鋪滿幸福感!灣仔日式果撻專門店新登場(有片)
2017-10-17

各位甜品控有新目標啦!呢間喺灣仔利東街新開張嘅日式果撻專門店,單睇玻璃櫥窗裡面嘅顏色鮮艷嘅果撻賣相已經足夠令人流口水。九款唔同口味嘅撻同批每日新鮮製造,配多杯有得意拉花嘅Latte,又係一個完美嘅下午茶。
 

PdP Pies & Tarts同主打日式疏孚厘班戟PAN de PAIN Pancakes & Sweets係姐妹店,主打時令水果撻同批,地下以外賣為主,堂食就可以上二樓,裝修以Tiffany Blue同木色做主調,感覺優雅舒適。
 

九款口味材料都非常豐富,想食Light啲嘅話可以選擇食季節限定嘅Grape Tart,一粒粒切半青提食落清甜多汁,連埋下面嘅忌廉、吉士、海綿蛋糕同曲奇餅底一齊食亦唔會覺得過於甜膩。
 

而Strawberry Tart唔單止喺撻面,吉士裡面亦有士多啤梨果肉。而且值得一讃嘅係雖然而家唔係士多啤梨嘅當造期,但因為店家用嘅鮮果都係每日入貨,士多啤梨比想象中甜而唔會酸。
 

而店裡面最受歡迎嘅就係呢款Banoffee Pie,暫時係唯一一款批,所以細心留意嘅話佢嘅餅底係消化餅而唔係曲奇。而上面有朱古力脆脆、拖肥醬、香蕉片、忌廉、朱古力海綿蛋糕,最後再用香蕉片鋪滿撻面。食落比以上兩款水果撻甜,但因為味道層次亦相對豐富,所以自私食完一件都唔會太Heavy。
 

更多【新店直擊】:
1. 宜家荃灣店限定 $3焦糖海鹽雪糕
2. 北京烤鴨店攻港 三吃片皮鴨配爆炸糖?
3. 西環抵食泰式船麵小店 集百家大成秘製風味(有片)

 

另外仲有Mango、Orange & Grapefruit、Mixed Fruit、Mixed Berry、Tiramisu同Mont-Blanc口味嘅Tart,可以選擇切件同原個。
 

除咗撻同批之外,堂食仲可以選擇試呢份Eton Mess,係一款英式甜品,以鮮果、蛋白霜同忌廉為主。雖然賣相就無其他果撻咁色彩繽紛,但裡面有士多啤梨、藍莓、提子、芒果、蘋果等水果粒,配幼滑輕盈嘅法國忌廉一齊食相當討喜。
 

嚟食甜品嘅話不妨叫多壺茶或者配返杯咖啡,呢度嘅咖啡豆係特別從日本沖繩入口,香港暫時只有呢間果撻店同尖沙咀嘅PAN de PAIN Pancakes & Sweets先飲得到。
 

而抹茶控最愛嘅Matcha Latte用嘅亦係宇治抹茶粉,睇顏色就估到用料十足,抹茶味道非常香濃。加埋得意拉花圖案,相機同味蕾同樣滿足。
 

溫馨提示返因為食材同人手始終有限,所有批同撻都係限量供應,如果想試到心水口味,建議大家盡量喺19:00前嚟到。而想食原個果撻嘅話,亦最好喺48小時前預訂啦。
 




PdP Pies & Tarts

灣仔皇后大道東200號利東街地下G06及 F06A號舖




文、相、片:Cathy

關鍵字
灣仔
利東街
甜品
香蕉拖肥
日本菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
2019-09-09
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03