軒仔餐廳再出小王子下午茶 吸睛紅色飛機蛋糕+棉花糖 兼送小王子公仔
2019-09-23

「能知道自己想要甚麼的人,真是幸運呢!」法國經典小說《小王子》講嘅唔止係成長、愛情同愛情,仲有夢想!今次,張敬軒主理嘅法國餐廳正正就係以「夢想啟航 Flying to My Dream」做主題,再度推出全新嘅靚靚小王子下午茶,食完仲有隻特製嘅小王子figure可以拎返屋企添!


如果大家仲記得,佢哋上年嗰set下午茶,有朵好靚嘅玫瑰花!而今次講夢想,當然就有架標誌性極強嘅紅色飛機啦。喺正式介紹之前,先睇下軒仔點樣形容今次呢個下午茶餐先!

開飯仔畀咗幾個題目軒仔,請佢分別以一首自己嘅歌、任何一句歌詞,同埋一個朋友去形容下個set,軒仔諗咗陣,就畀咗以下呢幾個答案出嚟,至於點解,就要大家自己領會下喇。

 題目:一首自己歌

 題目:任何一句歌詞

 題目:一個朋友


採訪當日,軒仔碰巧抱恙,把聲降咗2 + n度,沙到一個點,但佢依然堅持要親身介紹:「以往大家講小王子,通常都係講佢啲金句呀、玫瑰呀、愛呀咁,但小王子其實仲有個好重要嘅主題,係講夢想。」


餐廳根據「飛行員夢想」嚟設計咗呢個鮮紅色飛機造型嘅柚子海棉蛋糕,長條形嘅飛機,外層係絲絨質感嘅朱古力,內層就係微酸嘅柚子海棉蛋糕,而下面就係好似雲彩一樣嘅人工手做棉花糖。「呢個棉花糖,打卡時間得5分鐘,同玫瑰嘅生命一樣,係有時限性㗎。」至於蛋糕上面乘風飛翔嘅小王子,軒仔打趣話:「本嚟想做款食得嘅小王子嘅,但要扑爆佢個頭先食呢又好似唔係咁好,最後我哋就設計咗呢款特製嘅figure,大家食完之後仲可以拎走。」(不過留意返,小王子figure數量有限,送完即止啊。)

 喺三層架上,最頂層嘅係三款充滿住《小王子》元素嘅甜品


味道清甜嘅荔枝蕃石榴慕絲迷你泡芙,有頂小王冠,主體嘅紅色象徵小王子嘅赤子之心,而軒仔更表示「我自己個人對蕃石榴係好情有獨鍾,佢嗰種粉紅色,嗰種有漸變、層次嘅粉紅色,其實都係象徵愛情嘅。」WOW~ 好浪漫~


粉藍色星球造型嘅朱古力星球棒棒糖,有粒粒銀色糖珠同星星,入面係朱古力慕絲同朱古力脆脆,一啖咬落去,脆皮中又有啲煙韌嘅口感,朱古力味香濃得嚟又唔會太甜。至於有片玫瑰花瓣喺面嘅蛋白檸檬撻,酸酸地咁感覺清新。


中間嗰層嘅Scone,除咗有原味之外,仲有款特別配合主題而製作嘅玫瑰鬆餅,以乾玫瑰同法國玫瑰花製作,配埋法國得獎名牌草莓、柑橘果醬,同皇室御用品牌Rodda's奶油忌廉,口感鬆化並帶有陣陣花香。


而最底層嘅則係4款相對輕身啲嘅法式風味鹹點,包括仙后芝士煙肉批、法式蘿蔔絲批配辣根醬、魚子醬吞拿魚他他配脆薯球,同埋皇帝蟹沙律配三文魚子、青瓜及法國白芝士。

問到軒仔點解咁鍾意小王子,佢首先表示好鍾意小王子對愛嘅執著。另外,亦因為《小王子》係80年代少數能夠合法傳入到內地嘅兒童刊物,係佢細細個就接觸到嘅童年讀物。而且雖然呢本係一本兒童刊物,但講嘅卻係一啲好有意思、好深奧嘅成人故事,深入淺出,由小朋友到大人都啱睇。嗯,各位粉絲,想食就要快手卜位啦,軒仔話首賣當日嘅情況係仲快過佢演唱會嘅飛,5分鐘就賣晒啦科科。


日期:10月12日起(逢星期六、日及公眾假期供應)
時間:3:00pm - 5:30pm
價錢:HK$688 (2位用,另設加一服務費)
限量:每日20份 (接受30日內嘅網上預訂


仙后餐廳
地址:灣仔皇后大道東213號胡忠大廈2樓


文:Kar
相、片:Cathy


關鍵字
張敬軒
下午茶
灣仔
法國菜
名人餐廳
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
4天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
5天前