銅鑼灣新開高質鐵板燒 必試和牛三文治、煙燻帆立貝(有片)
2019-08-28

食鐵板燒唔單止係味覺嘅享受,更加係一種特別嘅體驗。銅鑼灣呢間新開嘅日式鐵板燒餐廳就從唔同細節著手,食材九成從日本空運到港,食客可以坐喺吧枱欣賞有超過10年經驗嘅師傅即場烹調,擺盤亦甚有講究,令菜式色香味俱全。
 


虎鐵鐵板燒位於銅鑼灣,主打鐵板燒套餐,由$1980/2人份至最豪嘅$2980/2人份任君選擇,部分菜式亦可以單點。22:00後小食仲有優惠價,配埋買一送一嘅清酒就最啱!
 



熊本產A5和牛三文治($428)

選用日本熊本縣A5級和牛西冷,簡單用少少鹽同胡椒調味,肉味已經非常濃郁,啱啱好煎至半熟,雪花油脂入口即溶!和牛三文治嘅麵包亦以鐵板煎至香脆,口感豐富。旁邊嘅和牛粒就可以選擇點微辣刺激嘅山葵,或者喜馬拉雅山岩鹽享用。
 


煙燻帆立貝(鮑魚二人套餐內提供,單點$168)

煮嘅時候已經聞到陣陣菊花清香,原來用咗胎菊、白菊同日本菊花煙燻日本北海道最大Size嘅帆立貝,賣相同香氣都好突出!帆立貝口感彈牙味道鮮甜,食完帆立貝再食旁邊嘅紅酒菊花啫喱,令口腔充滿清新嘅菊花香氣。
 


海膽松露蒸蛋(虎鐵晚餐/廚師推介晚餐/海鮮盛合套餐/鮑魚二人套餐內提供,單點$58)

精緻而令人難忘嘅前菜之一,用日本雞蛋蒸至半熟,再加上日本北海道利尻海膽、松露同金箔,鮮味、香味同賣相都更上一層樓。本身蛋黃嘅香味亦相當濃郁。
 


南極犬牙白鱈魚(虎鐵晚餐/海鮮盛合套餐內提供,單點$238)

選用南極罕見嘅犬牙白鱈魚,食落口感更柔嫩。魚肉煎至半熟再放到自家製洋蔥湯裡面焗熟,洋蔥湯味道香甜,魚肉吸收晒湯嘅甜味。師傅煎魚嘅時候更特別將魚皮同一層皮下脂肪批出嚟再煎,最後插返喺魚肉上面。特別係魚皮煎到好似薯片咁薄咁脆,好加分。
 

更多【新店直擊】:
1. 黃婉曼開健康概念烘焙餐廳 嘆手工麵包加豐富早午餐
2. 必試濃郁抹茶軟雪糕、氣泡檸檬抹茶 旺角新開日本茶Cafe
3. 幸福Pancake首次進駐九龍!尖沙咀新店限定宇治抹茶濃厚慕斯班戟

  

海膽炒飯(虎鐵晚餐內提供,其他套餐追加$250/1人份、$500/2人份)

海膽多到滿瀉啊!炒飯底用日本新潟米,粒粒飽滿分明。同配料炒香後加上近半板北海道利尻海膽同三文魚子,啖啖海鮮鮮甜味。
 


法國鴨肝(廚師推介晚餐內提供,單點$128)

師傅將法國鴨肝同青蘋果片一齊煎香,法國鴨肝油脂豐富口感細膩,煎過後入口更加係入口即溶。而青蘋果同意大利黑醋就可以解膩。最後可以食埋師傅特別配搭嘅焦糖青檸,香脆多汁而酸爽,幫大家清清味蕾。
 


法國鴨胸脆卷(鮑魚二人套餐內提供,單點$168)

靈感嚟自北京填鴨,主角就改為法國鴨胸肉,同大蔥一齊用薄餅卷起煎香,口感外脆內嫩。配搭用日本有馬山椒同醬油製作嘅醬汁,獨特嘅麻辣香味會令你對呢個脆卷印象深刻。
 


梳乎厘班㦸(虎鐵晚餐內提供,單點$128,需預約)

近年大熱嘅梳乎厘班㦸呢度一樣搵到!空氣感十足嘅班戟口感好似梳乎厘咁輕盈鬆軟,配埋紅豆蓉同雪糕一齊食就更滿足。慶祝紀念日嘅話更可以請師傅寫指定字句,打卡一流!
 





虎鐵鐵板燒
地址:銅鑼灣軒尼詩道525號澳門逸園中心12樓




文:Cathy
相、片:Tom Li

關鍵字
銅鑼灣
鐵板燒
和牛三文治
海膽炒飯
虎鐵鐵板燒
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
1天前
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24