電競女神RoseMa開女僕café 親自駐場 施魔法蛋包飯 (有片)
2020-01-20

各位動漫迷注意啦~ 香港又多一間以動漫為主題嘅女僕café啦~ 仲要係由有「電競女神」之稱嘅模特兒Rose Ma所開,擇啱日子去嘅話仲有Rose Ma親自駐場添~

以藍、白為主色調嘅呢間女僕café,選址銅鑼灣,一入門口,搖一搖手鈴,就會馬上變身成為主人,由可愛嘅女僕帶位入座啦~ 餐牌上選擇以主食、甜品同特飲為主,另外仲可以同女僕影合照、睇音樂表演添~

「其實開女僕café呢個idea一直都有,幾年前我去日本,去女僕café嘅時候就已經覺得好靚、好fancy,啲女僕又好靚,女僕裝又好靚……直到幾個月前,有朋友有個諗法,不如我哋搞女僕café,然後就……突然搞咗呢間女僕café出嚟。」女僕長Rose Ma透露呢度大約有20個女僕,全部都由佢親自interview:「Interview時嘅條件就係佢哋都會講下自己有咩技能,有啲女僕會識得唱歌跳舞,有啲就畫畫好叻,有啲女僕都識日文嘅。最緊要我會睇佢哋肯唔肯學嘢,例如學煮蛋包飯、學沖咖啡、沖嘢飲。」

 蛋包飯 $88

蛋包飯上桌時,會由女僕蹲下,喺上面畫上可愛圖案,喜歡嘅話寫埋你個名上去都仲得!不過望住咁可愛嘅蛋包飯,都唔可以即刻食住㗎,仲要同女僕一齊施魔法念咒語先至可食得!

 (左)限定女僕DIY蛋糕  $58、(右)Tiramisu $42

甜品亦可請女僕畫公仔呢~

 絕對領域 $68 (每日特調梳打特飲)

 (左) 未聞花名 $68  (士多啤朵芒果沙冰 )、(右) 熱朱古力 $48

飲品方面,有沙冰、咖啡、朱古力等選擇,當中最特別嘅應該就係手沖咖啡,同埋每日都唔同嘅特調梳打~ 開飯仔採訪當日,就係呢杯海洋藍嘅絕對領域~

難得一場嚟到,當然要同女僕合照啦~ $40就有張即影即有或者手機合照啦~ 想同全體女僕合照都不是夢呀~ 只要你係壽星仔女,預早經OpenRice訂座,喺生日期前後三日內光顧,消費滿指定金額就可以有呢份「生日驚喜」啦~ (生日訂座優惠 按此

BTW,開心還開心,都有啲守則要留意返~ 例如唔可以同女僕有身體接觸、唔可以抄女僕牌等等,互相尊重先可以有個愉快嘅用餐環境呢~

最後,相信各位粉絲都好想知道Rose Ma 嘅駐場時間,女僕長表示自己每個禮拜大約會有2日都喺度㗎~ 至於當值時間表就要上返餐廳嘅官方Facebook搵喇~



從⋯異世界   
地址:銅鑼灣波斯富街21-27號2樓


文:Kar
相、片:Tom Li


關鍵字
cafe
女僕cafe
動漫
開飯星探
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06