連假過大海 澳門4日限定米芝蓮指南街頭美食節 (有片)
2018-09-29

呢幾日連假plan咗活動未?過轉大海食好西增肥啦。一連四日都有第二屆米芝蓮指南街頭美食節呀,有大約8間亞洲區人氣街頭美食店同埋米芝蓮星級小販店,新加坡油雞飯、泰國雞肉咖喱麵等等都有得食!

泰式雞肉咖喱麵   Huen Lamphun (Suan Phak)
*米芝蓮指南曼谷2018 - 「米芝蓮餐盤」推介

嚟自曼谷嘅呢間米芝蓮推介小食店,有幾款馳名咖喱菜式,包括泰北五花肉咖喱飯、泰北乾炒豬肉咖喱粉絲、泰式雞肉咖哩麵都有得試。個麵有得揀辣度,溫馨提示佢個辣都幾刺激下。同埋佢嘅「雞肉」係大大隻雞翼嚟,撈埋洋蔥、香蔥等好香口。

泰式煙鴨肉配有機糯米飯   Soul Food Mahanakorn
*米芝蓮指南曼谷2018 -必比登推介

同樣都係曼谷嘅餐廳,泰式煙鴨肉配有機糯米飯同泰式紅咖哩牛腩飯都係當地嘅地道人氣美食,啲咖喱仲係師傅手磨嘅,調製時加入花生,增加層次感。

港式豉油雞飯    了凡油雞飯 
*米芝蓮指南新加坡2018 一星餐廳

呢間新加坡餐廳大有來頭,係全球第一間贏得米芝蓮星級榮譽嘅街頭小食店嚟呀!油雞飯係佢哋嘅招牌菜,雞肉嫩滑,配甜豉油好送得飯,必試!

金沙鹹蛋軟殼蟹   瓊榮記海鮮 
*米芝蓮指南新加坡2018 - 「米芝蓮餐盤」推介

講起新加坡,大家應該好快會聯想到今年大熱嘅鹹蛋魚皮同菜式,呢間餐廳就有金沙鹹蛋軟殼蟹食!同場加映埋星洲媽蜜脆雞。

印度黃油雞配藏紅花飯   The Song of India 
*米芝蓮指南新加坡 2018 一星餐廳)

嚟自新加坡嘅印度菜,推介可以試佢哋嘅印度黃油雞配藏紅花飯,師傅調製醬汁時加入咗蕃茄、蜜糖等材料,所以隻雞嘅味道帶有香甜,又有微微茄酸,層次豐富。

台灣乾麵線麻油雞湯  阿男麻油雞 
*米芝蓮指南台灣2018 -必比登推介

台灣麵線出名,而呢間舖嘅師傅,就用咗成13年嘅時間去研製一碗麵線麻油雞湯,個湯底係用雞骨熬足16個鐘,絕對值得一試。

雪燕南瓜凍   玥龍軒 
*米芝蓮指南香港澳門2018一星餐廳

澳門粵菜嘅代表,佢哋嘅菜式一向都相當精緻,今次玥龍蝦中寶同甜品雪燕南瓜凍亦都唔例外。後者係將紅豆糕同雪燕放入個南瓜仔度,好吸睛。味道亦好清甜,大推!

蜜味西班牙黑豚叉燒   碧迎居
*米芝蓮指南香港澳門2018 - 「米芝蓮餐盤」推介

另一間澳門嘅中國菜餐廳,佢哋最出名就係蜜味西班牙黑豚叉燒啦,今次仲可以試埋佢哋另一道招牌菜黑豚肉夾饃添。

日期:9月29日至10月2日(星期六至星期二)
地址:新濠影滙澳門食街遊
開放時間: 11am-4pm 及6-10pm


文、相、片:Kar


關鍵字
澳門
米芝蓮
街頭小食
飲食潮流
開飯仔為大家發掘香港這個美食之都的最新美食資訊,分享飲食潮流文化。
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13