好多打工仔都忙到無時間食飯，好多時都求其食個快餐頹飯就算。中環最近就開咗間新嘅健康飲品店，主要供應各款由鮮果製成、有唔同功效嘅健康飲品，由負責人Rocky同佢嘅拍檔Danny 開設，佢地話而家好多都市人其實對健康都有要求，但基於時間有限，就力不從心。所以佢地希望可以製造到一杯健康，又可以短時間補充能量嘅飲品。
由於Danny之前係喺大酒店到製作飲品，所以對於水果好熟悉之餘，店舖仲可以拎到嚟自世界各地最新鮮嘅水果。佢地話「就算同一款生果，嚟自唔同國家味道可以好唔同，對飲品味道嘅影響都好大。」
Spring Clean($42)
至於點解選擇smoothie而唔係果汁，Rocky話水果榨成果汁後，只會剩底水同果糖，但Smoothie就可以保留到水果嘅營養同纖維，人體可以最快吸收到。就好似呢款Spring Clean咁，有紅火龍果、芒果同多款橙，有清腸胃同清宿便功效。而且對於飲品外表都好講究，製成兩層就啱哂打卡啦！
High Energy Crush($42)
呢款就係由芒果、熱情果及菠蘿製成，有豐富維他命C ，可以補充能量。每款水果嘅份量都係經過長時間考慮，例如一啲甜啲嘅就會配酸啲咁。
Beauty Bomber($38)
女士們飲呢款就啱啦！有紅提子、藍莓同奇異果，高抗氧化同維他命C，對皮膚修補好有效。
更多【新店直擊】： |
Morning Glory($48)
平時無咩時間食早餐，可以試下飲返杯Morning Glory。呢款係一杯功能性飲品，由牛油果、香蕉、燕麥同牛奶打成，飲完都幾飽肚，可以撐成個朝早架～
Dare to Detox($38)
Dare to Detox係冷泡水果茶，因為無加任何糖水，所以就一定無坊間嘅水果茶咁甜。選用印度庄園嘅茶葉，再加入唔同水果冷泡24小時，再加入蜂蜜，飲落去會有淡淡水果同蜂蜜香。
仲有三款即將會推出嘅水果牛奶系列，有紅火龍果、木瓜同芒果口味，外層呈現雪花效果，味道好得嚟又係啱哂打卡！
地址: 中環干諾道中8號遮打大廈114鋪
文、相、片: Yanica