長洲美食豪華團出發！ | OpenRice 香港開飯喇

長洲美食豪華團出發！

2016-07-05

漫漫長暑假又嚟到，望著身邊豬朋狗友去晒旅行，自己就只可以摸著空空如也嘅銀包，乖乖地留喺香港？唔緊要，去幾日長洲都可以當度假嘅。嗰度大海環繞、有單車踩、有古蹟睇、仲有周街特色小食等你品嚐，平平地都食到好多好嘢，成個豪客咁款，所以長洲賓客人數多係有一定原因嘅。

大大粒魚蛋　　甘永泰魚蛋

Photos by Small.Potato
甘永泰可以喺芸芸長洲小食店突圍而出，自然有佢優勝之處。呢度嘅魚蛋係即叫即炸，所以食落新鮮滾熱辣，炸皮煙韌香脆，魚肉口感彈牙結實。除咗大魚蛋外，仲可以試吓佢嘅炸豆卜、芝士丸、鯪魚球等，全部都新鮮即炸，非常香口。

蠔食帶子　　快快美食

Photos by zoezoessy
係芝士焗生蠔同帶子啊！喺長洲鬧市見到佢哋的確係幾特別。佢嘅帶子同生蠔相對比較細，但係就用料豐富，釀以大量洋蔥、煙肉，再用芝士焗成金黃色，谷到脹卜卜咁，賣相吸引。

日本人自製手卷　　故鄉俱樂部

Photos by 陸月妹

聽聞店主係移民到香港嘅日本人，原汁原味，所以整手卷有一定嘅水準。有別於一般手卷，佢只係用咗一啲好普通嘅食材，好似腸仔、蟹柳咁，但勝在紫菜香脆，加咗嘅沙律醬又同壽司飯同埋食材出奇地夾，有化腐朽化為神奇嘅感覺。另外最出名嘅就係紅豆餅，紅豆餡好豐富，最新仲出咗芝士紅豆味，不過都有唔少人話唔夠熱辣辣，無以前咁好。

家常小菜　食得樂

Photos by billychan0512

Photos by billychan0512
因為唔係座落喺遊客區，所以較少人會聽過佢嘅名，卻係本土長洲人會去嘅小店。呢度有小菜食，好似蒜片焗牛粒、泰式八爪魚等，而且仲可以打邊爐，店家提供嘅用料都好新鮮。如果想食海鮮嘅話，可以自己去買，交低畀老闆整，可能因為佢凡事親力親為關係，所以食落特別有家常菜味道，不失為度假好嘅落足點。

足料沙嗲牛通　通記

Photos by hotdog241

Photos by beverlyyxbehlei
最出名係沙嗲牛通，就咁睇賣相都feel到佢濃濃嘅沙嗲味，加埋花生，成個湯底都好香，鮮牛又新鮮又嫩，而且份量十足。另外佢賣嘅鮮魷魚亦好爽口，味道鮮美，唔洗沾醬都一樣入味。

文：段

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。