銅鑼灣新開高質和牛燒肉店 創新體驗燒肉料理 必試A5和牛三文治
2019-05-08

牛魔王、燒肉控通通都要嚟報到喇。開飯仔收到通知,有日本頂級靚牛到咗香港,喺銅鑼灣登陸呀!東京名店「蕃 YORONIKU」創辦人,名廚桑原秀幸(Vanne Kuwahara)主理嘅「和牛蕃」,主打豐富大理石油脂花紋嘅日山和牛,呢款牛嘅油花均勻、肉味同脂香都濃郁豐厚,加上師傅創意十足,精選各個和牛部位配搭唔同嘅醬汁同食材,令各位牛控都有嶄新而驚喜嘅燒肉料理體驗。

餐廳有單點同套餐嘅選擇,唔想揀又想食得最多款牛嘅,梗係揀餐啦。其中Vanne Dinner Set B仲可以食到餐廳嘅招牌作日山A5和牛三文治!btw,大家唔使擔心自己「廚藝不精」,每枱都會有專人代燒㗎,仲會按個人口味調節生熟度,係細心㗎呢~

套餐先有擺碟精美嘅前前菜,鳥籠內三件小點分別係混合咗日、法意式嘅又脆口又爽彈嘅脆炸墨魚、鬆化口感又帶鮮甜嘅北海道帶子配鴨肝伴魚子醬脆餅,同埋清香滑口嘅和牛啫喱配粟米燉蛋。唔好睇少呢道菜,都幾多功夫,將粟米同雞蛋製成茶碗蒸後,加入牛骨、牛肉碎炒香再煮兩三日變成和牛清湯,最後加工先製成爽滑又滲有鹹香嘅和牛啫喱。

 前菜:蕃茄配黑椒醬油,清新開胃

開咗個胃後就開始正式進入和牛嘅世界喇,先嚟A5和牛多士配蛋黃醬伴魚子醬同和牛海膽壽司。前者口感同味道嘅層次都相當豐富,多士激脆口,以牛柳同西冷部位混製嘅和牛他他嫩滑細膩;至於後者,海膽鮮甜就唔使講,圍邊嘅係罕有嘅和牛肉眼邊,油花平均而肉味濃,一啖入口就係滿滿der幸福感。

由細節位可睇出餐廳充份運用到各種食材嘅特點,好似牛舌咁,唔同部位唔同切法,就有完全唔同嘅口感。薄片牛舌芯肉質爽口,配麻油、青蔥等食係幾香,但落少少好喇,如果加得太多配料反而有機會搶咗原本嘅肉香啊;長條形嘅牛舌後端位,則比較軟腍,配特選鹽漬昆布,鹹香中更突顯肉香。

 湯品:和牛牛尾湯,湯香肉腍

醬汁嘅配搭同運用亦係加分位,黑毛西冷一牛兩食,一半配蒜片一半配大根蓉,係兩種截然唔同嘅感覺,前者濃香、後者清甜。

招牌A5和牛三文治當然係重點,侍應會即席喺客人面前切割炸好嘅牛肩蓋肉、搽上特製嘅酸甜醬汁夾成三文治,油花同肉汁同時喺口中爆發。

另一道教人期待嘅菜式應該就係和牛配黑松露嘅Shabu Shabu喇。今次揀嘅位置係肉眼位,喺秘製壽喜燒湯汁中涮幾涮,再配埋湯汁、蛋黃汁、即刨意大利黑松露薄片拌勻食,又滑又香,同樣都係味道豐富嘅一道菜式。

 火炙日式生牛肉飯,香口惹味

每餐都要有甜品作結先完美(好似係),和牛宴都唔例外,和牛甜品就冇喇,不過有刨冰,可揀京都綠茶醬或者得香港先有嘅鹹蛋黃味,堅係有粒粒蛋黃粒喺上面㗎,有啲似食緊奶皇冰皮咁啦,都幾特別。另外亦有其他甜品選擇,全部賣相都好精緻。

和牛蕃
地址:銅鑼灣謝斐道535號Tower 535 1樓


文、相、片:Kar

關鍵字
銅鑼灣
和牛
燒肉
日本菜
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
1天前
4月份好評餐廳十強
2019-05-07
實現夢想 開一間聯繫社區嘅咖啡館 上水獨立Cafe粉嶺重開(有片)
2019-04-29
泰國手標奶茶登陸香港!銅鑼灣ChaTraMue旗艦店直擊(有片)
2019-04-25
銅鑼灣設全港首間日本酒放題 逾100酒款 最平$98可任飲
3天前