鑊氣爆棚 !重拾大排檔風味!
2019-08-30
大牌檔係香港嘅一個特色,亦係香港重要飲食文化之一,「大排檔」一詞二零一六年更比《牛津字典新增詞彙》(Dai Pai Dong),可見其受歡迎程度!

大排檔小炒以即叫即炒為主,大牌檔師傅會將食材放係火爐嘅鑊上,拋起拋落,係分秒之間利用猛火昇華食物嘅味道,烹調出「有鑊氣」嘅菜式,讓食客享受到熱辣辣又色、香、味、形俱全嘅大排檔小炒!

金牌源記大排檔 (深水埗)       
現今香港大牌檔因爲唔再發牌同傳承問題,少一間就無一間,所以正宗港味嘅鐵皮屋鑊氣小炒買少見少,想體驗翻50,60年代嘅正統大排檔就要嚟依到啦!源記保留大排檔特色,廚房都係街邊,食客可以睇住師傅即場煮,一煮完即刻品嚐鑊氣小炒!

源記小炒王
蝦乾,銀魚仔,魷魚 等等材料炒到鹹鹹香香,加上鑊氣十足,用來送啤酒冇得頂!

脆皮炸大腸
大腸去除咗部份脂肪,炸到香脆又唔會太乾,真係少啲功夫都唔得,再點埋甜酸醬一齊食,有助去除油膩感!

菠蘿生炒骨
一道色、香、味俱全嘅生炒排骨,好睇又好食,排骨咬落仲皮脆肉嫩,酸酸甜甜,有果香,正呀!

蜜椒薯仔牛柳粒

充滿大排檔風味,勁有鑊氣!青椒紅椒炒到香噴噴,薯仔皮脆餡軟,牛柳粒甜而不膩!

源記海鮮小廚 (荃灣)   
荃灣嘅二坡坊出名多高質鑊氣小菜食,而源記就以潮州海鮮打冷小菜為主,除咗食物質素高外,老闆更會每個月第一個星期日為65歲以上長者提供免費飯盒,希望回饋社會,絕對係良心食肆!

源記尚品菜
非常精緻嘅菜式,嫩滑嘅莧菜加上斑球、蝦球、素翅同瑤柱熬製而成嘅汁,再加埋蟹子,口感同鮮味都十足! 

秘製辣子雞
一上枱就香氣十足!師傅用上花椒油、指天椒同秘製香辣醬炒炸到酥脆嘅雞肉,香而不辣,鍾意食辣嘅朋友仲可以加辣加麻,絕對滿足到想食火辣辣大排檔風味嘅您!

脆皮豬手
一咬落去「卡滋卡滋」,豬皮超脆,肉面嘅肉又保持到肉汁,香口又滋味,配埋芥茉醬食,味道更昇華去另一個層次,大人細路都會愛上!

蜜椒薯仔牛柳粒 
牛柳粒食落入味又唔會韌,薯仔面頭夠乾身,內裏夠滑,每啖都滿口甜蜜蜜,係必食菜式之一!


心動不如行動!有興趣就快啲約埋三五知己去嘆下美食啦!快啲bookmark定啦!

*以上圖片只供參考,所有食品以實物為準. 食品供應因餐廳而異

相、文:Tiffany

關鍵字
大牌檔
香港
特色
鑊氣
小炒王
牛柳粒
炸大腸
二坡坊
辣子雞
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13
迎接全新2020 1-2月下午茶推介
2020-01-06