠晒4至5個人食!

炭爐羊腩煲 星小宴

 圖:  KaKa522

望住個沙灘景食羊腩煲係咩感覺?黃金海岸呢間粵菜一樣有羊腩煲食,而且仲要用炭爐,肉質偏腍身,入面嘅粉葛入味又爽脆,而且喺呢個咁有情調嘅氛圍下食羊腩煲真係別有一番風味。


文: Yanica

關鍵字
羊腩煲
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
1天前
【2022生日優惠】持續更新!5月壽星+指定月份補祝生日 嘆火鍋78折起
2022-04-29
晚市堂食恢復!最新酒店自助晚餐一覽 低至78折、龍蝦/海膽主題
2022-04-20
好消息!6間老店/人氣小店 結業重開
7天前
8大必試片皮鴨!超平$178/隻、特色北京填鴨三食
2022-04-27