韓國人氣打卡甜品店，主打草莓奶油捲嘅LE BREAD LAB上年由韓國登陸尖沙咀後，嚟緊會進駐港島區，喺銅鑼灣開設旗艦店，仲要帶嚟韓國熱賣嘅彩虹蛋糕！

舖頭裝修同尖沙咀店一樣，都係以粉紅色為主調，好啱一眾充滿少女心嘅女生嚟打卡同嘆返個甜品。

對各位粉絲嚟講，最開心莫過於係喺韓國熱賣嘅彩紅蛋糕，而家香港都有得食啦~~ 六層彩紅蛋糕相當之吸睛同靚仔，打卡一流！而且仲要係有外表又有內涵，蛋糕特選日本頂級麵粉，再用燙麵法製作，利用溫度將麵粉嘅筋性減到最低，食落口感好鬆軟，蛋香味亦十足。

情侶仔或閏蜜當然就揀mini版嘅小彩紅蛋糕啦，但如果多幾個朋友想一齊些牙嘅，就可以揀大個啲嘅經典彩虹雲朵蛋糕或者彩虹草莓蛋糕。

另外新增設嘅仲有熔岩蛋糕系列，分別有宇治抹茶、咖啡同伯爵茶口味。宇治抹茶選用丸久小山園嘅抹茶粉製作，色澤翠綠而味帶回甘；咖啡嗰款更加係用自家新鮮咖啡液製作，內裡紅色嘅蛋糕則係以天然紅麴粉調色，咖啡味醇香但唔苦，啲cream仲好light好滑，直情好似飲咖啡上嘅泡沫咁；至於伯爵茶就係用著名英國品牌Twinings嘅伯爵茶同其他紅茶調配而成，一路食一路傳出陣陣茶香。BTW，雖然個名叫熔岩流心蛋糕，但唔好期望太大諗住一切開就好壯觀咁啲流漿係咁湧出嚟，相反係好lady咁緩緩流出，食時亦可保持到儀態呀~

介紹多兩款飲品過你哋，係香港限定特飲嚟，一款係草莓多多，一款係檸檬小姐，兩款都帶有酸味，好啱迎接嚟緊嘅夏天。

相信開業後，一定會有唔少粉絲慕名嚟打卡同食甜品，不過舖頭座位唔多，主打外賣服務，各位大大自己mark time 啦~

LE BREAD LAB
地址：銅鑼灣波斯富街108-120號寶榮大樓地舖
正式開業日期：3月13日 5pm後

文、相、片：Kar