邊行邊食!深水埗掃街6大推介
2019-05-27
掃街係唔少香港人都好喜愛嘅動作。未夠鐘食飯又掃一掃,食飽飽又要掃一掃,總之,行喺條街度見到一間間嘅小食店就會忍唔住,乜都想食!今次掃街熱點嚟到深水埗,大家都知深水埗隱藏咗唔少平民美食。競爭激烈,性價比極高,最後有口福嘅⋯仲唔係我哋呢班食客?

近排,深水埗除咗有傳統老字號小食店之外,亦有唔少比較新嘅小店進駐,每次去都包保有新嘢試!

極邪惡嘅「肥仔」嘢食  三肥美食
圖:justwinso
三肥美食,顧名思義係由三個肥仔一齊打理嘅小食店。賣嘅都係極邪惡嘅「肥仔」嘢食。聽聞係首創嘅椒鹽腸粉,簡直係突破咗腸粉嘅潛能!腸粉外脆內軟,腸粉炸完都保持嫩滑嘅質感,椒鹽又夠惹味。另外仲有鹹蛋黃黃金雞翼,外層嘅鹹蛋黃份量夠多,直頭想拎嚟撈飯!

原味雞蛋仔夠簡單  蛋香烘焙
圖:Ben爺
呢間新開嘅雞蛋仔專門店,開咗冇耐已經吸引到唔少人因為舖頭陣蛋香而停低買返份嚟試!雞蛋仔全部即叫即做,外脆內軟,粒粒飽滿,唔會全部空心位嚟。除咗經典原味之外仲有低脂芝士、綠茶同肉鬆等。仲有自家製薏米水、檸檬茶,食到drydry哋飲返枝就啱!

傳統唐餅店小食  八仙餅家
圖:ha1laukamilla
食完港式食中式,八仙餅家係少數仲係前鋪後工場嘅店舖,五十幾年嚟一直供應傳統唐餅。皮蛋酥係餅舖名物,內層有原個皮蛋係入面,仲有紅薑同瓜子增加香味同口感,外層酥皮夠鬆化(睇圖應該feel到)。耐唔耐係要食吓呢啲唐餅先可以記住呢種咸香味~

台灣人珍奶小店  圓圓
介紹返間嘢飲畀大家keep住邊食邊飲先!雖然唔係咩過江龍,不過係由台灣人老闆娘打理,而且飲過嘅都讚好。黑糖珍珠新鮮即製,杯底會feel到啲珍珠仲係暖暖哋,珍珠咬落煙韌Q彈,黑糖味勁香。個人覺得珍珠炭焙烏龍奶茶多份茶香,同黑糖嘅甜會平衡啲。

熱辣辣街頭串燒  標叔叔小食店
講到掃街就梗係要食返啲一串串嘅嘢先有掃街feel㗎~牛肋肉、牛脷係牛魔王必叫之選,肉汁夠,而且孜然粉重。Btw因為係即叫即燒,所以都要啲時間等㗎!另外花枝丸都勁受歡迎,燒到嗰外層脆身然後再加蜜糖,一啖即時解決咗想食BBQ燒丸嘅癮。

日系軟雪糕 
掃到熱熱哋可以上西九涼住冷氣繼續掃。呢間「華」走日式風格,主打8.0特濃牛乳軟雪糕,而且口味同款式都極多,喺得深水埗,價錢都算親民。除咗軟雪糕,仲有雪葩、smoothie同日本依家好興嘅動物造型雪糕(好似BR雪糕嗰啲)。抹茶8.0盆栽嗰造型就夠晒cute!

文:Yanny

關鍵字
深水埗
掃街
小食
雪糕
串燒
掃街熱點
香港各區都暗藏不少掃街熱點,開飯仔就為大家逐區發掘,分享掃街文化。
餐廳資料
更多
收起
本月熱門
【隨時更新】便利店尋寶 每周新品速報
1天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
5天前
日本人氣茶室登陸尖沙咀 招牌Tea Set、甜品推介(有片)
2019-09-25
高CP值火鍋放題 (1)
1天前