邊行邊食 新蒲崗掃街5大推介
2019-07-29
掃街係唔少香港人都好喜愛嘅動作。未夠鐘食飯又掃一掃,食飽飽又要掃一掃,總之,行喺條街度見到一間間嘅小食店就會忍唔住,乜都想食!今次掃街熱點嚟到新蒲崗,雖然新蒲崗位置比較僻,但都有唔少朋友仔喺呢區覓食㗎~而且價錢夠貼地,啱晒喺度返工返學、又成日口痕嘅大家去掃食!

真材實料雞蛋仔    629雞蛋
新蒲崗嘅629雞蛋仔,由老闆one man band打理(但近期好似請多咗個幫手),靠住自行研發嘅足料蛋漿同做好一底雞蛋仔嘅專注,尤其係嗰「3分20秒」嘅專注,成功吸引街坊排隊嚟食。呢度嘅雞蛋仔外脆內軟,蛋香濃,真材實料,絕對唔係香精味。款式都幾多,連烏龍味都有。格仔餅就夠厚實,食完唔覺食空氣。

古法九層拿破侖    常溫 
呢度最出名嘅就係堅持全人手製嘅古法九層拿破侖,比起普通西式甜品嘅拿破侖嚟講,手搓酥皮、合桃蛋白餅層層相間,口感仲豐富,而且仲非常香牛油味。下午茶嘆返件最正。不過每日出爐唔多,真心賣完即止。買唔到嘅話不妨試吓件裝戚風蛋糕,都好鬆軟,唔差㗎~

超平生煎包    麥記美食
生煎包同鍋貼嘅人氣都不相伯仲,十係十蚊左右就可以食到!生煎包煎至金黃香脆嘅包底,入面暖暖嘅豬肉餡同湯汁,加埋真係好warm~而且生煎包同鍋貼都係細細件,可以一啖K.O.一個,絕對係熱辣辣又飽肚之選!

重口味串燒   舔舔脷美食
雞腎大大件爽口,咬落好香脆,而且辣度夠!香草、孜然粉、辣粉等嘅調味料都畀得勁足,勁惹味。而除咗平時成日見到嘅燒雞翼、燒茄子咁之外,呢度竟然有唔少海鮮嘅選擇。另外仲有極邪惡生炸雞髀,外脆內juicy,拎住兩串行街食都咪話唔爽!

素食奶蓋茶之選    NUTTEA
Nuttea嘅嘢飲用咗較健康嘅蔗糖,而且賣點係用堅果冷壓成堅果乳去代替牛奶,所以店內所有奶茶、奶蓋飲品都係全素,真係素食者嘅福音~但其實就算係非素食者都一樣大讚呢度嘅奶蓋口感厚實又多份果仁香,更重要嘅係冇平時嘅奶蓋咁heavy,罪惡感即刻減半!

文:Yanny


關鍵字
新蒲崗
雞蛋仔
拿破侖
生煎包
串燒
奶蓋
掃街熱點
香港各區都暗藏不少掃街熱點,開飯仔就為大家逐區發掘,分享掃街文化。
餐廳資料
更多
收起
本月熱門
【隨時更新】零食速報 每周新款零食、酒品點評
6天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
2天前
2月份好評餐廳十強
2020-03-05