邊行邊食! 西灣河7大掃街小食
2018-01-30

掃街係唔少香港人都好喜愛嘅動作。未夠鐘食飯又掃一掃,食飽飽又要掃一掃,總之,行喺條街度見到一間間嘅小食店就會忍唔住,乜都想食!至於掃街熱點,多到接近區區都有,一於逐區去睇下。今次講下西灣河先。

西灣河掃街,唔使講,梗係去太安樓,不過咁多間舖,quota有限,點揀好?

新開北京煎餅   Bravo!

圖:Jayce1234

成日都去掃街嘅朋友,有新嘢喎。由北京人開嘅北京煎餅,夠晒地道。最惹味嘅當然係孜然羊肉同香辣羊肉,啲羊肉唔會太羶,仲有薄脆夾住。其他口味有椰香黑椒豬頸肉、煙肉芝士雙蛋等等。

麻甩之選   太安樓牛雜

 圖:橄欖樹

呢檔牛雜,特別在於佢有坊間好少食到嘅柚皮,所以難得一場嚟到嘅話冇可能唔叫。牛雜汁幾香濃,牛肚牛腩牛根通通都炆得好腍好入味,一碗淨牛雜唔夠食嘅加埋麵底都得,最好就叫埋蘿蔔豬皮啦,索晒啲汁嘛。

沙嗲汁魚蛋   魚蛋佬

 圖:CarolCheung119

好似硬係要篤返串魚蛋先似掃過街。而呢檔魚蛋呢,超多汁,多到係咁滴,不過唔係咖喱汁,係秘製沙嗲汁。香香辣辣但又帶點甜,仲好厚下,誇張啲講句係為咗啲汁而食串魚蛋。又,魚蛋之外,魷魚同牛柏葉都係值得留quota畀佢哋嘅。

打卡必食    I Love 戟 - 日式班戟專門店

 圖:Magic3be

又要掃街又要有靚相打卡,食呢個戟吖。佢哋將焦糖燉蛋、雪糕同班戟全部女生最愛嘅嘢炒埋一碟,賣相靚靚仔仔咁,行過見到係好容易被吸引到嘅。出面一塊班戟皮包住雪糕,頂頭就係焦糖燉蛋。講真,滑就唔算好滑嘞。至於成嚿嘅配搭,懶豬可以揀官配,如果唔係自己揀下雪糕口味咁都幾開心,有隻極酸檸檬味都幾過癮。

芋圓刨冰   來來小吃店

 圖:samuel_wu

得9度又如何?愈凍食凍嘢愈好食嘛(好似係)。而且畀你見到呢個黑糖刨冰再搭芋圓,你都忍唔到口㗎啦。建議搭埋仙草同芋頭啦,芋頭好綿密呀,啲仙草又滑口,或者鍾情手工嘢嘅可以揀手工粉粿同手工愛玉。

雞蛋腸粉 娥姐粉菓

 圖:ckarenhl

雖然佢個名叫粉菓,但好多人其實係慕雞蛋腸粉之名嚟食嘅,話晒香港唔係周圍食到嘛。雞蛋腸粉即叫即蒸,滑係幾滑,配埋蔥花、同甜豉油係幾香,但蛋味就...可以再香啲啦。

抹茶珍珠   今日真珠茶專賣店

 圖:chingchinglui

食咗咁多嘢都口渴喇,搵返杯嘢飲啦。近年啲台式珍珠茶飲愈開愈多,但呢間早著先機,已經喺度開咗好多年喇。用台灣茶葉沖出嚟嘅茶飲,茶味當然香濃啲。珍珠夠煙韌而且份量夠多,咬極都仲有嗰下先開心嘛。


文:Kar


關鍵字
西灣河
太安樓
掃街
芋圓
班戟
牛雜
北京煎餅
掃街熱點
香港各區都暗藏不少掃街熱點,開飯仔就為大家逐區發掘,分享掃街文化。
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
3天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
2020-04-29