關東煮自助吧+暖笠笠美人鍋 大角咀新開居酒屋(有片)
2018-12-10

天氣終於轉涼,放工最啱同三五知己去日式居酒屋飲返杯再食關東煮!大角咀呢間新開嘅居酒屋就特設關東煮自助吧,畀大家睇住任揀心水煮物。仲有即燒串燒,同有美顏功效嘅美人鍋等推介,呢個冬天唔怕凍啦!
 



東京大眾酒場大角咀新店日前開業,最特別嘅係一入大門就見到嘅關東煮自助吧,可以喺入座前先揀好想食嘅食材。關東煮湯底熬煮五個鐘以上,隨住蒸汽聞到可以陣陣鮮香。
 


關東煮($12-$18)

關東煮有唔少選擇,首推日本魚肉包心燒賣($12),顧名思義裡面係柔軟彈牙嘅魚肉,魚肉香同鮮甜帶少少鹹味嘅湯底好夾。而日本蒟蒻($12)同野菜卷($12)都非常入味,前者彈牙,後者有層層湯汁,食落滿嘴鮮甜。
 


玉子福袋($18)

兩款福袋都非常吸引,福袋($18)裡面係煙韌年糕,而玉子福袋($18)裡面係半熟溫泉雞蛋!半熟嘅蛋白非常滑溜,加上八成熟嘅蛋黃香味濃郁,係另一款必試關東煮!
 


(左至右)關東煮醬汁:赤味噌、西京味噌、麻辣醬、黃芥末醬

點關東煮嘅話可以搭配四款特製醬汁!最百搭嘅係黃芥末醬,可以配任何食材;赤味噌發酵時間較長味道濃郁帶少少辣,適合配比較清淡嘅食材;西京味噌加入桃汁熬製味道帶甜,最啱配魚肉為主嘅食材;而麻辣醬就專為無辣不歡嘅食客而設,搭配豬肉、牛肉同內臟更滋味。
 


(左至右)日本和牛串($28)、明太子雞肉串($15)、梅子紫蘇雞肉串($15)、大蔥串($12)、日本雞翼($28)


芝士煙肉焗大啡菇($35)

嚟到居酒屋點可以無串燒呢?多款串燒同燒物都係即叫即燒,仲會用備長炭烤爐奉上,冬天食都唔怕串燒好快變凍。而芝士煙肉焗大啡菇咬落非常Juicy,配埋香口煙肉同芝士,係無得輸嘅配搭。
 

更多【新店直擊】:
1. $68鰻魚飯 日本人氣連鎖鰻魚專門店登陸尖沙咀 香港Menu率先試
2. 深水埗新開馬拉茶啡廳 必試肉骨茶、奶油蝦、藍花飯
3. 特濃龍蝦湯底+灸燒叉燒 灣仔抵食博多風拉麵

 

美人鍋($188)

想再暖笠笠啲,就一定要點呢個美人鍋。湯底係用雞件同蔬菜熬成嘅雞白湯,口感濃厚帶濃郁鮮味,單飲有少少過鹹,但用嚟配嫩滑雞肉、新鮮蔬菜同彈牙嘅烏冬就啱哂!
 


雞白湯同雞肉都含有骨膠原,有養顏功效。而且呢一鍋分量亦唔細,當然要一齊開心Share。
 


自家製梅酒(開張期間訂座免費贈送,$38/杯)

新店開張期間,打電話訂枱會送一杯自家釀製梅酒!帶梅子清香,唔會太嗆而且味道清雅,非常容易入口。
 


(左)靜岡綠茶可樂($28),(右)完熟桃子梳打($28)

酒精飲品以外亦有一系列日本梳打同波子汽水。餐廳裝修亦係全日式風格,好似三米高嘅手繪牆身,天花板嘅日式燈籠等,連電視都係全日同步播放日本電視台節目,真係好有去咗日本居酒屋嘅感覺呀!
 





東京大眾酒場
地址:大角咀利得街11號利奧坊地下G504號舖




文、相、片:Cathy

關鍵字
大角咀
日本菜
關東煮
美人鍋
串燒
梅酒
居酒屋
東京大眾酒場
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-04-01
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
6天前
尖咀Omakase 獨創三文魚子海膽日式糯米飯 新開業優惠 第2位半價
2020-03-19