銅鑼灣過江龍泰式船麵$12就食到! 正宗配方新鮮熬製湯底
2019-04-29
泰式船麵點解叫船麵?其實船麵起源自泰國水上市場工作嘅潮州人,湯底通常加入滷水同豬血做成,香料味濃郁,係當時勞動工人常食嘅食物。船麵喺泰國成為熱門街頭美食,近年亦喺香港興起。最近銅鑼灣又新開咗一間過江龍船麵,喺泰國有成50間分店,香港店老闆曾經去泰國學師三個月,無論熬湯、汁醬、定煮麵技巧都非常正宗,而且最平$12就有交易,好抵食㗎。


呢度嘅秘製湯底以正宗泰國配方製作,用上牛骨、豬血、斑蘭葉、枸杞、刺芹等熬成,每日新鮮熬製8個鐘頭,色澤呈深褐,藥材味濃郁,味道鮮甜帶微微辣味。 

 
呢款船皇湯麵超級足料,有齊牛腩、豬肉、雞絲、豬肉丸同牛肉丸。豬肉丸同牛肉丸都係泰國製作嘅手打丸,質感爽口。而牛腩每日新鮮燜製3個鐘,吸收咗秘製湯底嘅精華,肉質濕潤軟腍。雖然款船皇湯麵無細碗版選擇,但其他配料嘅湯麵都有得揀$12細碗版,抵食又正宗。


麵底方面有四款選擇,分別係蛋麵、金邊粉、米粉同河粉。蛋麵掛湯功力唔錯,但同時吸湯吸得好快,建議要儘快趁熱食完啊。



除咗常見嘅湯麵,仲有撈麵版船麵。撈麵加入泰國製作嘅秘製辣醬,食之前撈勻醬汁,味道偏鹹,香辣惹味,適合重口味朋友。呢度嘅河粉亦比較特別,較大片同厚身,口感厚實,富有泰國特色。



小食方面,呢度嘅炸豬皮亦係由泰國空運到港。豬皮先喺泰國曬一個星期,將所有水份蒸發,到港後再用油炸香,酥脆香口。


泰式單骨雞翼食起嚟好方便,外皮香脆,點泰式酸辣醬食幾開胃。


而呢度嘅串燒精髓就在於秘製沙嗲醬,同辣醬一樣都係由泰國入口,沙嗲味香濃。


食泰式嘢當然唔少得泰式奶茶同龍眼冰啦。呢度嘅泰式奶茶叫做「泰仔奶茶」,個名幾得意,而且味道正宗,以手標紅茶沖調。為咗迎合香港人口味,奶茶甜度仲特登減半,味道甜而不膩,茶香濃郁。


龍眼冰就清甜解渴,係夏天消暑佳品。裝飲品嘅碗都係由泰國入貨,有泰國風味之餘,用嚟影相打卡都幾特別㗎。



地址: 銅鑼灣謝斐道526號地舖


文、相:Kenna

關鍵字
船麵
泰式
泰國
撈麵
銅鑼灣
牛腩
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2021-05-03
【2021生日優惠】持續更新!5月食日本直送海鮮送西班牙紅/白酒
2021-05-07
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15