雞蛋仔藝術節又返嚟喇 威士忌雞蛋仔+芋圓奶茶布丁
2019-03-26

雞蛋仔呢種經典嘅港式街頭小食,近年已經不停升lvl到有唔同嘅口味,更有商場每年都舉辦雞蛋仔藝術節,一次過集晒咁多款郵!今年,呢個雞蛋仔藝術節又嚟喇,多款新潮口味同場之外,仲加入咗其他以「蛋」為元素嘅菜式,好似蛋餅呀布丁燒呀咁,各位吃貨Mark低日子啦。

叉燒雞蛋仔  香港街食x好燒味

首創急凍雞蛋仔嘅網店,連同新派燒味店聯乘合作,推出活動限定嘅叉燒雞蛋仔!呢款雞蛋仔方便在於,唔一定要喺街先食到呀,買到返屋企再用焗爐焗一焗先食都得~ 蜜汁燒味撈落雞蛋仔度又幾過癮。另外,仲有期間限定嘅陳皮雞蛋仔同威士忌雞蛋仔,前者甘苦而後者帶淡淡酒香,好新嘅體驗!

避風塘櫻花蝦鹹蛋王    Cubus 28

新派中菜廳一向主意多多,今次就推出黑松露磨菇、避風塘櫻花蝦鹹蛋王等新口味,後者食落鹹香惹味,好似食緊中菜咁。

阿華田脆脆麻糬 ICE PUFF

呢間餐廳主打以Gelato 雪糕配雞蛋仔,今次就4款新口味,包括流心蜂蜜伯爵茶、阿華田脆脆麻糬、70%黑朱古力藍莓同pizza版!開飯仔試過阿華田嗰隻,好脆口,每粒都有煙煙韌韌嘅麻糬,又幾好咬口。

大白兔糖   茶作

前排興起一陣大白兔糖雪糕嘅熱潮,茶作就即刻為大家帶咗嚟喇。雞蛋仔配大白蛋糖味雪糕,諗起都甜~  另外,當然唔少得同茶嘅結合啦,鳳凰單樅茶同大紅袍朱古力等茶味雞蛋仔都有,以茶葉混製漿,自然滲出陣陣茶香。

冰火雞蛋仔 喜茶

想試喜茶唔一定要去舖頭排隊嘅,今次活動都有呀!除咗有新出嘅MINI喜茶外,仲有香港限定小食,冰火雞蛋仔~

 火焰鰻魚起司玉米蛋餅   Check-In Taipei

新式台灣料理餐廳攤檔則有兩款蛋餅同幾款甜品,蛋餅分別係火焰鰻魚起司玉米同芋泥鹹蛋黃肉鬆,前者睇住佢同火槍燒溶芝士再放上成條大鰻魚,堅係會令人食指大動嘅。至於甜品,則係芋泥士多啤梨蛋糕杯同芋圓奶茶布丁等,前者一層一層咁幾多料,好豐富!後者嘅奶茶布甸奶味偏重,口感順滑。

酥皮雙層芝士蛋糕   酥妃皇后

以368層酥皮蛋撻聞名嘅餅店,蛋撻梗係有帶埋嚟啦,仲有多款賣相靚靚嘅雜堅果楓糖酥撻同tartcake,有啲仲好似星球鏡面咁。另外芝士控唔好miss咗佢哋嘅酥皮雙層芝士蛋糕啊!

Baileys甜酒布丁燒   呦呦鹿鳴布丁燒

葵廣小店過咗海嚟參展,帶嚟主打嘅布丁燒,原味以外,Baileys甜酒或榴槤味都好值得推介,

食咗咁多嘢都會口渴嘅~ 香港地同金茶王都分別地提供即沖港式奶茶兼特色飲品,前者有蛋白奶茶、小朋友鴛鴦等,後者則有滾水有機蛋、奶水有機蛋。

「利園雞蛋仔藝術節 - 七人欖球升級版」活動詳情
日期:   3月30日至31日(星期六至星期日)
時間:   上午11時至下午7時
地點:   銅鑼灣利園一期地面私家路(希慎道33號)


文、相、片:Kar



關鍵字
灣仔
雞蛋仔
甜品
芋圓
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01