北歐係一個充滿神話色彩嘅國度，而尖沙咀呢間酒店餐廳，以此為題推出全新嘅「北歐神話饌嚐之旅」下午茶。每款鹹甜點分別代表一個北歐神話角色或國度，充滿故事性，而鹹點更選用多款海鮮入饌，食落好鮮味。

下午茶用2個金色層架分別盛載10款鹹點同甜點，感覺好優雅。為貫徹北歐人鍾意餐前先飲1杯小杯調酒嘅習慣，餐廳呈上紅色迎賓特飲揭開下午茶序幕，味道略甜，酒精度數低，好啱嗜甜嘅朋友。

5款鹹點以海鮮入饌

刁草漬三文魚脆餅代表北歐神話中眾神嘅居所Ásgarðr（亞斯格特）｜香烤北海道帶子代表「霧之國」Niðavellir

味道較淡身嘅刁草漬三文魚脆餅，係歷史悠久嘅嘅經典北歐盛宴菜式之一，三文魚醃漬一晚後，入口清香軟滑。而為咗展現「霧之國」Niðavellir（尼福爾海姆）終年充滿濃霧同寒冷嘅感覺，香烤北海道帶子特別以厚肉嘅北海道帶子入饌，略煎後配上雷莫拉德蛋黃醬幾開胃。

圓形嘅三文魚子蟹肉羊肚菌酥皮盒，代表賦予萬物生命嘅華納神族Vanaheimr（華納海姆）

帶脆口感覺嘅鹹點則有3款，其中三文魚子蟹肉羊肚菌酥皮盒咬落酥脆，內藏唔少蟹肉。

冰島海蝦蛋黃醬牛角包代表長年結冰嘅巨人國度Jötunheimr（約頓海姆）｜自家製瑞典煙肉薯丸代表永夜場所海姆冥界Hel

另外冰島海蝦蛋黃醬牛角包有滿滿嘅蝦肉，清甜爽口；而自家製瑞典煙肉薯丸係瑞典傳統小食，內藏嘅煙肉切到好細，炸起外脆內軟。

5款甜點鮮艷奪目

雲呢拿吉士柑橘撻代表神話嘅原始世界Múspellsheimr（穆斯貝爾海姆），即「火之國」Flameland｜杏仁奶油泡芙代表Álfheimr（亞爾夫海姆），即由女神芙蕾雅統治嘅精靈之家

嚟到甜點亦充滿故事性！相傳奧丁曾經擷取穆斯貝爾海姆嘅火焰，製作成漫天星辰，所以用色彩鮮艷嘅雲呢拿吉士柑橘撻代表以火焰製成嘅太陽，味道柔和唔會過甜，帶輕微嘅橙香。而入口清甜嘅杏仁奶油泡芙好多人都鍾意食，好似人見人愛嘅精靈。

是日甜品色彩繽紛

北歐神話中仲有人類生活嘅國度Miðgarðr（米德加爾特），以冰、火、空氣構成嘅三色彩虹橋Bifrost連接令人嚮往嘅神國亞斯格特Ásgarðr，以及矮人國Nidavellir（瓦特海姆）。前者以甜蜜又色彩鮮明嘅馬卡龍作代表，每日口味都唔同，後者則有甜品主廚每日巧手製作嘅每日精選閃電泡芙，每款有2種口味，開飯仔當日試嘅一款甜度適中，一款則較甜膩；最後食埋自家製鬆餅都好飽肚。

青春女神特色雞尾酒

凡享用下午茶可另加HK$88（原價HK$110）品嚐「伊登」蘋果特調雞尾酒1杯

酒店首席調酒師暨Dada Bar + Lounge經理，特別為今次嘅下午茶調配特色雞尾酒，向青春女神「伊登」致敬。伊登負責掌管讓諸神保持青春嘅黃金蘋果，所以雞尾酒亦以蘋果為主調，混合深受瑞典皇室喜愛嘅Roslags瑞典賓治酒 (Roslags Punsch)，以及多次獲獎嘅Gustav芬蘭刁草伏特加（Gustav Tilli Vodka）作為基底。

免費親子活動

「北歐神話饌嚐之旅」塗畫紙

酒店以超現實主義為設計概念，並擺放多個相關著名藝術家同作品，當家長享受下午茶時，小朋友可以參加藏寶遊戲「超現實遊蹤」，喺酒店內遊走並完成任務，藉此培養對藝術嘅興趣。而鍾意畫畫嘅小朋友，則可以一邊品嚐下午茶，一邊為北歐神話嘅畫作添上色彩。

同場特設Lovi Tree祈願

同場展示多款芬蘭木製藝術禮品

另外餐廳特別喺下午茶時段，擺放芬蘭木製藝術禮品品牌嘅Lovi Tree作為北歐神話概念主軸嘅「世界之樹（Yggdrasil）」，等大家掛上心意卡向眾神許願。

下午茶設有堂食同外賣自取，現時經OpenRice網上訂座更可享8折起優惠。如訂座其他餐飲時段，正價單點菜式則享7折同正價飲品5折優惠（酒精飲品除外）。

「FINDS X Lovi北歐神話饌嚐之旅」
供應日期：即日起至2022年8月31日
供應時間：星期一至日，15:00-17:30
價格：星期一至五：HK$568（兩位用）／每位HK$328｜星期六、日及公眾假期：HK$628（兩位用）／每位HK$358（另設加一服務費）
- 每位另加HK$150即可享用無限暢飲精選葡萄酒、葡萄氣酒
- 每位享用「北歐神話饌嚐之旅」下午茶嘅客人，更可憑優惠碼【LOVI15】於木製藝術禮品品牌網站以85折專屬優惠購物，以及獲得HAUSTAGE HK$50現金券乙張。

FINDS    
地址: 尖沙咀金巴利道39號帝樂文娜公館1樓